SUATEA denuncia “la incompetencia” de la Conseyería coles bolses de primaria y secundaria

La Secretaría de Llingua de SUATEA vieno acabante d’asoleyar un comunicáu esti día nel que denuncia “la incompetencia y la irregularidá de la Conseyería d’Educación coles bolses de gallego-asturiano y llingua asturiana de primaria y secundaria”. Na opinión del sindicatu, “too esto trae como consecuencia qu’hai escueles ensin maestros”.

SUATEA atalanta que los que tien de facer la Conseyería “ye abrir d’una vegada la bolsa de Gallego-Asturiano, que ya tenía que tar abierta dende fai un añu”.

El comunicáu fina afitando que ensin oficialidá toos estos problemes van seguir xurdiendo y que “la reforma del estatutu d’Autonomía tendría que contemplar la oficialidá del asturianu y del Gallego-Asturiano nel so ámbitu pa dexar de ser una materia de segundu orde nel nuesu ordenamientu educativu”.

El comunicáu del SUATEA reproduzse integramente darréu:

En SUATEA denunciamos dende’l cursu pasáu, que la bolsa de la especialidá de Gallego-Asturiano, quedare escosa, por mor de que munchos de los sos integrantes aprobaren la oposición. A estes altures d’entamu del cursu atopámosnos con tres escueles ensin maestros nesa especialidá y con abondos neños a los que se-yos ta negando’l derechu a deprender la so llingua. La Conseyería como siempre, pa xustificar la so incompetencia organizativa y la so falta de respetu a la Llei d’Usu, miente o nun s’entera de cómo ye la titulación de Llingua Asturiana y Gallego-Asturiano. Amás nun sabe qu’hai abondes persones capacitaes en Gallego-Asturiano y que tan nel Rexistru Xeneral de Capacitación. Nun entendemos la chapuza y la irregularidá que van facer pa cubrir les places de Gallego-Asturiano, ya que dende la Conseyería van ufiertar les vacantes a maestros que tan na llista de primaria y tean dicha especialidá. Pue xustificase, pa respetar los derechos llingüísticos de los neños/es y que tean profesor/a cuanto primero; pero tamién sabemos qu’esta situación dase por falta de responsabilidá y de compromisu real de l’alministración cola llingua de nueso. Esto pasa porque agora mesmo la maquinaria burocrática ye llarga. Hai un trasiegu de papeles ente Conseyeríes que ye capaz de mariar al más pintáu. “Tú por mi, la casa por barrer”, resume les rellaciones ente la Conseyería d’Educación y Alministraciones Públiques. Les consecuencies pagámosles toos. Lo que tien que facer la Conseyería ye abrir d’una vegada la bolsa de Gallego-Asturiano, que ya tenía que tar abierta dende fai un añu. En SUATEA alvertimos a l’alministración qu’esta situación va dase dientro de poco coles bolses de Llingua Asturiana de primaria y de secundaria. Esperamos qu’esta vegada cumpla la so pallabra y les abra. Si queremos llograr que l’asturianu tea presente nes escueles d’Asturies en condiciones dignes y de normalidá ye necesario que se-y dea a la nuesa llingua’l rangu llegal que yá tienen el restu les llingües del Estáu: la oficialidá. La reforma del estatutu d’Autonomía tendría que contemplar la oficialidá del asturianu y del Gallego-Asturiano nel so ámbitu pa dexar de ser una materia de segundu orde nel nuesu ordenamientu educativu.