Últimos díes p’apuntase a les actividaes pa escolinos d’asturianu de Xixón

Hasta final de mes, los colexos ya Institutos de Xixón pueden apuntase a les actividaes organizaes en collaboración col Departamentu de Programes Educativos de la Fundación Municipal de Cultura. Los maestros que ponen clase d’asturianu tienen talleres, concursos y actividaes lúdico-pedagóxiques pa que los escolinos y les escolines estudien asturianu de mou prestosu y divertíu.

Esti añu, comenten los organizadores “hai talleres pa facer tortos: “De la panoya al platu”; actividaes lúdico-pedagóxiques: “Xixón de novela” o “Xugando cola toponimia”; xornaes pa la xente mozo: “Saca la llingua, quintos alcuentros de la mocedá cola llingua”; concursos: “Ruempi la mollera” y “Vas velo, trebeyos pal aula”, esposiciones itinerantes, etc.”

”Dalgunos talleres son nuevos y otros vuelven facese pol ésitu d’otros años”, comenten. El profesoráu que pon clas de llingua asturiana puede apuntase dende’l Centru Educativu pente medies d’un programa informáticu hasta final d’esti mes de setiembre. Pa más información consultar la “Guía de Programes Educativos de Xixón. Cursu 2007-2008” o llamar a la Oficina Municipal de la Llingua (985 18 13 89).