Suburbia presentó n’Uviéu “Vía de Serviciu”

Suburbia Ediciones fizo esti martes 30 d’Ochobre la presentación de Vía de serviciu na Casa Posafuelles d’ Uviéu, cola participación de Pablo Texón y Xurde Fernández, que dieron llectura a los dos cuentos qu’espublizaren nesta antoloxía que fai escoyeta de la narrativa asturiana última con catorce cuentos d’escritores n’asturianu ñacíos depués de 1975. El llibru ta yá a la venta dende’l pasáu mes de setiembre.

La presentación abellugóse nel chigre de la Xunta Pola Defensa de la Llingua, na Cai Vega La Cuesta d’Uviéu, corriendo al cargu de Silvia Junco que presentó a la editorial y a los dos autores presentes ,y cuntando tamién con públicu abondo nuna xornada con munches cites alrodiu de la lliteratura asturiana.

Na estela d’otres publicaciones como les revistes Formientu o Reciella Malory, la recién ñacida Suburbia Ediciones sacó en setiembre a la venta’l so primer llibru, una antoloxía que fai escoyeta de la narrativa asturiana última con catorce cuentos d’escritores n’asturianu ñacíos depués de 1975, ‘Vía de Serviciu’.

El llibru inclúi un prólogu del escritor José Luis Piquero nel que espresa que “los autores nuevos preséntense como individualidaes, desprovistos d’una «marca xeneracional» más alló del so billingüismu”. Ente los escritores presentes tán dalgunos yá conocíos pol públicu llector, como Pablo Rodíguez Medina, Quique Faes, Vanessa Gutiérrez, Nicolás V. Bardio y otros que malapenes tienen nada espublizao, como ye’l casu de Carlos Pitcairn o Ecequiel Cala.