SUATEA denuncia otru recorte de plantiyes

El sindicatu de la enseñanza SUATEA vieno acabante otra vuelta de denunciar esti martes que la Conseyería “actúa de forma inaceptable apurriendo a los centros educativos la propuesta de plantiyes pal próximu cursu con namás 48 hores pa presentar alegaciones a les mesmes. D’esta forma les direcciones de los centros atópense ensin capacidá de reacción pa estudiar con detalle les necesidaes del so centru y alegar correctamente a la propuesta de l’Alministración”.

Estes son les formes qu’usa l’Alministración nos últimos años pa esti y otros munchos procesos, sigún denuncia SUATEA, polo que “un añu más, tamos falando de decenes de puestos de trabayu destruyíos por un Gobiernu que fala de criación d’empleu de calidá mientres achuquina tolos años cientos de puestos de trabayu estables en distintos ámbitos de l’Alministración Asturiana”.

Esta ye la doble moral del partíu que gobierna Asturies según el sindicatu: “d’un llau dizse defensor del enseñu públicu y d’otru dedícase a esmantelalu. Cursu tres cursu destrúin empléu en daqué tan fundamental pal desenrrollu d’un país como ye la educación pública”.

Nuna nota de prensa asoleyada esti día, SUATEA presenta un cuadru nel que se ven los 87 puestos “barríos” de les plantiyes, apuntando que “namás hai un centru n’Asturies nel que se cría una plaza, concretamente d’inglés (esta ye la escepción que confirma la riegla de los recortes) y esto pesie a qu’hubo exactamente 317 xubilaciones l’otru cursu”. El recorte denunciáu ye de 38 puestos en primaria y 49 en secundaria.

SUATEA denuncia tamién que “nestos meses veremos a Javier Fernández faciendo campaña electoral y contándonos les sos propuestes sobre empléu de calidá, prestaciones sociales, meyoras en sanidá, n’educación y un llargu etc. Seyamos conscientes de que ye too puru cuentu. Asturies ye la sesta comunidá que más baxó’l so gastu n’Educación ente 2009 y 2012, siendo la reducción d’un 15%, tres puntos más que la media estatal”.

Por mor d’ello, dende SUATEA desixen a la Conseyera d’Educación “que nun recorte otra vuelta les plantiyes docentes de los centros educativos asturianos que yá sufrieron un recorte brutal n’años anteriores. Qu’atienda les alegaciones plantegaes dende los centros educativos que son los realmente conocedores de les sos verdaderes necesidaes, argumentu que la Conseyería alega mui a menudo cuando y pa lo que-y interesa”.