Sociedá

La Secretaría de la Muyer y la Fundación Juan Muñiz Zapico, entamen la exposición “¿Invisibles? Mujeres, trabajo y sindicalismo: 1939 – 2000” que va poder visitase del 21 de payares al 2 d’avientu na Casa Cultura d’Aviles, y que va ser presentada’l prósimu llunes por Xana Reyes, secretaria de la Muyer de la Unión Comarcal de CCOO d’Aviles.

La exposición ta compuesta por un conxuntu de 87 semeyes que faen un percorríu pela sociedá española a lo llargo de 60 años del sieglu XX, a travies d’imáxenes de muyeres que reflexen les condiciones de vida y trabayu nos distintos periodos que puen identificase, dende un puntu de vista económicu y políticu, na historia d’España dende’l final de la guerra civil hasta l’entamu del sieglu XXI.

Los retratos van acompañaos de testos que sinteticen los aspectos más esenciales de la exposición, recoyendo la represión contra los vencíos de la guerra y les dures condiciones de vida qu’afectaron a la clas trabayaora, repasando los diferentes trabayos que-yos tocaben a les muyeres, la inmigración interior y esterior, y la persecución de l’actividá asociativa na busca d’espacios de llibertá y reconocencia de derechos llaborales y políticos.

L’actu de presentación cuntará tamien coles intervenciones de Dolores Fernández González, secretaria de la Muyer de CC.OO. d’Asturies, y Carmen Bravo, secretaria confederal de la Muyer.

Un aumentu del 20 por cientu nel presupuestu dedicáu a promoción llingüística ye’l que se contempla nel proyectu de les cuentes autonómiques referente a Cultura pal añu viniente. Ente les cifres destaquen los 36.938.52 euros destinaos a la Llaboral, Ciudá de la Cultura, y al Ente de Comunicación del Principáu: 17.400.000 euros.

La conseyera de Cultura calificó les cuentes del so departamentu de “presupuestu decididamente inversor” y cuantificáu en 160.389.721 €. Ana ´Rosa Migoya afirmó na presentación de les cuentes culturales qu’estes apuesten claramente “pol turismu, un evidente compromisu coles polítiques culturales y un innegable respaldu a l’actividá y les infraestructures deportives, asina como a les iniciatives del movimientu asociativu xuvenil”.

L’aumentu del presupuestu pa Cultura fue d’un 4,4 por cientu respective al 2,6 del añu pasáu. El presupuesto de la Dirección Xeneral de Promoción Cultural y Política Llingüística asciende a 38.728.827 €. de los cualos, 10.791.024 son pa equipamientos. La Direccón de deportes lleva 31.847.031 € y la de Turismu 22.111.470 €.

L’Asamblea de Cooperación pola Paz entama a partir del xueves 24 de payares unes xornaes en Xixón embaxo’l títulu de ‘El suañu d’un pueblu sin tierra: Palestina’, coles que busca allegar a los asturianos la realidá que vive’l pueblu palestín. Conferencies, proyecciones de cortos, llectures de cuentos y poesía per parte d’autores asturianos y conciertos d’Amazing Grace, Xabel Vegas y Deua Dubra busquen recaudar fondos pa un proyectu sanitariu de la Media Luna Roja Palestina.

L’Asamblea de Cooperación pola Paz ye una Organización Non Gubernamental de Desarrollu (ONGD) sin ánimu de lucru, que desendolca les sos actividaes nel campu de la solidaridá, la cooperación al desarrollu y la defensa de los derechos humanos, vinculada a Palestina dende 1993 a travies d’acciones n’estremaos sectores: sanitariu, mediuambiental, etc. Como yá fixere otros años, entama a partir del 24 de payares unes xornaes titulaes ‘El suañu d’un pueblu sin tierra: Palestina’ coles que busca allegar la realidá de los palestinos a la sociedá asturiana y a travies de la solidaridá recaudar tolos fondos posibles a lo llargo de les diferentes actividaes pa destinalos a un proyectu nel área de salú de la Media Luna Roja Palestina.

El programa de les actividaes entama’l xueves 24 con una conferencia nel Cafe Cool de Xixón de la mano de Justo Vasco, qu’amosará la visión esterna de Palestina. A les diez de la nueche, el grupu Amazing Grace, dará un conciertu pola causa nel Cafe Dam. Nesti mesmu cafe, el vienres 25, va ser Najaty Jabary quien fale del día a día de los palestinos, pa, actu siguíu, proyectar el cortu ‘El Ghetto de Qalquilia’. El sábadu 26 la llibrería Ítaca de Xixón prepara una xornada de cuentacuentos pa nenos a les cinco la tarde; mentes qu’a les siete, l’escritor afincáu en Xixón Mauricio Shwarz, fadrá llectura de testos palestinos nel Cafe Cool. A les diez de la nueche, el Cafe Dam volverá a sirvir d’escenariu pa un conciertu de Xabel Vegas.

El llunes 28 y el martes 29 empezará otra vuelta la xornada cola sesión de ‘Cuentos del Te’ na Llibrería Ítaca. Pela so parte, la Llibrería Alborá va ser el sitiu onde, el llunes a les siete y media la tarde, se faiga un recital poeticu d’escritores asturianos. El pieslle de les xornaes va ser el martes 29 a 21:30 y cuerre a cargu d’un conciertu del grupu llavianes Deua Dubra nel Cafe Trisquel de Xixón.

La Conceyala de Cooperación Internacional avilesina, Rosa Fernández, presentó ayeri’l programa d’actos del II Foru Solidariu, que se va facer na Plaza España d’Aviles ente’l 18 y el 20 de payares embaxo’l llema ‘África olvidada ‘ y qu’inclúi meses reondes, conferencies, documentales, actividaes infantiles y música y dances africanas.

El vienres día 18, inaugúrase’l Foru Solidariu con una mesa reonda titulada ‘África, emerxencia permanente’, na que van participar Luis Villa (Medicos sin Fronteres) y Paulino Sánchez Rodríguez (Misioneru de Chad), y que va ser moderada por Rosa Fernández García, (Conceyala de Cooperación y Salú del Ayuntamientu d’Aviles )

El sábadu a les siete y media la tarde, Rafael Palacios, director de l’Axencia Asturiana de Cooperación al Desarrollu va presentar la conferencia de Manuel Zaguirre (Presidente de SOTERMUN). Mentes que la mañana del domingu, y como pieslle de les xornaes, la Plaza España va enllenase de músiques y dances africanes, que se van complementar cola campaña de sensibilización pa los nenos que se va desendolcar dende les escueles avilesines.

L’agrupación d’Andecha Astur en Corvera volvió mandar una denuncia ente la Confederación Hidrográfica del Norte ( CHN ) poles obres que se tán faciendo nel SAPU VI de Truyes. Nel so comunicáu, Xose Xicu Mata, coordinador d’Andecha na zona, asegura que “tán echándose tonelaes de barru nel regatu de Truyes” que, a la final, va aparar a les agües del ríu Albares y na ría d’Aviles, polo que “de poco valen los millones d’euros gastaos en limpiar la ría cuando ta contaminándose otra vez colos sedimentos de les obres de Truyes”.

Con esta denuncia a la CHN quier facese ecu de los problemes que tán dando estes obres, de tipu medioambiental y inclusu social, yá que dalgunos vecinos de los pueblos d’alrededol yá se tienen quexao por cortes de carreteres ensin avisu, estropios nel patrimoniu cultural y inundaciones nos praos, güertes y caleyes.

Andecha Astur afirma nel so comunicáu que lo que se busca con estes denuncies ye que se-yos dea un toque d’atención a los infractores y que se te tomen les midides necesaries pa que nun se vuelva repitir.

Esta tarde, a les ocho, nel Llar Solidariu del Conceyu Abiertu na cai Gascona d’Uvieu integrantes de l’Asociación Soldepaz-Pachakutik presenten Aymaras: la etica de la esperanza. La crónica del viaxe que fixeron nel pasáu mes d’ochobre per Bolivia y de los sos alcuentros con dellos movimientos sociales del país.

Nel actu, entamáu pol Comite de Solidaridá con America Llatina (COSAL), fadrán proyección de diapositives del viaxe y espondrán les esperiencies de la so visita a Bolivia, nun momentu críticu pa un país que vive na llucha pola nacionalización de los hidrocarburos, ente unes elecciones previstes pal mes d’avientu con posibilidaes de triunfu de les candidatures indíxenes, campesines y anti-neolliberales.

Pilar Fernández Pardo y Hugo Morán defendieron n’entrambos discursos n’asturianu la necesidá de reconocer institucionalmente garantíes llegales pa la supervivencia de la nuestra llingua y adoptaes dende’l consensu social. La presidenta del PP de Xixón y l’alcalde de L.lena pidieron respetu pa la identidá llingüística d’Asturies na so acoyida como nuevos patronos de la Fundación Caveda y Nava.

L’actu celebráu nel Monesteriu de Valdediós el pasáu sábadu 12 valió pa poner en claro que les actitúes positives pa cola normalización social de la llingua asturiana trespasen les llendes de los partíos y representen sensibilidaes paecíes a la hora d’abordar la posibilidá del reconocimientu oficial del idioma. Pa Fernández Pardo “diba ser una barbaridá que pudiera perdese la identidá llingüística d’Asturies” y consideró necesario “dar pasu a les peticiones de reconocimientu, cuando se planteen dende la sensatez y el deséu de concordia, y siempre que la reivindicación de la llingua nun quede atrapada en postulaos mui alloñaos a la nuestra realidá social”. Morán, pel so llau, definió a la nuestra llingua como “instrumentu de comunicación y convivencia del pueblu asturianu” y pidió la defensa activa d’esti “elementu del nuestru patrimoniu” pa ser reconocío oficialmente “dende’l respetu cercanu a la realidá d’Asturies”.

La presidenta del PP xixonés y l’alcalde socialista l.leniegu, amás de presidente de la Federación Asturiana de Conceyos, entraron formar parte de la Fundación Caveda y Nava el pasáu sábadu nun actu qu’escomenzó en Valdediós y remató énte la casa natal de Xosé Caveda y Nava en Villaviciosa.

La Conceyalía de Cultura, Educación y Mocedá del Ayuntamientu Mieres, que preside Diana González, entama les primeres Xornaes Intercultures del municipiu, una iniciativa que tien como oxetu enseñar les distintintes cultures al travies de los sos rasgos identificadores y diferenciadores, pero siempre dende la solidaridá y la igualdá ente los pueblos.

Precisamente la igualdá y la solidaridá son los temes que centren la exposición titulada “¿Racista yo?” que a lo llargo d’estes xornaes va poder visitase nes instalaciones del Institutu d’Enseñanza Secundaria Bernaldo de Quirós.

El programa d’estes Primeres Xornaes Intercultura de Mieres empieza esta tarde, a les 19,30 hores, nel Ateneu de Turón con una charla sobre “El pueblo saharaui hoy”, a cargu de l’Asociación d’Amigos del Pueblu Saharaui y la Delegación Saharaui n’Asturies. Al acabar l’actu va facese una degustación de te.

Les xornaes siguen hasta’l vienres día 18, colos siguientes temes: La cultura xitana, la música portuguesa, la cultura vaqueira, la danza brasileña y la cocina del mundu. Estes charles van facese nel salón d’actos de la Casa la Música de Mieres, a les 19, 30 hores.

El conseyeru de Xusticia y Esteriores del Principáu, Francisco Javier García Valledor afirmó que’l refugue del PP a entamar la reforma l’Estatutu y la poco entusiasta posición del PSOE asturianu al respective “son una grave equivocación”. Pa Valledor el procesu de puxu autonómicu entamáu por Zapatero garró la FSA “col pasu cambiáu”.

El conseyeru d’Izquierda Xunida-Bloque fizo estes declaraciones nel cursu d’una entrevista que publica’l diariu El Comercio na so edición d’esti llunes 14. La reflexón que fai el conseyeru respective a la posición de los socialistes asturianos caltiénse en que la FSA acoyó les reformes entamaes por Zapatero “col pie cambiáu y sobremanera nel métodu escoyíu, de que fueran les propies comunidaes elles mesmes les que lo ficieran”, según Valledor “nin la FSA nin el PP tán avezaos a ello, ye una reflexón qu’enxamás ficieran”.

Pal conseyeru d’IX-BA ye “una grave equivocación” la postura de los dos partíos mayoritarios tocante al Estatutu porque, a xuiciu de García Valledor: “Asturies tien de tener protagonismu y una posición activa na redefinición del modelu d’Estáu”.

La Fundación Príncipe d’Asturies va rindir homenaxe a les personalidaes más destacaes del sieglu XX nun actu que va tener llugar el prósimu 24 de payares, a les 19,30 hores, nel Auditoriu Príncipe Felipe d’Uvieu. Embaxo’l títulu de “Memoria de los Grandes” van reunise na ceremonia los descendientes de dalgunes de les figures más importantes del sieglu pasáu, como M. K. Gandhi, J. F. Kennedy, Winston Churchill, Albert Einstein, Charles Chaplin, Igor Stravinsky, Manuel de Falla, S.S. Juan XXIII, James Joyce, Pablo Neruda, Albert Camus, Jesse Owens, Andrei Sajarov, Jose Ortega y Gasset, Gregorio Marañón, Jean Monnet y Federico García Lorca.

La Fundación prepara tamien una serie d’actos paralelos per distintes localidaes asturianes nos que cuenta cola participan colos familiares directos de los homenaxeaos, col envís d’allegar a la sociedá asturiana la obra y el testimoniu de les persones qu’ayudaron a meyorar el patrimoniu de la humanidá nos sos distintos ámbitos, reconociendo, amás, el so legáu moral, científicu, lliterariu y artísticu.