Cine

Los directores Javier Fesser e Igor Legarreta y Emilio Pérez, por “Binta” y “El Gran Zambini”, respectivamente, fueron los ganadores absolutos del Festival CortoMieres 2006. El restu de premios fueron pal videoclip “Lory meyers” por ‘Tokyo ya no nos quiere’ y el video de cine, “Conejo al ajillo”, del peruanu Pablo Valiente.

El certame mierense remató con un importante ésitu de públicu y una programación abierta a otres espresiones creatives como’l hip-hop y la música de baile. Nel xuráu del concursu tuvieron presentes xente del mundu del cine independiente como’l productor José Díaz España, el director Manuel Cuenca (La Flaqueza del bolchevique) o Zoe Berriatúa.

Esti martes 7 escomienza un nuevu miniciclu cinematográficu organizáu pola Obra Social y Cultural de Caxastur embaxo’l títulu de ‘Latitudes Emocionales’. Seis películes de diverses procedencies integren esta entrega dedicada a amosar producciones que nun llegaron estrenase nes sales comerciales del nuestru país.

Los títulos que se van poder ver nos centros culturales de la Caxa en Llangréu, Mieres, Xixón y Uviéu son “El niño”(Fr.Belx.2005), “Tú, yo y todos los demás”(USA, 2005), “El sabor de la sandía”(China, Fr.2005), “Election”(China, 2005), “Gente de Roma”(It.2005) y “La escurridiza o cómo esquivar el amor”(Francia, 2005).

Latitudes Emocionales

El festival de cortometraxes Cortomieres escomienza esti martes 31 con un total de trenta y cinco películes a competición na sección oficial y una docena de video-clips pal concursu nesta modalidá. Coordinao pol realizador Jorge Rivero, el certame de la villa’l Camín, afítase un añu más como cita imprescindible del cine en formatu breve de tol estáu.

Amás de la sección oficial de concursu, Cortomieres ufierta na edición de 2006, un apartáu especia pal documental y dellos pases especiales, ún d’ellos dedicáu a amosar la produccion de realizadores mozos asturianos en colaboración cola Asociación de Realizadores d’Asturies (ARDA). En xunto tres secciones oficiales: cine, video y video-clips; una sección paralela nomada “Cortos asgaya”; otra sección de documentales y pases especiales de películes como “Jaime Herrero”, “Nenyure”, “El despropósito” y “La buena letra”. El chigre L’Abellugu va ser l’escenariu de la proyección de dellos pases especiales.

Más de cuatrocientos cortometraxes recibió la organización de Cortomieres pa la edición d’esti añu, una cifra superior a la d’anteriores ediciones y qu’amuesa l’interés que despierta’l festival en tol estáu. El lema d’esti Cortomieres 2006: “Experiencias intensas en formato corto” y el respaldu del Gobiernu’l Principáu, la Universidá d’Uviéu, Caxastur y el semanariu Les Noticies.

Los pases de les películes programaes empiecen tolos díes hasta’l prósimu 5 de febreru a les 18.00 hores nel salón Caxastur de Mieres con entrada llibre y de baldre.

Cortomieres

L’Atenéu Obreru de Xixón escomienza esti llunes 30 les actividaes de la conmemoranza del so 125 aniversariu con un ciclu de cine dedicáu a Iciar Bollain. El ciclu repasa tola obra cinematográfica de la realizadora de “Hola ¿estás sola?”, incluyendo los sos cortometraxes.

El Teatru Xovellanos ye’l sitiu escoyíu pa l’amuesa de les proyecciones de la obra de Bollain, que van escomenzar toes a les 20.30 de la tarde. Esti llunes 30 van ponese el cortometraxe “Baja corazón”y “Hola ¿estás sola?”; el martes 31 los títulos que se proyecten son “Los amigos del muerto” y “Flores del otro mundo”. El ciclu remata el prósimu 1 de febreru col cortometraxe “Amores que matan” y el llargometraxe “Te doy mis ojos”.

Los actos del 125 aniversariu del Atenéu incluyen tamién entrambes esposiciones que van celebrase a lo llargo del añu, una sobre la hestoria de la institución y otra con caricatures del dibuxante republicanu Emilio Vera, feches mientres taba presu na Cárcel de Coto tres la toma de Xixón poles tropes de Franco. Conferencies y actividaes relacionaes col axedrez van completar el programa de la conmemoranza del Atenéu Obreru.

La película “Nenyure” del realizador mierense Jorge Rivero puede algamar esti domingu 29 pela nueche na ceremonia d’entrega de los Goya el premiu al meyor cortometraxe documental. El filme de Rivero ye una de les cuatro qu’opten a esti premiu del que se va desvelar el nome del ganador na gala televisada de la fiesta añal del cine español.

“Nenyure” estrenóse nel Festival de Cine de Xixón y viaxó dende entós per dellos otros certámenes con una bultable acoyida de crítica y públicu. Rodada n’inglés con sotítulos, la cinta del realizador mierense retrata los espacios abstractos y concretos d’una barriada obrera de la cuenca talo s’amuesa anguaño, en plenu fin de la industria del carbón y convertida nuna polvorienta sucesión repetía de nichos, un cementeriu con ventanes y seres inda vivos.

Jorge Rivero pertenez a una xeneración de nuevos realizadores asturianos que tenten definir una triba de cine centrada na realidá y nel retratu despiadáu del entornu ambiental de l’Asturies actual. El so últimu trabayu fue la filmación del poema “Ente nós” de Vanessa Gutiérrez dientro’l proyectu colectivu “Cinco poemes”.Ye autor tamién del documental musical “Pasamientu”, sobre’l discu del mesmu títulu del colectivu etnográficu Muyeres.

El presidente del Principáu Vicente Álvarez Areces defendió esti martes 10 en Madrid la puesta en marcha de la televisión autonómica como emburrión al sector audiovisual n’Asturies. El xefe del executivu afirmó que nun futuru cercanu la nuestra comunidá va abellugar un centru de formación ya imaxen “de los meyores d’España”.

El presidente asturianu fexo estes declaraciones na visita que fizo al rodaxe de la película “Vete de mi” del director madrilanu Víctor García León, un largometraxe que co-financia el Principáu dientro’l proyectu ‘Primeras tomas’. Areces afirmó que “el sector audiovisual tien n’Asturies un nuevu puxu cola aparición de la Radiotelevisión Pública del Principáu que va suponer una motivación pa que esista un campu audiovisual mui ampliu pa los profesionales del sector”.

En palabres del responsable del executivu autonómicu:”Asturies va a ser un gran plató y un gran sitiu pa la eshibición de rodaxes que, como ésti, realícense n’otres zones” y relacionó la puesta en marcha del nuevu centru d’arte de La Llaboral integráu na sé de la radiotelevisión autonómica con esta política audiovisual anunciando que “nel campu de la formación tá n’obres el que va ser un de los meyores centros de formación n’imaxen y soníu d’España” y que “alrodiu d’esti ente de comunicación tamos taciendo, de forma descentralizada, que toa Asturies participe d’eses posibilidades, que pa los xóvenes actores y realizadores ye una gran oportunidá de futuru”.

Álvarez Areces sofitó la financiación pol Principáu del proyectu ‘Primeras tomas’ del productor Juan Gona: “apoyámoslo con munchu gustu porque ye, en cierta midida, la nuestra obligación,y ye una oportunidá pa xóvenes realizadores y actores”. Según Areces: “Asturies ofrez siempre escenarios privilexaos non namás pa realizar películes sinón tamién pa proyectales”.

Nel proyectu ‘Primeras tomas’ el gobiernu del Principáu cofinancia la producción de tres largometraxes, el primeru esti de García León qu’escomenzó rodase en Madrid y después van ser los largometraxes “Tesoro mío” de Teresa Marcos y “Alegría” de Lucinda Torre.

La cadena estatal Telecinco estrenó esti martes 3 la serie dirixida pol cineasta arxentinu Juan José Campanella ‘Vientos de agua’, una producción rodada en parte n’Asturies y na que dellos de los sos personaxes aparecen falando na nuestra llingua y con sotítulos en castellano. La serie cuenta una hestoria d’emigrantes d’ida y vuelta.

El primer capítulu de ‘Vientos de agua’ fexo escomenzar la hestoria nun llugar de la cuenca minera asturiana na conflictiva década de los años trenta y onde’l protagonista interpretáu por Ernesto Alterio, vese obligáu a esiliase después de la revolución d’ochobre del 34, garrando’l camín tresatlánticu dica Arxentina. Tanto Alterio como los actores y actrices qu’interpretaben a la xente del so entornu aparecieron na serie falando n’asturiano y con sotitulos en castellano.

La serie de Campanella ta rodada en parte en dellos llugares del vai del Nalón, en Bonos Aires y en Madrid. El primer capítulu amosó l’empiezu de la narración n’Asturies col viaxe forzáu del protagonista; un fíu d’esti emigrante va garrar años después el camín de vuelta dica Europa.

La conceyalía de Cultura del Ayuntamientu d’Uviéu organiza un ciclu cinematográficu dedicáu a repasar les producciones más significatives del xéneru del oeste de la factoría Fox dende 1930 hasta 1969. Les proyecciones van entamase tolos llunes a les 20.30 dende esti mes de xineru hasta mayu nel Teatru Filarmónica.

Títulos como ‘La gran jornada (1930), ‘Corazones indomables’ (1939), ‘Río sin retorno (1954) o ‘Dos hombres y un destino’ (1969) van poder contemplase a lo llargo de los prósimos meses nel ciclu dedicáu a los títulos cimeros del western producíos pola Fox. La entrada a les proyecciones ye de baldre.

El proyectu cultural entamáu pola Fundación Príncipe d’Asturies en colaboración col realizador Woody Allen col oxetivu de difundir el cine d’autor sigue alantre, según declararon a diversos medios asturianos fontes de la institución que preside Graciano García. El Film Center, sicasí, ye inda una iniciativa sobre la que poco se sabe, a nun ser que va tener la so sé n’Uviéu y según caltién la FPA, que’l so empiezu va ser realidá l’añu qu’entra.

La Fundación informó a dellos medios asturianos del alcuentru calteníu ente representantes de la institución y el cineasta Woody Allen pa perfilar el Film Center anunciáu va unos meses. El proyectu taría ya bien adelantráu, según les fontes de la FPA, y el niuyorquín aportara tamién les sos propies idees a la iniciativa nuna xinta celebrada n’Uviéu con representantes de la institución asturiana.

Alrodiu de los oxetivos y conteníos d’esti foru pa la difusión del cine non comercial ye bien poco lo qu’inda se sabe. Paez ser que les sos actividaes centraríense n’organizar ciclos de proyecciones y un eventu añal cola participación de dalguna estrella internacional del mundu del cine. La so sé va ser Uviéu y les sos actividaes espardiríense a otros llugares d’Asturies. L’asuntu de la financiación del futuru Film Center ye otru de los asuntos sobre’l que nun afondaron tovía los responsables de la Fundación Príncipe d’Asturies.

El segundu Festival de Cine Asturianu fairáse l’añu prósimu n’Uviéu nel marcu del Teatru Filarmónica, los díes 10 y 11 d’Abril del 2006 siguiendo’l camín entamáu el pasáu 27 d’abril cuando se cellebró en Madrid el primer centenariu del cine asturianu. El Festival premia los meyores curtiometraxes asturianos y documentales amás de facer un homenaxe honoríficu a una figura cabezalera del cine astur.

Los premios d’esti festival, empobináu por un grupu d’asturianos residentes en Madrid a la cabeza de los cualos ta’l promotor cultural Xavier Vilareyo, consisten en dellos fruteros de cristal en recuerdu de la primer película asturiana “El robo de fruta” de 1905. El palmarés y los ganadores d’esti 2u Festival recibirán un homenaxe posterior nel Atenéu de Madrid. La Organización pretende que los ganadores puedan facer de xuraos na medida de lo posible nes ediciones posteriores. Esti añu premiaráse per primer vegada a los documentales que yá cunten con abonda tradición n’Asturies pero con mui pocu reconocimientu técnicu y artísticu. El Festival cuntará con una Gala d’Entamu onde se proyectarán tolos trabayos seleccionaos ante los xuraos y una Gala de Pieslle onde se fairán los homenaxes a los ganadores y a los premiaos, amás preténdese ser l’escaparate onde s’amuesen estrenos en primicia de los realizadores asturianos.