Uviéu acueye’l III Congresu Mobile Business esta selmana

La conceyala d’Educación, Merced González, y el vicepresidente del Cluster TIC Asturies, Alberto Sánchez Casado, presentaron esti día en rueda de prensa l’III Congresu “Oportunidaes  empresariales: El Mobile-Business”, que se va celebrar demientres la mañana del próximu martes día 8 nel Palaciu d’Esposiciones y Congresos d’Uviéu.

González destacó qu’el Cluster TIC Asturies engloba yá a 60 empreses na rexón que representen 3.750 emplegos y una cifra de facturación cercana a los 320 millones d’euros, polo qu’animó a tola ciudadanía a participar n’eta tercer edición del congresu. Pela so parte, Sánchez Casado esplicó que l’oxetivu d’esti eventu ye treslladar a les empreses asturianes les posibilidaes que tien la tecnoloxía móvil “entendíu móvil como accesu a la información  en movilidá”.

El Congresu va tar estremáu en trés partes: una primer ponencia al cargu de Caixa Bank na que se va tratar sobre la importancia del móvil nel cambéu de los medios de pagu. De siguío, van  describise cuatro caso d’ésitu nos que va ser el veceru d’una empresa quién rellaté cómo resolvió un problema al traviés de la tecnoloxía de movilidá.

Asina, delles empreses procedentes de distintos sectores económicos y de manera bien práctica van esponer cómo impulsaron el so negociu al traviés del tresformamientu dixital: Philips LightingSpain, el Colexu de la Inmaculada Concepción-Xesuites de Xixón, Cintra Filial de Ferrovial y l’Institutu Oftalmolóxicu Fernández Vega.

A lo último, van desenvolvese meses de trabayu con una metodoloxía activa que va dexar la busca de soluciones al traviés de la movilidá en redol a les siguientes temátiques:

-La canal móvil nel tresformamientu dixital de les empreses
-Digitalización nel sector de la educación, retos y oportunidaes.
-Ventayes de la implantación de la movilidá n’empreses con personal en campu y equipos de vientes.
-La estratexa de movilidá nes empreses de la industria del metal.
-Industria 4.0 y movilidá.