Cine

L’Academia de les Ciencies y les Artes Cinematográfiques d’España escoyó pa la so nominación a los Premios Goya en categoría de cortometraxe a la producción “Nenyure” del realizador mierense Jorge Rivero. Premiada en sinfininidá de festivales dende’l so estrenu y reconocencia nel de Xixón de 2003, la película de Rivero ye un desolador retratu de la xeografía física y humana de les cuenques mineres tres la reconversión.

“Nenyure” ye un filme producíu por Jorge Rivero (P.C.) y la tamién asturiana Teresa Fernández Cuesta (Oasis P.C.)y esti mesmu añu resultaba merecedor del Premiu al Meyor Cortometraxe nel festival MadridImagen 2005 y del Premiu del Públicu nel Certamen Internacional de Cortometraxes Art Nalón. Amás d’estos salones, “Nenyure” proyectóse en diversos foros como’l Festival de Nuevos Realizadores de Granada, Festival Internacional de Cine d’Almería, Ocular 2005 (Selva del Camps), Festival de Cortometraxes de Madrid (Plataforma Nuevos Realizadores de Madrid), Alcances 2005, Amuesa Cinematográfica de Cádiz, CinEspaña. Festival de Cine Español de Toulouse (Francia) Festival Internacional de Cine de Bilbao, Iberamericana ’05 o na III Mostra di Cinema Iberoamericano de Bolonia (Italia).

El cortometraxe de Jorge Rivero rodáu n’inglés y con sotítulos n’español, describe la tresformación social y económica de la cuenca minera asturiana dende un puntu de vista personal ya íntimo, prefiriendo fixase nes consecuencies personales y emocionales qu’a la enumeración de fechos históricos. Nesti sen, la obra atiende más a ser un documental sobre los sentimientos que sobre los acontecimientos. El desrraigañu, la crisis esistencial, el vacíu, la emigración xuvenil, el paru y el desalientu superpónense a la realidá de la Cuenca buscando realizar un retratu íntimu de la actualidad de una Asturies cada vez más allonxada de la so identidad y con un futuru inciertu. Al empar “Nenyure” nun refuga la universalidá ya que la perda de la identidá ye común a tolos llugares y países del mundu.

El palmarés de la 43 edición del Festival Internacional de Cine de Xixón apaez encabezáu pol premiu al meyor llargometraxe pa la produción belga ‘Ultranova’ del director Bouli Lanners. El canadiense Jean-Marc Vallée por ‘Crazy’algamó la reconocencia como meyor realizador y el so filme tamién fue merecedor del premiu del xuráu mozu al meyor llargometraxe.

Nos premios empobinaos a la creación cinematográfica d’autores asturianos, resalta el premiu concedíu ex aequo a los Hermanos Rico por “Ricardo: Piezas Descatalogadas” y a Roxana Popelka y Konchi Rodríguez por “El aparcamiento”. Nel capítulu de nuevos realizadores el primer premiu fue pa “Malas Influencias” d’Iñaki Ibisate y el segundu pa “Longaniza con Patatas” presentáu por Xuan Acosta.

La 43 edición del Festival Internacional de Cine de Xixón fina esti viernes 2 con una programación basada un añu más na calidá indepentiente de les películes proyectaes y una escelente acoyida de públicu a les proyecciones. La presencia d’autores asturianos fue persignificativa esti añu en dellos ciclos paralelos a la sección oficial.

Dos títulos esperaos nesti festival y que cumplieron dafechu les espectatives creaes fueron “Cambia de vida. El viaje del Xixón Sound”, un percorríu pola escena independiente playa de mediaos de los noventa a cargu de los realizadores José A. Rodríguez y Elena Medina; l’otru filme, tamién un documental: “El Paisano: un retratu colectivu” de Ramón Lluis Bande, emocionante itinerariu pela alcordanza de catorce voces que van dibuxando’l so perfil del hestóricu dirixente comunista. Los ciclos Desorden y Concierto y el de Llendes acoyeron, respectivamente, estos documentales fechos por autores asturianos.

Entrambes otres producciones con marca del país proyectáronse con relieve dientro’l Festival como “Internacionales en Palestina” d’Alberto Arce y María Moreno, asina como “Al Hamam” de Zouahuir El Hairan, Isaac Lupiáñez y Oscar Vega. El cortometraxe “Sístole-diástole” y el mediometraxe “20-N, la memoria inquieta” de Belarmino García y “Cuba Libre” de Rai García, completaron la presencia asturiana nel festival que tuvo amás el so espaciu pa los nuevos autores nel concursu de cortometraxes del Día d’Asturies y nos dos proyectos d’autores mozos premiaos en “No nos cuentes películas, hazlas”.

El realizador Francisco Martínez Pelaez remató esti fin de selmana’l rodaxe de ‘Bisarmes’, un cortu filmáu en decoraos naturales nel conceyu de Carreño y que cuenta, ente otres, cola interpretación del actor Txema Blasco. La cinta, producida por Pablo A. Quiroga, narra una hestoria de terror sobrenatural ambientada en dalgun llugar de l’Asturies rural.

Txema Blasco, un actor que cuenta nel so currículu coles sos intervenciones en películes como la recién ‘Obaba’ de Montxo Armendáriz, ‘Carne de Gallina’ de Javier Maqua o ‘Tierra’ y ‘Vacas’ de Julio Medem, ta acompañáu nesti cortometraxe por Marisa Vallejo, Fernando Marrot y Pelayo Prendes. La obra de Franciso Martínez Peláez cuenta con una subvención de la COnseyería de Cultura y otra del Conceyu de Carreño, y tres el remate del rodaxe va entamar un procesu de posprodución hasta’l mes de febreru de 2006 nel que tien previsto escomenzar el so camín per diferentes festivales de cortometraxes.

Esti domingu, 27 de payares, a les cinco la tarde, estrenase nos multicines Centro (sala 2) de Xixón, dientro de les actividaes del 43º Festival Internacional de Cine, el documental de Ramón Lluis Bande “El Paisano, un retratu colectivu”, abriendo asina los actos d’homenaxe pol decimu aniversariu de la muerte del líder comunista. A la presentación van asistir dirixintes d’Izquierda Xunida y del Partíu Comunista d’Asturies, como Gaspar Llamazares y Jesús Iglesias.

El 21 de febreru va facer diez años de la muerte d’Horacio García Inguanzo, históricu líder comunista. Con tal ocasión, la Fundación que lleva’l so nome y la Conseyería de Cultura del Principáu d’Asturies coproducen un documental, rodáu pol escritor y realizador Ramón Lluis Bande, que s’estrena esti domingu, a les cinco la tarde, nos multicines Centro (sala 2) de Xixón, valiendo como arranque pa los homenaxes qu’a lo llargo del añu qu’entra se van facer en memoria d’El Paisano.

El documental recupera la so figura a travies de les persones que lu trataron, como ye’l casu de Senen ‘el de Polio’, ‘El Polesu’, ‘El Portu’, ‘Gelín’y ‘Otones’, ente otros. Al tiempu que esplica la historia del comunismu asturianu nel franquismu y la transición a la democracia.

Les VI Xornaes Culturales Jovetense, entamaes poles Mocedaes Socialistes d’Uvieu, continúen cola segunda sesión de cine esta tarde, a partir de les ocho, na sala La Santa Sebe de la cai Altamirano, cola proyección d’”El septimo sello”, d’Ingmar Bergman, rodada en 1956.

Ingmar Bergman, el realizador suecu a quien se-y deben títulos como “Sonrisas de una noche de verano”, “Fresas salvajes” o “Fanny y Alexander”, rodó en 1956 esta cinta que cunta la historia d’Antonius Blovk, que depues de diez años de guerres nes Cruzaes per Tierra Santa, torna’l so país y cola esperanza de tener respuestes sobre la vida y la esistencia de dios, reta a la Muerte a una partida d’axedrez.

Les Xornaes Culturales Jovetense acaben esti vienres a les ocho la tarde nel chigre La Calleja de la Ciega col conciertu de los grupos Esmusssein, Bad to worse y Ulan Bator.

La Conceyalía de Cultura del Ayuntamientu Mieres presentó ayeri xunta’l realizador Jorge Rivero, organizador del certame, les bases de presentación del VI Festival Nacional de Cortos CORTOMIERES, que va tener llugar ente los díes 31 de xineru y 4 de febreru de 2006.

Depues de dos años ensin convocase, l’Ayuntamientu de Mieres vuelve entamar el Festival Nacional de Cortos CORTOMIERES, organizáu pol realizador Jorge Rivero, premiáu va poco nel prestixosu Festival Madrid Imagen por “Nenyure”, qu’espera volver batir los records de participación d’ediciones anteriores consiguiendo trayer a concursu unes 400 cintes, ente cortos, vidios y vidioclips.

Les proyecciones de los cortos van poder vese nel salón Cajastur de Mieres ente los díes 31 de xineru y 4 de febreru de 2006. Los premios van ente los 4000 euros al meyor cortu en sección oficial, hasta los 1000 euros pa los meyores vidios. El premiu especial del públicu ye de 1800 euros.

El prósimu vienres 18 de payares, a partir de les 7,30 la tarde, l’Ayuntamientu de Llanes va ufiertar nel Salón Parroquial de H.ontoria la proyección pública de los documentales más significativos de la cinematografía llanisca. Empieza d’esta manera una nueva fase del programa d’exhibición y divulgación de les históriques filmaciones puestu en marcha pola Conceyalía de Cultura al travies de la Casa Municipal de Cultura de Llanes.

Hasta agora, y dende’l pasáu mes de febreru, echáronse les películes nes cases conceyu de Po, Andrín, Cue, Valmori, Parres y San Roque. Mentes que nes prósimes selmanes va facese otro tanto nes de Barru y Pendueles.

Les películes escoyíes pa cada sesión son:

– “La llegada del tren” (1905, 5 minutos de duración), un documental rodáu pocu tiempu depues de la llegada del ferrocarril a Llanes.
– “Llanes 1917” (19 minutos), película restaurada en 1997. Rodóse en Llanes en setiembre de 1917, nes fiestes de la Virxe de la Guía pola productora francesa “Pathe Frères”.
– “Match accidentado” (1928, 2 minutos), cortu publicitariu producíu pol industrial llaniscu Ceferino Ballesteros. Ye una de les primeres producciones d’animación que se conocen n’Asturies.
– “Romería asturiana” (1942, 15 minutos), cinta na que se recueyen escenes de la fiesta de San Roque en Llanes.

Las proyección en H.ontoria va ser presentada y comentada por Jose Antonio Anca, locutor de la emisora “Antena Norte”.

El ciclu Llendes del Festival de Cine de Xixón va acoyer la estrena del nuevu llargometraxe de Ramón Lluis Bande: “El Paisano: retratu colectivu”, un dibuxu del hestóricu dirixente comunista asturianu Horacio Fernández Inguanzo fechu colos trazos de la so alcordanza en catorce testimonios directos d’otres tantes persones que lu conocieron.

El realizador xixonés desplica el doble retu que plantea la película que va estrenase nel Festival de Xixón: “per un llau tratábase de siguir afondando na memoria colectiva d’Asturies al través de l’alcordanza dexada en delles persones por una figura esencial de la llucha comunista nel nuestru país y per otru nel propiu llinguaxe documental como una nueva vuelta de tuerca d’una deconstrución”. Asitiada como parte de la serie hestórica entamada con “Estratexa”, sobre la guerrilla asturiana y en “De Lafuente”, sobre la revolucionaria Aida De Lafuente, la película sobre Horacio El Paisano quier “dir dibuxando’l rostru colectivu de la memoria d’un país”, en palabres del so autor y failo al través del testimoniu directu de catorce persones que falen de los sos recuerdos personales del lluchador comunista asturianu: “quise dexar namás los testimonios ensin tentar xerarquizar los que puedan ser más importantes de los meramente anecdóticos y qu’al través d’eses alcordances se dibuxare la figura d’Horacio”.

El realizador xixonés trabaya anguaño nun nuevu proyectu sobre la memoria colectiva asturiana, un documental sobre la cantadora de tonada Diamantina Rodríguez, nel que van participar intérpretes contemporánees como Anabel Santiago y la propia Diamantina.

Talo sucediera nos sos anteriores filmes sobre la memoria hestórica d’Asturies tamién nesti casu hai una canción que complementa’l documental. El tema que Víctor Manuel dedicó a Horacio apaez na parte final de la película cola única imaxe del dirixente comunista saludando al cantante nun actu públicu. El cantante mierense cedió de baldre’l cantar pal llargometraxe y participó na producción del tema: “tien raigaños na música popular del país como’l tema de Manta Ray n’Estratexa y el romance d’Aide en De La Fuente, nesti casu una canción con autor pero que forma tamién ya parte de la memoria colectiva”.

El realizador xixonés trabaya anguaño nun nuevu proyectu sobre la memoria colectiva asturiana, un documental sobre la cantadora de tonada Diamantina Rodríguez, nel que van participar intérpretes contemporánees como Anabel Santiago y la propia Diamantina.

La estrena de “El Paisanu: retratu colectivu” va facese dientro’l ciclu Llendes del Festival de Cine de Xixón el domingu 27 de payares a les 17.00 hores.

El documental “Cambia de vida: el viaje del Xixón Sound” de los realizadores Elena Medina y José Antonio Fernández va estrenase nel Festival de Cine de Xixón dientro del ciclu Desorden y Conciertu. El movimientu punk y el líder de los Clash Joe Strummer, el folklor del narcotráficu mexicanu, los New York Dolls y la brasileira Maria Betanha van protagonizar el restu de la filmografia proyectada nel ciclu musical del certame.

La película de Medina y Fernández sobre lo que dio de sí la escena independiente playa a finales de la década de los noventa va ser ensin dulda acoyida con abondo interés na que foi Meca musical del estáu y nel documental repásase’l papelu desenvueltu nesti diversu movimientu por grupos como Manta Ray, Doctor Explosion o Australian Blonde.

En Desorden y Conciertu va haber ocasión de ver otros ocho filmes como “Lets Rock Again”, dirixíu por Dick Rude, que tien como protagonista a Joe Strummer, fundador y solista de los Clash. El largometraxe recueye la so última xira por Estaos Uníos y Xapón al frente de Los Mescaleros, banda cola que terminó la so carrera. “Al otro lado”, un documental de Natalia Almada, afonda nel narco-corrido, un estilu de música que mueve millones na industria discográfica de los Estaos Uníos, en dura competencia col rap.

Los “New York Dolls” tamién tienen el so sitiu nesti ciclu. Embaxo la dirección de Greg Whiteley, y tres décades después del so apoxéu, reúnense los componentes que tovía viven. No que respecta a “Punk: Attitude”, repasa de la mano de Don Letts, veteranu de la escena punk y reggae del Reinu Uníu (y que va pinchar nuna de les fiestes del Festival), la historia del movimientu musical más furiosu de la historia y les sos consecuencies como revulsivu social. Intervienen ente otros Six Pistols, Ramones, Sonic Youth, Dead Kennedys, The Stooges, Suicide y The Damned.