Un conciertu acústicu abre esti domingu en Xixón la esposición “Bestiario”

Un conciertu acústicu a les 12,30 del domingu 17 na llibrería-cafetería La Revoltosa (Juan Alonso, 12 de Xixón) de David Varela, Los Bonsáis, Pauline en la Playa y Nacho Álvarez va sirvir pa inaugurar la esposición de les ilustraciones del diseñador Marco Recuero pal discu Bestiariu presentáu n’Avientu y que producíu pola La Fabriquina xunto con Araz.net recueye’l trabayu de diez bandes.

La inauguración va celebrase esti domingu con un conciertu n’acústicu nel que van intervenir dellos de los artistes que participen nesti discu pa la reciella. Los trabayos van tar espuestos nesti espaciu xixonés hasta’l 22 de mayu.

Marco Recuero va presentar les ilustraciones colos diez animales a los que tán dedicaos los temes del discu producíu por La Fabriquina y editáu por Araz.net, amás d’otres creaciones asemeyaes que nun apaecen nel discu. El diseñador gráficu caltién nestos trabayos el so estilu carauterísticu que lu llevó a ser ún de los ilustradores más reconocíos del país.

Pa la inauguración de la esposición que va acoyer dende’l domingu, y hasta’l 22 de mayu, la llibrería-cafetería La Revoltosa (Juan Alonso, 12), ta previstu un conciertu n’acústicu a les 12.30 hores con dalgunos de los artistes que participen en ‘Bestiariu’. Asina ta confirmada la presencia de David Varela, Los Bonsáis, Pauline en la Playa y Nacho Álvarez.