Termina’l plazu pa presentar obres al XII Premiu Alberto Vega de poesía pa escolinos

El Centru Cultural y Recreativu «Belarmina García» de La Nava (Llangréu) convocó’l XII Premiu «Alberto Vega» de poesía pa escolinos de les cuenques mineres. La participación ta abierta a tolos alumnos y alumnes matriculaos que seyan menores de 18 años. Va haber un ganador absolutu y otros premios en delles categoríes, según les edaes. El plazu d’almisión de los trabayos, qu’han presentase por triplicáu nel centru cultural, acaba esti martes, 10 de mayu. Los poemes han dir firmaos con nomatu, pero acompañaos d’un sobre colos datos de los participantes. La estensión mínima ye de 14 versos y el poema tien de ser inéditu.

Nel 2010, la ganadora del certame foi Verónica Sánchez, del IES Bernaldo de Quirós. La estudiante presentó la obra «Metrópolis», nel que describe una ciudá. Nesti concursu participen escolinos d’Ayer, Casu, Llangréu, Llaviana, L.lena, Mieres, Morcín, La Ribera, Riosa, Samartín del Rei Aurelio y Sobrescobiu.

Bases completes del concursu