SUATEA, CCOO y FETE-UXT apoyen la manifestación pola oficialidá del 24 de payares

El prósimu Sábadu 24 de Payares el Conceyu Abiertu pola Oficialidá convoca Manifestación cola vindicación “Na reforma del estatutu l’asturianu llingua oficial”. Los sindicatos de docentes SUATEA, FETE-UXT y Federación d’Enseñanza de CC.OO. acaben de mandar una nota de prensa “pa denunciar les carencies na escolarización de la llingua asturiana al tiempu qu’animamos a la comunidá educativa asturiana a la participación nesta movilización”.

Nel comunicáu comenten como a pesar de que “la demanda d’escolarización na llingua asturiana volvió a medrar, la situación del coleutivu interín continua siendo de total precariedá”. Los sindicatos recuerden que “sólo un 30 % de los docentes trabayen a tiempu completu en Llingua Asturiana y nun únicu centru”. “La itinerancia domina en primaria (un 55 %) y la media xornada en secundaria (un 58%)” añaden.

Nel “Plan de normalización social del asturianu 2005 – 2007” el gobiernu asturianu comprometióse na so Acción 34 a “Realizar un estudiu xurídico so la posible especialidá del profesoráu de llingua asturiana” enantes que terminara l’añu 2006. Termina’l 2007 y pa los sindicatos “yá se pue ver que l’incumplimientu ye una mena intencionada d’aparcar la cuestión”.

En cuantes a les condiciones en que se desarrolla la escolarización, los sindicatos denuncien “que’l derechu al estudiu de la llingua asturiana nun ta garantizáu nel sistema educativu asturianu, al nun respetase la Llei d’Usu”. “Pa entamar –diz el comunicáu- na etapa d’Infantil la Conseyería d’Educación nun tien voluntá d’incorporar la enseñanza d’asturianu creando en munchos neños y neñes un conflictu ente lo que sienten nel so entornu y lo que-yos deprenden na escuela”. En Primaria, dicen “la situación ye más favorable dada la so presencia nel currículu. Sin embargu, el derechu a la escolarización establecíu na Llei d’usu entra en contradición cola esistencia de ratios mínimes (compárese col casu de la relixón que con un escolín, escolina ya se constituye grupu) de 10 alumnos”.

En Secundaria y Bachilleratu, “amás de la esistencia de ratios mínimes”, sigue’l comunicáu “la escolarización choca cola competencia con otres materies, fundamentalmente Segundu Idioma, lo que supon una discriminación p’aquellos qu’escueyen asturianu pos renuncien a una segunda llingua estranxera”.

Nos centros concertaos, denuncien, “nun esistía obligación d’ufiertar llingua asturiana en primaria fasta la publicación del Currículu de Primaria”. Asina, namái 3 centros concertaos teníen constituyíos grupos d’asturianu lo que representaba un 1% de los alumnos y alumnes d’esti tipu de centros. Nesti cursu’l númberu de centros que lu ufierten ye’l mesmu, y el númberu de profesores d’asturianu contrataos ye’l mesmu. Esto resulta difícil d’entender, dada la obligatoriedá de la so ufierta y la imposibilidá de da-y un conteníu curricular a la so optativa. Sabemos d’incumplimientos por diferentes víes. Algunos neños y neñes tán acudiendo a refuerzos de llingua castellana, taller de nueves tecnoloxíes… y otros tipos d’actividaes que refuerzen el currículu d’otres árees. Nun hai qu’escaecer “qu’estos centros funcionen coles perres públiques y nun cumplen cola normativa”.

Los sindicatos SUATEA, FETE-UXT y Federación de Enseñanza de CCOO “defendemos la oficialidá de la llingua asturiana y por ello participaremos na movilización del prósimu sábadu”. Dicho esto, los sindicatos “denunciamos que la escolarización de Llingua Asturiana nun se fai nes meyores condiciones, inda col marcu llexislativu actual”.

El comunicáu piésllase con un llistáu coles reivindicaciones más prioritaries: 1.Incorporación de la Llingua y la Cultura Asturiana nel currículu d’Infantil. Eliminación de les ratio mínimes en tolos niveles pa la constitución de grupos de llingua asturiana y gallego-asturianu. 2. Seguimiento efeutivu del cumplimientu la normativa por parte de tolos centros educativos (públicos y sobre too privados) estableciendo esta tarea como una de les prioridaes del Serviciu d’Inspección Educativa. 3. Creación de la Especialidá de Llingua Asturiana y Gallego-Asturiano nos Cuerpos de Maestros y Profesores d’Enseñanza Secundaria. Y 4.Negociación en Mesa Sectorial de Llingua Asturiana.