Telecable renuncia a integrase con Euskaltel o R

Nos planes de Telecable nun ta una eventual fusión o integración n’otra compañía, sigún dexó ver la compañía esti día nuna entrevista col diariu El Comercio. Enforma tiempu viénose falando de la necesidá de les operadores Telecable, Euskaltel o R d’integrase o fundise ente elles pa ser más competitives. El CEO de Telecable dexó claro que “El tamañu nun nos torgó competir” nesa entrevista.

Alejandro Martínez, conseyeru delegáu de Telecable, concedió una entrevista a El Comerciu, onde declaró que la so compañía “ta sana y compite”. Nos planes de Telecable nun ta’l fundise con otra empresa nin el d’integrase n’otra mayor. Sale asina al paso ante los insistentes rumores sobre la necesidá de formar un bloque con otres cableras rexonales (Euskaltel o R) o integrase nuna compañía d’ámbitu nacional como Vodafone o Orange.

El Conseyeru Delegáu esplicaba na entrevista que’l tamañu “nun torgó nunca competir a Telecable” y qu’a la so empresa considérase-y bien fuerte nel segmentu de redes fixes y banda ancha. Amás, agora van cubrir el segmentu móvil al “desenvolver una rede de datos móvil, gratuita y de tráficu ilimitáu”. Esti nuevu serviciu denominase Wifisfera y dexa l’accesu inalámbricu fuera del llar y del trabayu.