Sigue abiertu’l plazu pa presentase a la prueba de conocencia d’asturianu de l’ALLA

L’Academia de la Llingua Asturiana tien abiertu’l plazu p’apuntase a la so tradicional prueba de conocencia d’asturianu. Una prueba na que pue consiguise un diploma oficial que demuestra la conocencia básica de la llingua asturiana. L’ALLA abre esta posibilidá “sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu”.

L’ALLA fai dos convocatories añales onde poder evaluase de teoría gramatical: conocencia y dominiu del funcionamientu gramatical del asturianu y de la normativa académica; práutica escrita: emplegu amañosu de la llingua, puestu en práutica gracies a exercicios gramaticales y de composición escrita y práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador. Tamién ha tenese conocencia del allugamientu de la llingua dientro de la sociedá asturiana asina como del procesu de normalización en que ta inxerta.

La prueba va tener dos partes, una escrita (dictáu, torna, exercicios gramaticales, redaición) y otra falada (conversación). Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica Asina mesmo, l’Academia aconseya la llectura de testos fechos acordies cola normativa, como los asoleyaos pola Institución. La prueba va ser el 26 de xineru de 2008 y el plazu de matrícula ye del 14 al 24 de xineru.

Bases completes de la Prueba de Conocencia