Portada Lliteratura Trabe saluda l’aniversariu de Conceyu Bable cola reedición de los primeros testos del collectivu

Trabe saluda l’aniversariu de Conceyu Bable cola reedición de los primeros testos del collectivu

by asturnet

Una exhumación de lletres. La editorial Trabe presenta mañana, nel mesmu día en que se cumplen 30 años de la fundación de Conceyu Bable, una reproducción facsimilar de los primeros testos del hestóricu collectivu, publicaos na revista ‘Asturias Semanal’ ente 1974 y 1977. La obra inagura una serie concebida pa rescatar el pasáu inmediatu d’Asturies y ta prologada por Pablo San Martín y Xulio Viejo.

A lo llargo de más de 300 páxines y a un preciu de venta de 20 euros, el volume ‘Conceyu Bable n’Asturias Semanal’ reproduz los escritos que’l grupu referencial del Surdimientu asoleyó nesa publicación dende la fundación del collectivu hasta xunu de 1977, nuna obra que la casa editora quier apurrir como material d’estudiu o como entretenimientu pa quien quiera averase a un “intensu, apasionáu y apasionante periodu de la nuesa historia más reciente”.

Magar que la revista ‘Asturias Semanal’, dirixida por Graciano García, publicó nes sos fueyes abondos editoriales, artículos y cartes de los llectores al rodiu l’emerxente movimientu asturianista, el llibru qu’agora s’asoleya céntrase en recuperar les páxines propies que Conceyu Bable publicaba con periodicidá, baxo la coordinación de Lluis Xabel Álvarez, Xosé Lluis García Arias y Xuan Xosé Sánchez Vicente.

La presentación del llibru realizaráse a les 18,30 hores de mañana, martes, na Llibrería Asturiana de la cai Buenaventura de Paredes, n’Uviéu, dientro d’una selmana de conmemoraciones del 30 aniversariu de Conceyu Bable qu’arranca güei con un alcuentru d’artistes plásticos nel Atenéu Obreru de Xixón y l’apertura de la esposición ‘Pegatines que falen’ na biblioteca d’El Fontán, n’Uviéu.

Tamién te podria gustar