Cine

El mexicanu Guillermo del Toro va producir el llargometrase “El orfanato”, una hestoria escrita pol cineasta y guionista asturianu Sergio Sánchez. José Antonio Bayona va dirixir esti triller de terror psicolóxicu que va empezar rodase prósimamente nel conceyu de Valdés.

Sergio Sánchez, autor de cortometraxes como ‘Temporada baja’ o ‘7337’,ye’l guionista de la producción hispano-mexicana “El Orfanato” agospiada pol cineasta Guillermo del Toro. Ye’l primer saltu al cine comercial d’un realizador que forma parte, xunto a autores como Ramón Lluis Bande, Jorge Rivero o el tándem Juan Luis Ruíz y Lucía Herrera, del movimientu nomáu Nuevu Cine Asturianu. El so últimu trabayu cinematográficu fue l’adaptación del poema “La muerte” de Roberto González-Quevedo dientro’l programa “Cinco poemes” estrenáu na Selmana les Lletres.

La séptima edición del ciclu de cine Peor Imposible va proyectar en Xixón una quincena de filmes de los consideraos unánimemente pésimos del xéneru fantásticu y de terror. Decoraos de cartón piedra, mostruos que provoquen hilaridá y efectos especiales dignos d’una tienda d’artículos de broma son dellos de los rasgos comunes a les producciones programaes.

El ciclu escomienza’l prósimu 29 d’agostu y va durar hasta’l 3 de setiembre. Dellos de los filmes que van proyectase pertenecen por méritos propios a la categoría de les peores películes nunca filmaes, ente ellos auténticos clásicos de la serie B como “El humanoide», «Ursus y el terror de los kirghisi» o «La invasión de los zombis atómicos».

Producciones de baxu presupuestu de diversos países como Xapón, México o Arxentina igüen el programa d’esta nueva edición na que se va facer remembranza de dos figures esenciales del cine “freakie”: Michel Reeves y Alejandro Jodorovsky. Un cursu sobre trucos ópticos como efectos especiales completa’l programa de la sétima edición de Peor Imposible.

Les proyecciones al aire llibre del Cerru de Catalina en Xixón vuelven un veranu más con tres títulos aptos pa tolos públicos. incluíos los más desixentes. Millions de Danny Boyle, La casa de les dagues voladores de Zhang Yimou y America Team de Trey Parker son les películes que van poder vese dende esti xueves 18 al sábadu 20.

La primera de les películes: Millions, ye una coprodución británico-estaounidense protagonizada pol actor infantil Lewis McGibbon y que cuenta la hestoria d’un rapacín al que-y cai del cielu una maleta enllena de billetes de dólares. El viernes 19 lléga-y el turnu a la producciòn chino-hongkonguesa La Casa de les Sagues Voladores, una película d’acción y emociones fuertes ambientada nel tiempu de la decadencia de la dinstastía Tang.

L’últimu de los títulos proyectaos nel Cerru de Santa Catalina va ser America Team (World Police), una ácida crítica del nuevu orde mundial empobináu polos Estaos Uníos escrita polos creadores de South Park y protagonizada íntegramente por marionetes.

Los cineastes Xuan Lluiz Ruíz y Llucía Herrera prosiguen la selmana qu’entra el rodaxe del documental “L’Escaezu”, una llamada a la memoria de los Neños de Rusia entamada alrodiu del conciertu que’l grupu Mus-yos dedicó nel Centru Español de Moscú. La grabación emplea una técnoloxía dixital d’alta definición, pionera n’Asturies, en colaboración cola productora DpComunicación.

Tres el rodaxe va unos meses en Moscú recoyendo’l conciertu de Mus énte los Neños de la guerra y testimonios de protagonistestes directos residentes na capital rusa, Ruíz y Herrera van reanudar la prósima selmana el procesu de grabación del so documental con “neños” que viven anguañu n’Asturies.

En palabres de los propios directores de la película, “L’Escaezu” ye “un intentu de eliminar la amnesia, de recobrar los fragmentos de la nuestra historia, realidaes pasaes y presentes, les de los neños de la guerra asturianos, que han fixase na memoria del presente y del futuru”. Xuan Lluis Ruíz y Llucía Herrera consideren que ye necesario el “que la historia trescienda, eliminar l’escaezu, siguir lluchando contra esa amnesia aneya y desfasada”.

El documental, que cuenta con una ayuda económica de l’Axencia Asturiana d’Emigración, la Conseyería de Cultura y Comunicaciòn Social, y del Conceyu de Xixón, ta rodándose ente Rusia y Asturies, con testimonios de los propios protagonistes de la diáspora infantil y cola música del grupu Mus como piedra angular del entamu y el desarrollu de la película. “L’Escaezu” cuenta tamién col sofitu de l’Asociación de Repatriaos de l’Antigua URSS “Pablo Miaja”.

Na so parte técnica, Ruíz y Herrera van emplear un formatu de grabación inéditu n’Asturies, el video dixital d’Alta Definición nun trabayu de colaboración cola única productora qu’emplea esta tecnoloxía na nuestra comunidá: DpComunicación de Julio García Cedrón. Esta tecnoloxía ufierta unos resultaos d’alta resolución asemeyaos al formatu convencional cinematográficu.

Los directores Xuan Lluis Ruíz y Llucía Herrera son autores d’otros trabayos documentales en llingua asturiana como “Lluvina” y “Medrana”, esti últimu un llargometraxe estrenáu na última edición del Festival de Cine de Xixón.

El ciclu de cine de Serie B “Peor imposible” que se celebra en Xixón del 29 d’agostu al 2 de setiembre va impartir un taller d’introducción a los trucos ópticos nel cine dirixíu pol especialista Valentín Lorca. La Fundación Municipal de Cultura ye la organizadora del ciclu y el cursu.

El taller va ocupase d’una parte de los efectos especiales nel cine, como son los trucos ópticos tradicionales. Éstos son cada vez menos utilizados debío al puxu de los ordenadores y de la imaxen dixital, pero siguen siendo una forma de crear ilusiones énte una pantalla cinematográfica.

El conteníu del taller, impartíu por Valentín Lorca, abarca tanto los aspectos básicos de la fotografía y la so relación colos decoraos como les tresparencies, les maquetes parciales o los efectos con espeyos. Pa desarrollar estos conteníos va analizase y realizase un exemplu prácticu de cada técnica empleada.

El plazu d’inscripción pal cursu ya ta abiertu y el preciu de la matrícula ye de 17 euros. El teléfonu de contactu pa solicitar más informción ye 669 018 692 (Jesús Parrado).

Esti llunes 25 escomienza en Xixón un Cursu de Práctica Cinematográfica dedicáu a analizar los estremaos procesos creativos de la realización de filmes. Organizáu pola Obra Social y Cultural de Caxastur y coordináu pol director del Festival de Cine de Xixón, José Luis Cienfuegos, el cursu va cuntar cola participación de realizadores como José Luis Guerín, Juanma Bajo Ulloa, Chus Gutiérrez o Nacho Vigalondo.

Dende esti llunes y hasta’l prósimu viernes 29 va desenvolvese el taller de Práctica Cinematográfica estructuráu en conferencies, proyecciones comentaes y un taller diariu d’escritura de guion, asina como un apartáu especial reserváu pal xéneru curtiumetraxe. Amás de Guerín, Bajo Ulloa, Gutiérrez y Vigalondo, tamién van impartir conferencies los realizadores Álvaro Pastor y Esteban Crespo, xunta otros profesionales del procesu cinematográficu como’l coordinador de producción Eduardo Chapero, el director de fotografía Ricardo García y la montadora Julia Juáriz. El guionista Antonio Tashorras va ser l’encargáu de dar el taller dedicáu a la escritura de testos fílmicos.

Les sesiones del cursu que cuenten cola participación de realizadores van proyectar tamién dalgunos de los sos últimos trabayos. Finalmente, el viernes 29 va dedicar la xornada a analizar la realidá del curtiumetraxe nel estáu y va entamase una proyección de películes nesti formatu de directores nuevos. José Luis Cienfuegos y Roberto Cueto son los encargaos de dirixir y coordinar esta nueva edición de los cursos de práctica cinematográfica entamaos pola Obra SOcial y Cultural de Caxastur.

El cineasta arxentín Juan José Campanella rueda estos díes n’Asturies parte de la serie “Vientos de agua”, un proyectu televisivu pa Telecinco que la cadena define como la so producción “más cara y ambiciosa” nel terrenu de les series de ficción. Campanella -autor ente otres películes de “El hijo de la novia” y de diversos capítulos de la serie norteamerica “Law & Order”- cuenta nel so nuevu proyectu la hestoria d’una saga d’emigrantes, desque salen de la península pel tiempu la guerra civil hasta los tiempos actuales de l’Arxentina del “corralito”. La cuenca’l Nalón y Prieres son dellos de los escenarios onde graba estos díes parte de la so hestoria.

El director arxentín cuenta como guionistes pa esta serie con Aída Bortnik -La historia oficial-, Juan Pablo Domenech -Culpables- y Áurea Martínez. Nel repartu: Héctor y Ernesto Alterio, Silvia Abascal, Pilar Punzano y Joan Dalmáu ente otros, aparte de los estras asturianos que participen estos díes nel rodaxe.

La hestoria traza l’itinerariu vital d’un asturianu que marcha pa Bonos Aires nel tiempu de la revolución del 34 y la guerra civil y la del so fíu, un arquitectu que preba fortuna n’España tres la crisis arxentina de los últimos años del sieglu XX y los primeros del actual.

En declaraciones a diversos medios del so país, Campanella declaró que nun piensa embarcase en nengún otru proyectu cinematográficu hasta’l remate de la serie. Tamién cuntó que la hestoria de “Vientos de agua” salió mientres filmaba la so última película: “Luna de Avellaneda”, na que trataba’l tema de la emigración, inda non de manera directa: “entós surdió la idea de partir d’esi puntu pa facer 13 películes distintes de unos setenta minutos de duración”. Esti ye’l númberu de capítulos de la serie producida por Telecinco y pensada pa emitir n’horariu de “prime time”.

Estos díes Juan José Campanella y el so equipu tenten recrear el tiempu de la revolución del 34 y de la guerra civil en dalgunos de los escenarios reales d’Asturies como la cuenca’l Nalón, onde rodó l’equipu nel vai de Santa Bárbara y nel parque de Redes. La serie cola que Telecinco quier apostar poles series de ficción de calidá ta previsto que s’estrene en 2006.

El presidente del Principáu, Vicente Álvarez Areces y la conseyera de Cultura, Ana Rosa Migoya, asistieron esti meudía a la presentación en Madrid del proyectu “Primeras tomas”, una iniciativa del productor Juan Gona pa sofitar el trabayu de nuevos realizadores mozos. Ente los tres primeros largometraxes que formen parte del proyectu, dos son de les cineastes asturianes Lucinda Torre y Teresa Marcos. El director Gonzalo Suárez foi l’encargáu de presentar esi nuevu proyectu de Juan Gona.

El conocíu productor de películes y series de televisión pretende con “Primeras tomas” apoyar obres escrites y dirixíes por nuevos talentos pa un públicu mozu y cola intención d’aportar una visión actual y dinámica de temátiques universales. Los tres primeros largometraxes que va producir dientro esti proyectu y que güei se presentaben na sé de la SGAE en Madrid, son “Vete de mi” de Víctor García León, “Alegría” de Lucinda Torre y “Tesoro mío” de Teresa Marcos.

Lucinda Torre cuenta nel so llargometraxe una hestoria d’amor y desalcuentros col tresfondu de la revolución del 34 y de la guerra civil nun llugar de la cuenca minera asturiana. En palabres de la so directora “Alegría” ye la historia “de miles de muyeres que, nel nuestru país, se vieron obligaes a renunciar a lluchar polos sos ideales pa sobrevivir y protexer a aquellos a los qu’amaben”. Torre define el so llargometraxe como “una historia de dignidá y pasiones alcontraes”, y “la película d’una historia non contada”.

L’otru llargometraxe de realizadora asturiana, “Tesoro mío” de Teresa Marcos ye una comedia policiaca ambientada nel Uviéu de los años 80. En palabres de la so directora: “enin ser autobiográfica, la historia surde de personaxes que conocí y de situaciones que viví o me contaron nel Uviéu de los años 80. Una ciudá y una época nes que yera posible alcontrase por cais y places del barriu antigu a yonquis y camellos trapicheando abiertamente, clientes qu’entraben o salíen de puticlubs y cures con sotana que llucíen manteo camín de la catedral o de la Casa Sacerdotal”. Pa Marcos “Tesoro Mío” ye una película que “pretende recrear esi momentu y esi llugar, contando una historia disparatada pero posible y que quier ser, per encima de too, divertida”.

Entrambes directores asturianes tienen detrás d’estos primeros llargometraxes una fonda trayectoria nel terrén cinematográficu. Lucinda Torre (Sama Llangréu, 1967) ye autora de diveros cortometraxes, ente ellos “El beso de la tierra” que tuvo nomináu a los premios Goya y trabaya dende va tiempu nun documental sobre la llucha que caltuvieron los trabayadores despidíos de la factoría llangreana Duro Felguera. Miembru del equipu de Programación de Cine y Documentales de Telemadrid y profesora de cursos sobre guion y realización cinematográfiques na Universidá Complutense, alcuéntrase anguaño preparando la preproducción del cortometraxe “Soledad”.

La uvieína Teresa Marcos, ye llicenciada en Periodismu y Publicidá y vivió un tiempu nel Reinu Uníu, onde estudió y trabayó nel campu audiovisual, enantes de volver pa Uviéu en 1997. Ye autora de los cortometraxes “Se Paga al Acto” (1994), “Lencería de Ocasión” (1999) y “Por estar contigo” (2002), los dos primeros nominaos a los Goya y el terceru una película que se proyectó n’abondos festivales y que tien algamao hasta agora dieciocho premios.

El proyectu “Primeras Tomas” de Juan Gona pa sofitar a nuevos talentos cinematográficos cuenta col patrociniu de la Conseyería de Cultura del Principáu, Cajastur y TVE.

El Festival de Cine de Xixón presentó esta mañana en rueda de prensa los proyectos premiaos nel concursu “No nos cuentes películas:¡Hazlas!”, dirixíu a productores cinematográfiques formaes por alumnos d’ente los 16 y 23 años pa la realización de documentales nos que se reflexe la realidá de la mocedá asturiana. Los proyectos seleccionaos nesta ocasión fueron “Suena’l Camín” de la productora Lluna Llena, na categoría de Bachilleratu, y “Bajar la música” de Mala Idea Produciones, nel apartáu de Ciclos Formativos.

El xuráu que formaben el director del Festival, José Luis Cienfuegos; José Braña, presidente de l’asociación de realizadores d’Asturies; Ana Suárez, coordinadora del Conseyu de la Mocedá del Principáu y José Antonio Vega, director de formación de la Ciudá Tecnolóxica Valnalón, tamién decidió conceder entrambes menciones especiales a los proyectos “Sin fronteras” de Media Movie, na categoría de Bachilleratu y na de Ciclos Formativos a “Tener o no tener” de la productora La Cuadra.

Los proyectos de documental premiaos cuenten con una dotación de 3.000 euros aportaos pola empresa Telecable pa la realización de los cortometraxes que van rodase a lo llargo d’esti veranu, ente los meses de xunetu y agostu. Los documentales van proyectase dientro la programación del Festival Internacional de Cine de Xixón.

El proyectu premiáu en Bachillerato:”Suena´l camín” ye un trabayu de la productora Lluna LLena, de la que formen parte Efrén Álvarez, Fernando Farpón, Jorge Pérez,Laura Pola y Carmen Bernardo del IES Benedicto Nieto de Pola de Lena. “Sin Fronteras”, mención especial del xuráu na mesma categoría, foi un proyectu presentáu pola productora Vaya Movie, integrada por Michel Castaño, Tamara Iglesias, Fernando Rodríguez, Ulrich Alvarez, Helena Menéndez, Estefanía Palleiro y Tamara Casielles del IES Virgen de Covadonga de El Entrego.

Los proyectos seleccionaos de la categoría correpondiente a Ciclos Formativos, el premiáu “Bajar la música” presentólu la productora Mala Idea Producciones, que formen Pablo Fraile, Ceferino González, Javier Martín, Fernando Otero y Gema González, alumnos de la Escuela d’Arte d’Uviéu, IES Aramo y Cidisi RTV de Noreña. El proyectu que recibió la mención especial del xuráu nesta segunda categoría: “Tener para ser” ye un documental ideáu pola productora La Cuadra na que tán Héctor González Camba, Jorge Casanova, Miriam Sánchez e Ignacio Linde del CIDISI–RTV de Noreña.

El xuráu del concursu “No nos cuentes películas: ¡Hazlas!” decidió asinamesmo, conceder un premiu especial pa destacar al proyectu presentáu polos alumnos y profesorares del IES ROCES de Xixón, personalizáu na profesora Pilar Alaiz y nos miembros de les productores Eclipse, Shock y Titanio.

El filme colectivu ‘Hai que botalos’ empobináu pola plataforma Nunca Mais énte les elecciones gallegues col propósitu de denunciar la política del Partíu Popular de Fraga Iribarne na comunidá vecina, va poder vese esti xueves 16 en Xixón, nuna proyección entamada na sé del Centru Social Sextaferia. Venticuatro cortometraxes col espíritu de la urxencia y el compromisu social nos que la Galicia del octoxenariu candidatu a repetir presidencia na Xunta y el so partíu nun salen mui bien paráu.

Dellos personaxes destacaos de la vida pública gallega como l’actor Manuel de Liria o el periodista Manuel Rivas son autores o protagonicen dellos de los cortometraxes de la película colectiva ‘Hai que botalos’. La proyección ye esti xueves a les 19,30 na sé de Sextaferia (c/Numa Guilhou, 8, baxo) en Xixón. El colectivu Burla Negra, integráu na plataforma Nunca Mais ufierta tamién la posibilidá de visionar o descargar nuna páxina web los cortometraxes, na que s’apurre tamién una curiosa información sobre la realización de cada peliculina.

Hai que botalos