SUATEA afirma que se paga la privatización col pieslle d’aules públiques n’educación infantil

El sindicatu SUATEA criticó les declaraciones a medios informativos del conseyeru d’Educación, José Luis Iglesias Riopedre, nes qu’anunciaba l’apertura de venti aules públiques pa escolinos de 3 años. La formación afirma que’l responsable d’enseñanza del gobiernu autonómicu, por contra, informó a los representantes del profesoráu esti llunes 27 de la supresión de ventiocho unidaes nesi mesmu tramu educativu.

SUATEA acusó a Riopedre de pretender ocultar la que califiquen de “vergoñosa política de privatización de la enseñanza” y de refugar a los sindicatos “faciendo declaraciones enantes mesmo de la reunión con diches organizaciones”.

Nun comunicáu, el sindicatu autónomu, alerta de que la propuesta d’unidaes educatives pal cursu reduz la ufierta nel de nivel de 3 años “p’asina continuar n’años posteriores col pieslle d’unidaes de 4 y 5 años y en tola primaria”. Según SUATEA nesa propuesta “caltiénense les ratios al másimu, lo que supón per un llau dexar a los centros ensin la posibilidá de nueves incorporaciones d’alumnos a la rede pública y obligando a la matrícula na rede privada concertada”, dalgo que significa, a xuiciu del sindicatu “deteriorar deliberadamente la calidá de la enseñanza”.

La formación sindical pide-y al gobiernu tripartitu asturianu un replanteamientu en materia educativa y “una apuesta decidida pola escuela pública asturiana”, que pa SUATEA “había traducise nuna correcta administración de los dineros públicos, que habíen destinase al aumentu del númberu d’unidaes en tolos niveles educativos de la rede pública”.