SUATEA denuncia la manera na que se tán cubriendo les places d’asturianu en Primaria

El sindicatu SUATEA amuésase esmolecíu pola manera na que la Conseyería d’Educación ta cubriendo les places de llingua asturiana en Primaria. Fontes de la organización sindical manifestaron a esti mediu que’l sistema emplegáu anguañu pola administración educativa propicia’l que nun cubran les vacantes los candidatos cola másima puntuación como ocurre nel restu de les especialidaes.

La situación denunciada por SUATEA espárdese a otros niveles d’enseñanza nel casu de l’asignatura d’asturianu. La constatación d’esta situación que’l sindicatu califica de “inxusta” vieno peles quexes espresaes en feches recientes por docentes qu’al pesar de tener una puntuación superior a la d’otros candidatos nun fueron convocaos pa cubrir places.

Pa SUATEA la única manera d’acabar con esti tipu de situaciones diba ser l’apertura de nueves bolses dende les que se pudieran cubrir les places atendiendo al perfil más afayadizu de los candidatos pola so puntuación.Fontes del sindicatu manifestaron a ASTURNEWS que l’apertura d’estes bolses ye avezao n’otres asignatures: “el cursu pasáu abriéronse pa alemán, latín y griegu, por eso nun entendemos por qué nun se fai lo mesmo col asturianu”.

Anguaño l’asignatura de llingua asturiana impártase nun total de 213 centros de primaria, 66 d’E.S.O y 18 de Bachilleratu na enseñanza pública. El númberu d’alumnos que reciben esta asignatura ye de 14.999 en primaria y de 4.071 en secundaria, a los qu’imparten clase 149 profesores nel primer de los niveles y 71 nel segundu nivel. Los datos referentes a la enseñanza concertada amuesen que nos tres únicos centros onde s’imparte asturianu cursen l’asignatura 159 alumnos en primaria y 53 en secundaria.