SUATEA denuncia ‘graves irregularidaes’ na fechura de les llistes provisionales d’interinos y desixe que s’apare la convocatoria

El sindicatu de profesionales de la enseñanza SUATEA desixó nun comunicáu la ‘paralización de la convocatoria y adxudicación de places en toles especialidaes convocaes a oposición n’Asturies’ mentes que nun s’arreglen los ‘graves errores materiales’ de les llistes provisionales d’interionos, nes que ‘munchos de los aspirantes tán mal baremaos, de forma y manera que nun va poder optar a les places ufiertaes’.

L’erru más grande denunciáu por SUATEA provocaría un cambiu sustancial nes llistes en casu de ser solucionáu. Asina, resulta ser que na baremación foi valorada de manera más favorable la esperiencia previa a aquellos aspirantes que nun se presentaron a les oposiciones d’esti branu n’Asturies. Ello quier dicir que ‘perxudiquen a los que prefirieron quedase n’Asturies respective a los que marcharon a otres Comunidaes o simplemente nun se presentaron’.

Pesie a que l’Alministración respondió a esta denuncia de los interinos asegurando que ‘nun lo consideren un erru, sinón que sólo aplicaron l’Alcuerdu sobre profesoráu interinu robláu coles Organizaciones sindicales ANPE y FETE-UXT’, SUATEA desixe la ‘paralización de la convocatoria asina como l’adxudicación de places en toles especialidaes convocaes a oposición n’Asturies en tanto en cuanto nun se resuelvan toos estos errores’, al tiempu que desixe a los firmantes de talu alcuerdu que ‘con calter urxente, tomen les midides necesaries pa da-y una solución xusta a les persones afectaes por esta grave situación’.