UNA pide una especialidá de llingua asturiana en tol sistema educativu non universitariu

Dempués de la sentencia del Tribunal Supremu que declaraba illegal la esistencia de dos tipos de plantiyes de profesoráu la federación nacionalista desixe la creación d’una especialidá de llingua asturiana en tol sistema educativu.

Dende la UNA declaren qu’hasta esti momentu “los enseñantes de llingua asturiana y fala del navia-eo tuvieron desarrollando’l so trabayu dientro de la nomada “plantiya funcional”, lo que yá-yos torgaba la imposibilidá d’accesu al funcionariáu titular viendose empobinaos a una situación d’interinidá forzosa”.

Pa la UNA esta situación “amosaba yá’l desinterés del Principáu pola calidá de la enseñanza de l’asignatura que pasaba pola falta de continuidá y los continuos desplazamientos de los docentes, asina como la imposibilidá d’acceder a les places de concursu-oposición como’l restu de los compañeres y compañeros”. “Too ello pa torgar, entovía más, la difícil ya inxusta situación de la llingua d’Asturies nel sistema educativu”, comenente dende la UNA.

La conseyería d’Educación, amparándose en problemes llegales, refuga agora la inclusión de los docentes nes plantiyes orgániques y la creación de la especialidá correspondiente, “colo que na práctica, nestos momentos, los profesores y maestros de llingua asturiana y fala del navia-eo nun esisten dende un puntu de vista llegal”, recuerden los nacionalistes. Pa solucionar esti problema UNA entiende que la única solución pasa “pela creación de les especialidaes de llingua asturiana y fala del navia-eo nes mesmes condiciones que’l restu, ye dicir, dientro de la única plantiya qu’hai, la convocatoria d’una accesu equiparable al restu de les especialidaes y al empar xustu col colectivu d’enseñantes que trabayen pola dignificación de l’asignatura”.

Por too ello, UNA fai un llamáu a sofitar les movilizaciones que los sindicatos d’enseñanza tienen anunciao y desixe una rempuesta inmediata de la Conseyería d’Educación pa da-y solución a esta vergoñosa situación, tanto pa los docentes como pa los drechos del alumnáu, de la sociedá asturiana y de la llingua propia del país.