Portada Educación SUATEA posicionase escontra la Lley Mordaza

SUATEA posicionase escontra la Lley Mordaza

by asturnet

Depués de que’l Congresu de los Diputaos aprebara’l xueves 11 pasáu la Llei Orgánica de Seguridá Ciudadana, colos únicos votos a favor del PP, SUATEA vieno acabante de manifestase escontra d’ella por mor de les implicaciones que presenta tanto na estaya social como educativa y atalanta que “ye un nuevu golpe más col mayu parlamentariu diseñáu a medida col envís d’achatar les protestes sociales y sindicales, los movimientos ciudadanos, les marees en defensa de los servicios públicos y toles espresiones de protesta frente a les polítiques involucionistes y de recortes sociales y llaborales que tamos sofriendo”.

Nuna nota de prensa asoleyada esti día, SUATEA diz qu’esta Llei “forma parte d’un procesu d’involución que tamos viviendo col Gobiernu d’anguao, cola vuelta a un Estáu autoritariu envueltu en democracia. Nun cae embaxo que se conoza col alcuñu de “Llei Mordaza”. Ye una llexislación inspirada na Llei d’Orde Públicu de 1959 impuesta pola dictadura franquista, ataca directamente a les llibertaes, a los derechos de reunión y de manifestación. Pon en manes del Ministeriu d’Interior lo qu’hasta agora yera competencia de la Xusticia. Quieren con ello blincar sobre les derrotes xudiciales que lleven acollechando les “autoridaes polítiques” por cuenta de les denuncies inxustificaes por “desórdenes” o “desacatos” contra manifestantes o movimientos sociales y sindicales”.

Pal sindicatu asturianu “ye una Llei fecha a medida p’atacar y reprimir l’actividá de los movimientos ciudadanos, sociales y sindicales que, con DIGNIDÁ, lluchamos y reclamamos trabayu, vivienda, defendemos los servicios públicos (educación, sanidá, tresporte…), manifestámosmos contra la corrupción y la impunidá. Frente a ello, faen esta Llei que reprime con dureza estes protestes pola vía de la fuercia o de fuertes multes: Consideren mui grave, con multes de 30.000 a 600.000 €, ente otres les siguientes: Celebrar manifestaciones alrededor del Congresu, del Senáu o los Parlamentos. Realizar manifestaciones o concentraciones non comunicaes n’infraestructures básiques o alrededor d’empreses que sirven servicios públicos. Consideren grave, con multes de 601 a 30.000 €, ente otres les siguientes: Impedir un desahuciu. Grabar actuaciones policiales y difundiles. Negase a disolver una manifestación cuando lo requiera l’autoridá Desobedecer a un axente policial o negase a enseñar el Documentu d’Identidá. Interrumpir con protestes actos o espectáculos públicos. Consideren leve, con multes de 100 a 600 €, ente otres les siguientes: Ocupaciones o acampaes na vía pública. Colocar pancartes, pegatines o facer pintaes n’edificios públicos. Insultar a cuerpos policiales. Llevar caretes o pancartes que denigren la imaxe de les autoridaes.

Esta Llei afecta incluso a la Llei d’Estranxería, llegalizando les “devoluciones en caliente” que priven a los migrantes del derechu al asilo y elimina les sos garantíes reconocíes pola llexislación internacional.

Tamién te podria gustar