SUATEA desixe a l’Alministración asturiana que faga cumplir les resoluciones del Conseyu Escolar del Principáu

SUATEA desixe a l’Alministración asturiana que faga cumplir les resoluciones del Conseyu Escolar del Principáu, sigún apautó na sesión d’avientu del 2013 y concretamente les 4 referentes a la llingua asturiana, claves nun nuevu contestu como ye la LOMCE, y qu’entamen pola inclusión de l’asignatura “Llingua y Lliteratura Asturiana” dientro del currículu de les enseñances non universitaries.

El Conseyu Escolar del Principáu d’Asturies celebró l’otru 4 d’avientu de 2013 una sesión ordinaria onde s’aprobaron por unanimidá cuatro resoluciones relatives a la llingua asturiana. SUATEA entiende qu’estes resoluciones son positives pa la normalización del idioma nel ámbitu educativu y encamienta a l’Alministración asturiana a desendolcales y non a dexales pa prau como vien siendo vezu dende cuantayá.

Les resoluciones aprobaes, avalaes toes elles pola lexislación vixente, resúmense en:

a) La inclusión de l’asignatura “Llingua y Lliteratura Asturiana” dientro del currículu de les enseñances non universitaries en toles sos etapes, asegurando la non discriminación de los alumnos que la escueyan.

b) El reconocimientu esplícitu, dientro del Decretu d’Especialidaes del profesoráu d’Educación Primaria y Secundaria, de la especialidá de Llingua Asturiana, de forma que puean convocase concursu-oposición y de tresllaos por tala especialidá.

c) Que l’Alministración Educativa garantice la ufierta de l’asignatura Llingua Asturiana y Lliteratura en tolos centros d’Asturies (públicos y privaos), con calter voluntariu pal alumnáu y siendo la Conseyería d’Educación la encargada de velar pol cumplimientu estrictu d’esta norma.

d) Aprovechar les ventayes curriculares del enseñu del asturianu (incluyendo la so contribución al dominiu de les Competencies Básiques), de forma que’l so deprendimientu seya posible pa la xeneralidá del alumnáu que cursa enseñances non universitaries nel sistema educativu asturianu.

En realidá, estes resoluciones nun son otro que’l cumplimientu de la lexislación vixente, marcada pola Llei d’Usu de 1998, y polo tanto ye obligación de l’Alministración desendolcales. La murnia realidá ye que dende l’aprobación de la llei les estorbises puestes polos diferentes gobiernos pa la so aplicación faen posible que quince años depués instituciones como’l Conseyu Escolar del Principáu tengan que recorda-y a la Conseyería d’Educación cuála ye –tovía- la xera pendiente.

Pa SUATEA ye inaceptable qu’a más de quince años de l’aprobación de la Llei d’Usu, qu’inclúi la obligatoriedá de la ufierta en toles etapes educatives, ésta tovía nun se dea, o que nun exista la especialidá docente, clave pa la dignificación de l’asignatura.

Col nuevu marcu llegal qu’abre l’aprobación de la LOMCE, qu’obliga a rediseñar el currículu de toles etapes educatives, yá ye hora de que la Conseyería d’Educación asuma la so responsabilidá, de la que se vien safando cuantayá, pa encarar la dignificación de la Llingua Asturiana y del Gallego-Asturiano nel sistema educativu. Les resoluciones aprobaes pol Conseyu Escolar del Principáu son un toque d’atención nesa dirección que l’Alministración fadría bien en respetar y cumplir.