SUATEA denuncia que se-yos niega estudiar gallego-asturianu a 34 neños

El sindicatu SUATEA denuncia la esistencia d’un total de trenta y cuatro alunmos nes escueles de Bual (19 persones) y Grandas de Salime (15 persones) que lleven lo que va de cursu ensin clases de gallego-asturianu magar tener la voluntá de recibiles. Estes escueles, espliquen “hai unos años, tuvieron profesoráu atendiendo esta necesidá, pero esa atención condicionóse a la disponibilidá horaria del profesoráu interino o de profesoráu “especialista” definitivu del centru nel casu de Bual”. Pa SUATEA “l’actual alministración sigue’l camín de l’anterior, al so rebufu y cola mesma inercia, supeditando los derechos fundamentales del alumnáu a criterios de calter organizativo-económico-alministrativos”.

Dende’l sindicatu del enseñu recuerden “una vegada más a los respondables de la Conseyería d’Educación” que la Llei d’Usu y Promoción de la nuesa llingua tocántenes al sistema educativu nel artículu 10 diz : “Nel exerciciu de les sos competencies, el Principáu d’Asturies va garantizar la enseñanza del bable/asturiano en tolos niveles y graos, respetando sicasí, la voluntariedá del so deprendimientu”.

Recuerden tamién al Gobiernu d’Asturies “que’l presidente y distintos responsables declararon públicamente la so intención d’aplicar estrictamente y en tolos ámbitos los mandaos de la llei, amás de meyorala desarrollándola”.

SUATEA vien, dende hai más de 15 díes, denunciando énte tolos responsables de la Conseyería d’Educación esta situación de discriminación del alumnáu de Grandas y Bual y desixéndo-y la contratación del profesoráu necesario p’atender esta necesidá educativa, ente los qu’ellos “comprometiéronse, una vez revisaos los datos de demanda d’escolazación, a contratar al profesoráu necesariu”. Depués de les dos últimes convocatories de profesoráu interino (7/2/2012 y 14/2/2012), denuncien dende SUATEA, “siguen ensin sacar la plaza y ello pesie a les nuestres esixencies y al conocimientu que tienen de los datos dende primeros de cursu”.

SUATEA, como sindicatu mayoritariu na enseñanza n’Asturies, esixe a l’alministración “el cumplimientu de la llegalidá vixente; denuncia la situación de discriminación del alumnáu de Bual y Grandas; esixe la contratación del profesoráu necesario p’atender la so demanda d’escolarización; anima a la ciudadanía asturiano en xeneral y particularmente a les madres y padres a denunciar estes situaciones de discriminación; y anuncia qu’entamará toes aquelles acciones xudiciales y movilizadores pa facer respetar los derechos llingüísticos d’estos rapacinos y rapacines”.