SUATEA refuga’l currículu d’ESO pola inquietú que xenera

La publicación del borrador currículu d’ESO y el so unviu a los centros educativos y a los sindicatos per corréu electrónicu amuesa sigún SUATEA “otra vuelta al descaru de la Conseyería respective a un tema que ta xenerando inquietú ente la comunidá educativa”. Pal sindicatu, “el procesu nun tuvo tresparencia y la comunidá educativa quedó al marxe del debate sobre la implantación de la LOMCE en secundaria”. Recuerden que pal próximu cursu entraríen en vigor el restu de cursos de primaria -yá empezó a ponese en 1º, 3º y 6º de primaria- y en 1º 3º d’ESO y 1º de Bachilleratu.

La Conseyería d’Educación, pesie a les sos proclames anti-LOMCE, presentó un borrador de currículu qu’aplica casi mecánicamente lo plantegao en dicha Ley. Esta aplicación implica pa SUATEA “trastocar la organización de los centros educativos, modificar les programaciones docentes, cambiar la organización de los diferentes cursos, cola lóxica medría de la xera burocrática que vendríen a empiorar enforma les condiciones llaborales del profesoráu, que yá anguaño ta saturáu dafechu pola obligación de destinar bona parte del so tiempu a cuestiones que nun tienen un ris que ver cola xera docente”.

Ente les midíes que la Conseyería quier aplicar ensin intentar siquiera minimizar l’impactu de la LOMCE tán “el segregar al alumnáu de magar empiecen 1º de la ESO, colos Programes de Meyora del Aprendimientu y el Rendimientu (sic), afitar itinerarios y una segregación precoz del alumnáu, empobinalu pa víes educatives ensin futuru o implantar reválides que pretenden peñeralu, o poner estudios de relixón con carácter evaluable”.

Pal sindicatu “la mocedá asturiana va ser la que sufra esta falta de voluntá política de tornar los efectos d’una Llei que posiblemente seya derogada en menos d’un añu. Pero’l dañu, de nun se paralizar la so aplicación, va ser irreparable”.

Nestos momentos de vísperes electorales qu’auguren cambios sustanciales nel panorama políticu asturianu y estatal, SUATEA nun ye a entender que la Conseyería opte “pola sumisión total a les polítiques marcaes pol ministru Wert. Nesi sentíu, SUATEA desixe a la Conseyería que paralice l’aplicación del currículu d’Enseñanza Secundaria Obligatoria y Bachilleratu, que del so currículu por cierto sigue ensin sabese nada”.