Sociedá

El Bloque por Asturies pide-y al delegáu del Gobiernu Antonio Trevín la prohibición d’un actu d’homenaxe a Pelayo que tien convocáu pa esti sábadu en Cangues d’Onís el grupu ultraderechista Democracia Nacional. Al empar dellos colectivos d’izquierdes tienen previsto entamar en Cangues una concentración antifascista.

El Bloque considera que l’actu convocáu polos ultres españoles ye de conteníu xenófobu y racista al revivindicar la figura del primer rei asturianu como personaxe hestóricu qur s’enfrentó a los musulmanos pa espulsalos de la Península. Pa BA “un Gobiernu estatal que se considera de progresu nun debería permitir la cellebración d’actos como’l que se va llevar a cau esti sábadu”, ya que según recuerda’l comunicáu del Bloque, el grupu convocante del actu: ” caracterízase por tener una política agresiva de refuga a la llegada de población foránea al Estáu español, que nun casa cola tradición hestórica d’acoyida a inmigrantes que tuvo dende siempres Asturies”.

Pel so llau dellos colectivos d’izquierda tienen convocada una concentración antifascista nel mesmu sitiu de celebración del actu de Democracia Nacional. Colectivos como FUSOA, AIRA (Asociación d’Inmigrantes d’Asturies)y Darréu sofiten la convocatoria d’esta concentración de rechazu.

Izquierda Xunida de Mieres afirma que la so abstención énte los presupuestos municipales del grupu socialista fue un “exerciciu de responsabilidá política” y el so apueste por convertise n’alternativa de gobiernu nel conceyu. La coalición descarta la posibilidá de volver pactar col PSOE y acusa al alcalde d’actuar na crisis como “home de paya al serviciu de los intereses de la cúpula de la FSA”.

Pa IX la so abstención nel últimu plenu del Ayuntamientu de Mieres énte los presupuestos presentaos pol equipu de gobiernu ye la confirmación del so distanciamientu de los socialistes y el so apueste como alternativa con pretensiones de gobernar el conceyu del Caudal. El significáu políticu del so votu nel plenu presupuestariu caltién la coalición que fue el de “evitar la paralización del municipiu como consecuencia de la mayor crisis institucional de tol periodu democráticu y defender les polítiques necesaries pa resolver los problemes de los ciudadanos”.

Izquierda Xunida afirma a la fin que “nun vamos tolerar amenaces nin del PSOE local nin de la FSA, ye más, nun contemplamos la posibilidá de volver pactar con ellos”, ya qu’a xuiciu de la coalición los socialistes “perdieron tola credibilidá y tamos convencíos de que les urnes acabarán castigándolos como lo merecen”.

El grupu municipal d’Izquierda Xunida nel conceyu de Mieres abstúvose na votación de los presupuestos presentaos pol equipu de gobiernu socialista. Con esta postura la coalición d’izquierdes evita que se cumpla l’advertencia de la FSA d’una posible quiebra del pactu autonómicu con IX-BA.

Jesús Gutiérrez, secretariu d’organización de los socialistes asturianos, amenazara en díes pasaos con treslladar la crisis de Mieres al ámbitu del gobiernu’l Principáu si Izquierda Xunida votaba en contra de los presupuestos del conceyu y provocaba con ello la presentación d’una moción de confianza del actual alcalde. IX, pel so llau, acusara a Gutiérrez y a otros dirixentes de la FSA, de tentar desestabilizar cola crisis mierense el proyectu políticu de gobiernu de coalición autonómicu pa desgastar al presidente Álvarez Areces como futuru candidatu.

L’abstención d’Izquierda Xunida evita per agora que la crisis abierta nel conceyu del Caudal pueda tener consecuencies a nivel d’Asturies y supón al empar un toque d’atención al PSOE tres la espulsión de los conceyales de la coalición d’izquierdes del gobiernu municipal.

Izquierda Xunida de Mieres culpa a la FSA, concretamente a los dirixentes Benjamín Gutiérrez y Balbino Dosantos, de la ruptura del alcuerdu de gobiernu municipal. Pa IX los sectores mayoritarios na cúpula socialista asturiana taríen forzando la desestabilización del gobiernu de Vicente Álvarez Areces con fechos como los sucedíos nel conceyu del Caudal.

L’agrupación mierense d’IX afirma nun comunicàu que les recientes declaraciones del responsable de la FSA Benjamín Gutiérres sobre la ruptura nesi conceyu amuesen que “l’actitú de la FSA confirma que la espulsión del gobierno de IU en Mieres tuvo como únicu oxetivu desestabilizar l’alcuerdu de la izquierda n’Asturies pa debilitar a Areces como prósimu candidatu”.

Izquierda Xunida de Mieres caltién que too respuende a una griesca ente sectores enfrentaos del PSOE d’Asturies cuando aparez nel horizonte cercanu la convocatoria de nueves elecciones autonómiques en 2007. Los antiguos aliaos de los socialistes nel gobiernu municipal de Mieres, piden por último, la intervención directa del alcalde pa tentar reconducir la situación creada nel conceyu pola ruptura del pautu y la espulsión de los conceyales d’IX.

Izquierda Asturiana(IAS)sumóse ayer a les crítiques espresaes pola Academia de la Llingua Asturiana y Andecha Astur énte’l sofitu institucional del viceconceyeru de Mediu Rural Eduardo Lastra a la candidatura del gallego-portugués como patrimoniu inmaterial de la Humanidá. IAS califica al gobiernu asturianu de “comparsa” énte los sectores que dende Galicia tenten dirixir la política cultural asturiana.

La organización nacionalista pide la dimisión de Lastra “pol actu d’absoluta irresponsabilidá d’avalar cola so presencia la candidatura mencionada dando carta de naturaleza institucional dende Asturies a un actu que nun ye inocente” y qu’a xuiciu d’IAS “tien unes consecuencies que van más mucho allá de los fechos culturales o llingüísticos, y que forma parte d’una estratexa diseñada pa inculcar la idea de qu’una parte del nuestru país nun ye culturalmente asturiana”.

Como informamos ayer, el viceconceyeru de Mediu Rural del gobiernu asturianu, Eduardo Lastra, participó xunta al conselleiro del BNG Fernando Blanco nun actu organizáu en Santiso d’Abres pola Xunta de Galicia pa promocionar la candidatura énte la UNESCO del gallego-portugués como patrimoniu inmaterial de la Humanidá. Talo remarcaron en díes pasaos l’Academia de la Llingua Asturiana y la organización Andecha Astur, na candidatura impulsada dende Galicia y Portugal considérase parte d’esi patrimoniu inmaterial a la cultura y la llingua de los conceyos del Navia-Eo.

El portavoz del grupu socialista na Xunta Xeneral Fernando Lastra afirma nuna entrevista concedida al diariu La Nueva España que pal so partíu la reforma del estatutu “nun ye’l tema más importante que tenga el proyectu políticu d’ Asturies nesti momentu”. Respective a la recoyida de la oficialidá na reforma, el diputáu del PSOE, considera que ye un asuntu fuera del alcuerdu políticu de gobiernu soscritu con IX-BA.

Lastra caltién que la reforma estatutaria nun ye “l’asuntu central del debate políticu” y qu’hai otros que-y esmolecen más al so partíu: “empléu, sanidá, educación, seguir articulando una rexón meyor, son asuntos que nun vamos dexar a un llau pa metenos nun debate esclusivamente de políticos”, afirma.

El portavoz socialista defende la postura del so grupu tocante al asturianu declarando que “el conceptu de voluntariedá, manexáu con profusión dende les distintes aprosimaciones a esti tema, ye’l conceptu clave na nuestra posición”. En referencia a la dixebra que caltienen PSOE ya IX-BA sobre la oficialidá, Fernando Lastra, propón acercase nos temes onde ya hai posiciones coincidentes y “conociendo cuáles son les posiciones tradicionales de cada fuerza, esplorar los límites de les mismes, pero nun pretender forzalos”.

La presidenta de l’Academia de la Llingua Asturiana Ana Cano pidió desplicaciones al gobiernu asturianu pola presencia del viceconceyeru de Mediu Rural Eduardo Lastra nun actu de sofitu a la candidatura del gallegu como patrimoniu universal de la UNESCO. Andecha Astur sumòse a les crítiques pola presentación de la candidatura en Santiso d’Abres con presencia del conselleiro del BNG Fernando Blanco.

Ana Cano desixó al gobiernu del Principáu qu’esclarie la razón pola qu’un miembru del executivu participó institucionalmente nel actu de presentación de la candidatura del Patrimoniu Inmaterial Gallego-Portugués en Santiso d’Abres. La presidenta de la institución académica denunció l’actitú del gobiernu asturianu énte la realidá llingüística de la zona Navia-Eo y afirmó que “llamentablemente la falta d’iniciatives de política cultural por parte del Principado da ales” a los intentos de asimilación cultural d’estos conceyos que promueven sectores nacionalsites gallegos.

Andecha Astur sumóse a les crítiques pol sofitu institucional del Principáu a una candidatura qu’inclúi ente’l patrimoniu inmaterial pal que se solicita la protección de la UNESCO a loa territorios de fala gallego-asturiana. La organización nacionalista dio un pasu alló de les crítiques y empobinóse directamente a la UNESCO p’advertir a esta institución internacional de que “de llevase a cabu tala proclamación nos términos en qu’estra propuesta foi rializada, consumaríase un atentáu cultural ensin precedentes escontra’l padremuñu asturianu”.

La candidatura del gallego-portugués como Patrimoniu Inmaterial Universal ta promovida por diverses instituciones de Galicia y Portugal, encabezaes polos sos gobiernos y les sos másimes instancies académiques. Dende la puesta en marcha de la iniciativa los promotores vienen celebrando actos periódicos de sofitu a la candidatura. Un de los últimos actos celebróse va unos díes nel conceyu asturianu de Santiso d’Abres y foi el conselleiro nacionalista del executivu gallegu Fernando Blanco l’encargáu de presentar el proyectu. L’actu d’Abres cuntó cola presencia del viceconseyeru asturianu de Mediu Rural Eduardo Lastra que afirmó que “el gobiernu del Principáu ve con bonos güeyos y apoya” la candidatura gallego-portuguesa.

Web oficial de la candidatura del gallego-portugués como Patrimoniu Universal de la UNESCO

El director de la Oficina de Política Llingüística del Principáu Ramón d’Andrés afirma nuna entrevista concedida al diariu El Comercio que “cada vez ye más difícil de xustificar dende’l puntu de vista xurídicu y políticu” l’ausencia de la oficialidá pa la llingua asturiana. Pal responsable de la Oficina la política entamada nel so campu pol gobiernu ye “forzosamente imperfecta” pol actual marcu xurídicu del nuestru idioma.

D’Andrés declara nesta entrevista que l’afayamientu d’un nuevu tratamientu llegal pal asturianu había tar “n’axenda de la reforma estatutaria con seriedá, dando exemplu d’anchura de mires, serviciu a la sociedá y espíritu de consensu”. El director de la Oficina de Política Llingüística suxer los mínimos qu’habia tener una “oficialidá a l’asturiana”. Pa Ramón D’Andrés el nuevu marcu oficial tenía de cumplir el que “l’asturianu, y el gallego-asturianu, convertiráse nuna llingua institucional xunto col castellanu; les comunicaciones que’l ciudadanu escueya facer en llingua asturiana serán válides a tolos efectos; el ciudadanu nun tendrá nenguna obligación d’usar l’asturianu”.

Nes sos declaraciones a El Comercio, el responsable de Política Llingüística del gobiernu autonómicu opina sobre les causes sociales que producen la situación anómala del idioma asturianu respective a otros del estáu y afirma que “ye posible que’l fechu diferencial más importante seya que l’establishment cultural y políticu ve’l desarrollu de la llingua como un estorbu. Esi establishment nun tien problema cola cooficialidá, sinón cola mesma esistencia de la llingua”. Una consecuencia d’eso ye, pa Ramón d’Andrés el “que los partíos mayoritarios nun tienen élites cualificaes capaces de desendolcar un sólidu discursu propiu respecto a la normalización”.

Preguntáu pol tratamientu dau a la llingua asturiana na convocatoria recién de les places pa entamar la plantiella del Ente Públicu de COmunicación, D’Andrés opina que “una de les razones de ser d’una televisión autonómica ye la de valir de ferramienta de normalización y de normalidá del idioma autóctonu”, al empar qu’afirma: “diba ser inaudito que la televisión pública asturiana nun tuviere personal con conocimientu y capacidá d’emplegar l’asturianu”.

La Dirección Nacional d’Izquierda Asturiana (IAS) cellebrada’l pasáu vienres aprobó les actividaes y les llínies de discursu principales del partíu d’izquierda asturianista de cara al prósimu 8 de setiembre. El portavoz nacional d’Izquierda Asturiana (IAS), Ignaciu Llope, informó de dalgunes de les actividaes previstes pal 8 de setiembre que foron aprobaes na Dirección Nacional del partíu’l pasáu 19 d’agostu.

Llope siñaló qu'”Izquierda Asturiana (IAS) tratará afirmar esi día como un día de reivindicación nacional asturiana nel qu’esti añu, y de cara a la prósima reforma del estatutu, se remarque la necesidá de reclamar que’l mesmu recueya la condición d’Asturies como nación y la oficialidá inaplazable, sin componendes nin retrasos, de la llingua asturiana.”

Sigún el portavoz d’IAS “un día como’l 8 de setiembre y nun momentu de redefinición del estáu nel que tamos, ye fundamental recuperar la memoria d’un pasáu nel qu’en momentos difíciles o periodos costituyentes, como la Xunta Xeneral en 1808 o’l Conseyu Soberanu en 1937, el pueblu asturianu dotóse de mecanismos propios d’autogobiernu basaos na plena soberanía.”

A les 13:00 hores del 8 de setiembre en Xixón, militantes del partíu y miembros de la Dirección Nacional d’IAS van facer una ofrenda d’un ramu lloréu al Conseyu Soberanu d’Asturies y Llión nel sitiu onde esti organismu, que representó la soberanía d’Asturies nun periodu de 1937, tuvo la so se, na Plaza del Parchís de Xixón. Nesti mesmu escenario, l’historiador y miembru de la Dirección Nacional d’IAS, Faustino Zapico, pronunciará unes palabres en recuerdu del Conseyu Soberanu, la so xenesis y significación histórica, asi como la necesidá de recuperar la so memoria. Izquierda Asturiana (IAS) va aprovechar pa reclamar nesti actu la devolución a Asturies de los orixinales de los Archivos del Conseyu Soberanu y solicitar la istalación nel edificiu de “la casa blanca” de la citada plaza d’una placa que recuerde que nesi sitiu radicaba la istitución soberana que rixió’l nuestru país nun periodu de la Guerra Civil.

Ignaciu Llope siñaló que los actos d’Izquierda Asturiana (IAS) nun tán cerraos y nos prósimos díes va dase a conocer dalguna característica más de los mesmos.

El portavoz nacional del Bloque por Asturies y director de l’Axencia Asturiana de Cooperación Rafael Palacios, aseguró esti viernes que l’asuntu llingüísticu “ye prioritariu” pa la so organización na reforma estatutaria. Palacios aseguró qu’una renuncia a la oficialidá per parte de los sos socios d’Izquierda Xunida diba francer el so alcuerdu políticu.

El Bloque consideraríase “desvinculáu” de la so andecha estratéxica con IX si esta organización aceptara una reforma del Estatutu que nun incluyera la oficialidá de la llingua asturiana. Asina lo declaró Palacios esti viernes al ser preguntáu pola postura del Bloque por Asturies nel cursu de la presentación de la memoria de los proyectos desenvueltos pola Axencia Asturiana de Cooperación.

La organización nacionalista emitiera va unos díes un comunicáu nel que fixaba la so posición énte la negociación de la reforma estatutaria. Pal BA una reforma que nun reconociere los derechos básicos d’Asturies como pueblu, incluíos los llingüísticos, y la so equiparación coles comunidaes del estáu que tienen un marchu más ampliu d’autonomía, diba deslligar a esta organización de cualquier alcuerdu de gobiernu, coalición electoral o alianza política estratéxica.

Na presentación de la memoria del departamentu que dirixe Rafael Palacios nel gobiernu asturianu ésti manifestó qu’hasta la fecha Izquierda Xunida nun tresmitiera al Bloque cuála yera la so postura respective a la llingua asturiana énte la reforma l’Estatutu y recordó-y a los sos socios de coalición que la oficialidá figura como una de les prioridaes nos alcuerdos firmaos ente IX y BA.