SUATEA aprovecha’l Día d’Asturies pa recordar les sos reinvidicaciones sobre l’enseñu del asturianu

SUATEA remitió un comunicáu esta selmana, coincidiendo cola celebración del Día d’Asturies. Nel mesmu, reconocen que nel cursu pasáu llogróse que “la nuestra llingua entrare nos planes d’estudiu de la Universidá na facultá de Filoloxía y Maxisteriu, lo que permitirá que se siga formando’l profesoráu pa enseñar en tolos niveles educativos obligatorios”, anque recuerda “esti llogru ye parcial y escasu si tenemos en cuenta les reivindicaciones históriques de la so presencia na Universidá, pero supón el primer pasu d’una implantación más amplia nel currículu universitariu”.

Recuerden al Gobiernu d’Asturies que “les titulaciones relacionaes cola nuestra llingua daes pola universidá son y sedrán papel moyao si nun se reconoz la especialidá de Llingua Asturiana y Gallego-Asturiano”.

SUATEA reclama que nel futuru Estatutu d’Autonomía d’Asturies “se declare la OFICIALIDÁ de la Llingua Asturiana y el Gallego-asturianu nel so territoriu, como única ferramienta llegal que garantiza’l respetu efectivu de los derechos llingüísticos de tolos asturianos y asturianes, y favorez la sobrevivencia de la nuesa llingua y cultura”.

Tamién esixen que les places de Llingua Asturiana y Gallego-Asturiano “pasen a formar parte de les plantiyes orgániques de los centros, la creación de la especialidá y la convocatoria d’oposiciones”.

Amás, esixen “que’l currículu d’Educación Infantil recueya la nuestra llingua y que demientres nun lo faga s’atiendan toles demandes d’escolarización nesta etapa fundamental pal deprendimientu en xeneral y el llingüísticu en particular, que nos centros s’axeiten Planes Llingüísticos que dean un tratamientu integráu y coordiná de toles llingües que s’enseñen y onde la nuestra llingua seya vehicular en delles aries”.

Remanten dende SUATEA faciendo “un llamáu a la sociedá asturiana y a la Comunidá Educativa en particular pa que trabaye por estes reivindicaciones esti día, los vinientes y nos foros y organizaciones sociales que les defenden”.