Sociedá

Izquierda Asturiana (IAS) va celebrar a lo llargo d’estos díes diversos actos conmemorativos del aniversariu de la Revolución del 25 de mayu de 1808, nel que la Xunta Xeneral declaró la soberanía d’Asturies demientres la invasión de los franceses. Amás de la tradicional ofrenda que’l partíu va celebrar mañana, IAS tien organizada una charra del historiador Faustino Zapico asina como la entrega del so primer premiu ’25 de mayu’ a la Coordinadora Ecoloxista d’Asturies (CEA).

Esta tarde, va celebrase a les ocho na Sala que’l Conceyu Abiertu tien na Cai La Gascona, 12, Baxu, d’Uvieu, una charra del historiador y miembru de la Dirección Nacional d’IAS, Faustino Zapico, que lleva por títulu ‘La Revolución de mayu de 1808 (o l’aniciu de la historia contemporánea d’Asturies).

Per otra parte, la entrega del I Premiu 25 de mayu que la Dirección Nacional d’Izquierda Asturiana decidió que fuere pa la Coordinadora Ecoloxista d’Asturies, va tener llugar el prósimu vienres 26 de mayu, a lo llargo d’una cena a la que va dir el portavoz d’IAS Ignaciu Llope y el miembru de la dirección nacional y historiador Faustino Zapico.

El Conceyu Abiertu pola Oficialidá, plataforma integrada por más d’un cientu d’asociaciones polítiques y culturales que nació cola fin de que la oficialidá del asturianu quede contemplada na prósima reforma estatutaria, sigue cola so campaña de movilización social baxo’l nome de Caravana pola Oficialidá qu’esti fin de selmana va percorrer los principales llugares del conceyu de Mieres.

La Caravana pola Oficialidá nel conceyu de Mieres va arrancar el prósimu sábadu día 27 a les diez de la mañana del Campus Universitariu de Barreo, dende va salir faciendo un percorríu que la llevará per Santuyano, Figareo, Turón, Urbies, Ablaña, Muries, Ruturbiu y el cascu urbanu de Mieres del Camín.

Na tarde del mesmu sábadu, el parque Xovellanos de la villa del Caudal va acoyer diverses actividaes culturales ente les que destaquen los xuegos infantiles, conducíos pol grupu El Garrapiellu, qu’empezarán a les seis de la tarde.

Les actuaciones van correr a cargu de los cantantes de tonada Jose Manuel García, Xicu Queipo, Begoña Rodríguez y Noemí Torrada, que van tar acompañaos a la gaita pol mozu Llorián García. De siguío van actuar los grupos folklóricos Ruxidera y L’Artuxu. La caravana va terminar con más canción y baille na Plaza San Xuan del barriu de Requexu.

La conseyera de Cultura, Ana Rosa Migoya, tuvo de reconocer na so comparecencia d’ayeri que “la empresa Air Asturias dixo que la so implatación va retrasase hasta ochobre”, razón pola que les negociaciones queden suspendíes hasta que l’aerollinia zarre les feches de la operación. Nel pasáu mes de febreru, Migoya anunciare la financiación de seis llinies con esta compañía que diben ofrecer “vuelos baratos” a partir d’esti mes de xunu.

Los diputaos populares acusaron a Migoya de “tomar el pelo a tolos asturianos colos vuelos baratos”. “El retrasu na implantación de los vuelos d’Air Asturias súmase a los incumplimientos d’EasyJet que tenía de tener esti añu tres rutes barates y sólo tien la mesma a Londres”, llamentó’l parlamentariu popular, Jose Manuel Felgueres. “El Principáu nun puede volvar más baxu”, sentenció la so compañera de partíu Alejandra Cuetara.

L’amuesa cultural y social que se fai de forma complementaria al Derramerock conocida como’l Derramidea, va cellebrar una nueva edición en Pravia dedicada a la llucha de les muyeres pola llibertá. La proyección de los cortos finalistes del concursu de Moces Productores Cinematográfiques d’Asturies, meses redondes y conciertos van enllenar el programa de la segunda edición d’esti certame que va tener llugar ente los díes 29 de xunu y el 1 de xunetu.

Cortos como ‘Bajar la Música’ y ‘Suena’l camín’ van proyectase nel segundu certame Derramidea, nel que se va poner en marcha tamien la Feria d’Asociaciones Moces y ONGD, cola collaboración del Conseyu de Mocedá del Principáu d’Asturies.

A lo llargo de distintes meses redondes van analizase fenómenos como’l xeneru y la música; les muyeres y la llibertá; o casos de violencia de xeneru como los de Ciudad Juárez y Guatemala. Dientro de les actuaciones musicales va cuntase cola participación de grupos como Amparanoia, Mallory Knox, Jacky Trap y Sonora.

Concursu de graffitis, exposiciones como la dedicada a la figura de Dolores Ibárruri, la visión del xeneru dientro del mundu del rock y la ellaboración d’un DVD con entrevistes a los ponentes nes conferencies del Derramidea, son dalgunes de les actividaes d’un certame que quier sensibilizar a la población sobre la situación que padecen les muyeres, en cualisquier llugar del mundu y cualisquier periódu hestóricu, pola condición de nacer muyeres.

Darreu acaba d’empezar una campaña llamada ‘100 Murales pola Oficialidá’, cola que quier llamar l’atención de la ciudadanía asturiana sobre la necesidá d’oficialidá de la llingua asturiana na prósima reforma estatutaria. Pa ello, les mocedaes nacionalistes proponen esparder a lo menos un cientu de murales peles y cais y carreteres asturianes nos que se demande’l reconocimientu oficial del asturianu.

Darreu pon en marcha esta campaña de reivindicación demientres que dure’l procesu de discutiniu y reforma del Estatutu d’Autonomía d’Asturies, cola intención de facer visible la demanda esistente d’oficialidá de la llingua asturiana.

Les Mocedaes Comunistes d’Asturies van celebrar esta fin de selmana la so tradicional espicha que cada añu tien llugar na casa del PCA n’El Carbayu (Llangreu). Grupos como Testimoniu de la víctima, Desakato y Gomeru; esposiciones fotográfiques, y un coloquiu sobre’l futuru d’Asturies son dalgunes de les actividaes d’esta edición de la espicha de los mozos del PCA.

El vienres día 26 de mayu a les seis de la tarde va inaugurase la espicha de les Mocedaes Comunistes d’Asturies con una esposición sobre’l Festival Mundial de la Mocedá y los Estudiantes de Caracas 2005 a cargu de la fotógrafa Sara Sánchez. Mentes que’l primer conciertu de la fin de selmana va tener llugar a les diez de la nueche, animáu polos grupos Gomeru, Nice, Kallate y Testimoniu de la victima.

El sábadu, a les cinco y media la tarde ‘El futuru d’Asturies’ va ser analizáu cola participacion de Menasa, Duro Felguera, la Plataforma Ciudadana pol Hospital de Paraplexicos, el Comite de la Ciudá Residencial de Perlora, amás de Jose Manuel Martín Ferrer, representando a CCOO del Nalón, y Alejandro López Álvarez, Coordinador d’IX de Llangreu. A la nueche actuarán los grupos Boghura Khan, Marasmo, Bishamon, Desakato y Brigada.

L’equipu de gobiernu mierense afirmó que la Oficina de Normalización Llingüística del conceyu va volver a tar abierta dende güei, depues que se-yos notificare y confirmare la recepción de parte de la Conseyería de Cultura del Principáu d’una subvención destinada pal so mantenientu. Esta situación d’inestabilidá fuere duramente criticada a lo llargo d’estos díes d’atrás polos conceyales d’Izquierda Xunida,qu’acusaron al gobiernu socialista d’abandonar la política de normalización, circunscribiendola únicamente al área de Cultura.

“L’únicu que defende l’asturianu ye’l director de la Casa Cultura”, señaló Beatriz González, conceyala d’Izquierda Xunida d’Asturies nel Ayuntamientu de Mieres, que defendió qu’esta llingua ye “patrimoniu de la rexón”. Precisamente foi esta edil la que denunciare públicamente estos díes el pieslle de la Oficina de Normalización Llingüística pesie a cuntar con una subvención de la Conseyería de Cultura dende diba más d’un mes.

El pasáu mes de setiembre, la dirección xeneral de Cultura destinare 15600 euros pa sofitar a lo llargo de seis meses tala oficina, anque esta nun s’abrió al públicu hasta’l mes d’ochobre y echó’l piesllu enantes de terminar l’añu a la espera d’esta subvención del Principáu. Inestabilidá llaboral y llingüística qu’Izquierda Xunida criticó públicamente y ente la que l’executivu socialista mierense reaccionó volviendo a abrir la Oficina de Normalización.

L’Asociación de Trabayadores de la Normalización Llingüística denuncia falta de control de les subvenciones

L’Ayuntamientu avilesín tien presvisto empezar el prósimu mes de setiembre una serie de cursos d’asturianu, de calter voluntariu, p’aquellos funcionarios municipales que tean interesaos n’afondar nel conocimientu de la llingua. La iniciativa de la conceyalía de Cultura va ponese en marcha al travies de la Oficina de Política Llingüística del conceyu que yá trabaya en cursos d’asturianu p’adultos.

Otres de les iniciatives programaes pa promocionar l’asturianu ente los avilesinos ye la de la dualización de los impresos municipales, pa que tean a disposición de los usuarios nes dos llingües; asina como una campaña pa formentar la presencia de la llingua nos comercios de la ciudá.

L’Ayuntamientu ta ellaborando al tiempu un plan d’estudiu de la realidá llingüística del conceyu, basáu nes varidaes dialectales que s’usen nesa parte d’Asturies.

Tocante a la toponimia avilesina tradicional, l’Ayuntamientu quier llevar la propuesta del conceyu al plenu ordinariu de xunu.

Unos cincuenta artistes asturianos donaron una de les sos obres pa que foren expuestes y subastaes nuna campaña del Conceyu Abiertu pola Oficialidá que va tener como primer llugar d’encuentru col públicu nel Palaciu de Valdecarzana, n’Aviles, a partir d’esti martes. Los organizadores y artistes participantes que con esti xestu apoyen la oficialidá de la llingua asturiana nun descarten la idea de facer d’esta exposición una muestra itinerante per toa Asturies.

Ente los artistes que collaboren con esta iniciativa tán María Jesús Rodríguez, Maite Centol, María Braña, Fernando Alba, Alejandro Mieres, Avelino Sala, Ánxel Nava, Pablo Maojo, Adolfo Manzano, Charo Cimas, Pablo Armesto, Nel Amaro y Francisco Fresno.

Izquierda Asturiana va conmemorar l’aniversariu del 25 de mayu de 1808 con dellos actos ente los que destaca la primer edición del Premiu 25 de Mayu, que con calter añal va concedese a la Coordinadora Ecoloxista d’Asturies.

El premiu quier “reconocer la trayectoria de persones, asociaciones o entidaes que rescamplen pola so defensa de les llibertaes ciudadanes, la defensa de los derechos d’Asturies o l’auto-organización ciudadana”. La Dirección Nacional d’Izquierda Asturiana desplica nun comunicáu qu’escoyó da-y’l premiu 2006 a la Coordinadora Ecoloxista d’Asturies (CEA) pola so “trayectoria constante de defensa del mediu ambiente y la so vinculación y apertura a toa triba de movimientos vecinales, ciudadanos, asociativos, col oxetivu d’algamar una Asturies ecolóxicamente sustentable”.

L’actu d’entrega va facese n’Uviéu durante una cena’l vienres 26 de mayu.