Sociedá

El presidente del Conseyu Consultivu y profesor de la Facultá de Derecho de la Universidá d’Uvieu manifestó ayeri nos cursos de La Granda que’l dictame sobre l’asturianu ‘espeya lo que ye l’estáu d’opinión’ de la sociedá asturiana. Fernández, que consideró que l’informe públicu que nun recomienda la oficialidá de la llingua ye mui estimáu pola mayoría de los asturianos, dixo que’l Conseyu ‘opinó’ sobre la tema, como ‘cuando los llingüistes opinen sobre’l Derechu’.

Preguntáu sobre’l dictame del Conseyu Consultivu poco favorable a la oficialidá del asturianu, Bernardo Fernández afirmó ente los periodistes que ‘cuando se nos echa en cara que quiximos ser sociólogos o llingüistes, yo digo que nun facemos otro qu’espeyar lo que ye l’estáu d’opinión. Analicemos xurídicamente la tema teniendo en cuenta la so situación material. Tratemos de ser respetuosos, que ye lo que yo pidiría tamien a la hora de facer una llectura sobre’l dictame. Sobre esti aspectu, toos opinamos. Como cuando los filológos falen de Derechu’.

Fernández, que defende les manifestaciones del dictame nes que se diz que nun hai demanda social pa la cooficialidá del asturianu, aseguró sentise ‘sorprendíu’ poles reacciones negatives ente l’informe. ‘Lo que tengo que dicir ta nel propiu dictame’, argumentó pa la prensa.

Nos últimos díes, abondos colectivos, grupos políticos y xuristes atacaron les afirmaciones del Conseyu Consultivu precisamente por tratase de simples opiniones en vez de verdaderos análisis xurídicos. Ún de los últimos n’atacar esti informe foi’l profesor de Derechu Alministrativu de la Universidá d’Uvieu, Jose Manuel Perez, qu’aseguró que’l dictame ‘comete un lingüicidiu col asturianu’.

El 3 de xunetu del añu 2003, les tres fuerces polítiques que formen l’Executivu autonómicu (PSOE ya Izquierda Xunida-Bloque por Asturies) roblaben un alcuerdu de Gobiernu pa la llexislatura que teníen per delantre. Tres de dalgunes crisis importantes nel mesmu, como’l recien nomamientu del cargu de la Procuradora Xeneral, los socios de gobiernu analizaron la situación de talu alcuerdu, valorando la marcha del mesmu positivamente pesie a les discrepancies conocíes, y manifestaron la voluntá de llevalu alantre hasta la fin de la llexislatura, cuando’l prósimu mes de mayu se convoquen les prósimes ellecciones autonómiques n’Asturies.

Mesmo Izquierda Xunida como Bloque por Asturies y el Partíu Socialista, manifestaron ayeri públicamente la so intención de continuar col alcuerdu de gobiernu, ‘na busca de dar respuesta a les preocupaciones de los ciudadanos’, en palabres de Jesús Iglesias, coordinador xeneral d’IX y prósimu candidatu a les ellecciones autonómiques.

Pesie a les conocíes crisis abiertes ente los socios de gobiernu, na valoración de la marcha del alcuerdu de gobiernu les tres fuerces polítiques coincidieron n’estimar la ‘sintonía y cordialidá’ que mandó na acción de gobiernu ‘qu’ayudó a modernizar les estructures del Principáu afitándolu dientro de los estándares estatales y europeos’.

Na comparecencia pública d’ayeri, el presidente del Executivu asturianu, Vicente Álvarez Areces aseguró que ‘les tres fuerces polítiques tamos acordies n’empezar la reforma estatutaria’, debate que Javier Fernández, secretariu xeneral de los socialistes asturianos, aprovechó pa convidar al PP pa que se sumase nel siguiente periodu de sesiones.

Nes estimaciones que trataron na so reunión, denguna de les tres fuerces de gobiernu quixo valorar el grau de cumplimientu del pactu, llimitándose a asegurar que ‘nos campos fundamentales se fixeron grandes avances’, especialmente nos campos de desarrollu económicu y social, del crecimientu del emplegu, les polítiques sociales o les midides medioambientales. Sicasí, almitieron que queden dalgunes midides por poner en marcha, como los proyectos de llei sobre Derechos y Deberos de los Usuarios de la sanidá y la llei del Centru Comunitariu de Transfusiones.

Otru de los esfuerzos sobre’l que piensa trabayar l’Executivu ye nel llogru de les 15000 viviendes sometíes a dalgún rexime de protección, la modernización tecnolóxica de l’Alministración rexonal, asina como l’impulsu a la emigración cola aprobación de la nueva Llei d’Asturianía.

No tocante al tema llingüísticu, Areces manifestó que yera ‘mui importante”l trabayu llográu hasta la fecha, anque toos coincidieron en que hai que da-y ‘más puxu’ al Plan de Normalización, aprobando los espedientes toponímicos, asina como l’usu del asturianu y del gallego-asturianu mesmo nel ente públicu de comunicación del Principáu como na publicidá institucional.

El Bloque Nacionalista Galego (BNG) ta acabante proponer la selmana pasada que la radio y la televisión públiques galleges incorporen informaciones sobro’l Navia-Eo na so programación y qu’aumente la so señal n’Asturies y otros territorios que llenden con Galicia y “que se encuentran fuera de la comunidad autónoma pero emplean el mismo idioma», faciendo referencia al gallegu.

La noticia, recoyida esti día pol diariu asturianu La Nueva España, fala de que la propuesta pa desendolcar conteníos relacionaos con fasteres fronterices nes emisiones de la RTVG foi bien acoyida pol director de la Compañía de Radio y Televisión Gallega (CRTVG), Benigno Sánchez, que-y tresmitió al Bloque que compartía la so sensibilidá. Poro, descartó la posibilidá de meyorar la recepción de la señal por cuestiones llegales.

La editorial El búho viajero presenta esta tarde en Lleón una cuidada selección de testos colos que quier remembrar el primer centenariu de la espublización de ‘El dialecto leones’ del llingüista Ramón Menendez Pidal que ‘descubrió’ pa la comunidá filolóxica la esistencia del dominiu llingüísticu asturlleones. Amás d’incluyir los artículos de Pidal, el volume amiesta dalgunes de les sos encuestes, una selección de testos actuales na llingua, un analís sobre’l so estáu per parte del escritor Roberto González-Quevedo, asina como un cede onde se puede sentir la fala de viva voz xunto con música tradicional del grupu Son del Cordel.

La editorial El búho viajero quier celebrar el centenariu de la primer edición d’ El dialecto leones de Ramón Menendez Pidal con una reedición d’esta obra que supunxo una nueva mirada al mapa llingüísticu de la península. A los testos pidalianos, mesmo artículos que los sos trabayos d’encuestación en tol territoriu asturlleones, amiestase un estudiu de Roberto González-Quevedo nel que reflexona sobre l’estáu actual de la llingua.

P’acompañar esti estudiu, la editorial axunta testos d’autores actuales como Severiano Álvarez, Emilce Núñez, Eva y Roberto González, Teodora Barrio, Xosepe Vega, Hector Xil y Abel Pardo, ente otros.

Editada en collaboración cola Diputación de Lleón, l’antoloxía de relatos puede escuchase nun cede qu’acompaña los testos, xunto con una selección de música tradicional interpretaos pol grupu Son del Cordel como son bailles del país y xotes de rabel, ente otres. La editorial El búho viajero, aprovechando la presentación d’esta obra, aseguró que tien pensao siguir apostando pola espublización de testos qu’ayuden a recuperar la llingua asturlleonesa.

La mesa del Parlamentu Européu aprobó esti llunes l’emplegu del gallegu, euskera, catalán y valencianu en toles comunicaciones escrites de los ciudadanos, gracies al votu de calidá del presidente del Parlamentu Européu, el socialista español Josep Borrell, qu’inclinó la balanza pa que ganaren la votación los siete miembros de la Mesa favoratibles al emplegu de les llingües minoritaries escontra de los otros siete, del PP Européu, que votaben contra la decisión.

Tolos vicepresidentes del Partíu Popular europeo, ente ellos l’español Aleix Vidal-Quadras, votaron en contra, mientres que’l restu los grupos políticos votaron a favor. La Mesa nun aceptó que’l vicepresidente lliberal polacu, Januzs Onyszkiewicz, que no asistió a la xunta, delegara’l so votu positivo nel so compañeru italianu, lo que forzó l’emplegu del votu calidá del presidente.

La decisión ye perimportante pala normalización social y política de les llingües minoritaries d’españa, cola salvedá del asturianu, porque va permitir a los ciudadanos escribir y recibir rempuestes de la institución nestes llingües cooficiales.

Na páxina web del Parlamentu ta previsto enllazar con una páxina española na que van ufiertase tornaos los documentos más importantes que se producen nel Parlamentu.

La socialista María Antonia Fernández Felgueroso tomó posesión ayeri del cargu de Procuradora Xeneral del Pueblu d’Asturies nun actu al que nun asistió dengún miembru de la coalición Izquierda Xunida-Bloque por Asturies que, pela so parte, emitieron un comunicáu nel que-y solicitaben a la Procuradora que, contra’l pactu robláu ente PSOE y PP, ‘nome a un alxuntu de la so confianza y dafechu independiente’.

El grupu parlamentariu d’Izquierda Xunida-Bloque por Asturies emitía esti comunicáu nel que-y pidía a la recien nomada Procuradora Xeneral qu’aplicare ‘la lletra y l’espíritu’ de la llei (trabayada dende Izquierda Xunida), nomando un alxuntu que fuere de la so confianza ‘y dafechu indenpendiente’, porque esta sedría la única forma de ‘reforzar la confianza de la sociedá nesta nueva institución’, teniendo asina ‘la másima credibilidá ciudadana’ pa facer el so trabayu.

La presidenta de l’Academia de la Llingua Asturiana y decana de la Facultá de Filoloxia de la Universidá d’Uvieu, Ana Mª Cano tachó l’informe ellaboráu pol Conseyu Consultivu del Principáu, no tocante a la oficialidá del asturianu na prósima reforma del Estatutu d’Autonomía, como ‘alarmista y profundamente tendenciosu’. Nuna entrevista espublizada esta mañana pol periódicu La Nueva España, Cano acusó a los miembros del Conseyu Consultivu d’atribuíse ‘competencies que nun-yos correspuenden, faciendo a veces xuicios de valor que nun vienen al casu’.

Nuna entrevista na qu’Ana Cano retruca a les afirmaciones del Conseyu Consultivu na so opinión sobre la poca comeniencia d’oficializar l’asturianu na prósima reforma del Estatutu d’Autonomía, la presidenta de l’Academia de la Llingua Asturiana entrúgase polos argumentos filolóxicos o llingüísticos colos que los miembros responsables de talu informe aseguren que l’asturianu nun esiste como llingua, sinón como ‘un conxuntu de modalidaes llingüístiques’.

La decana de la Facultá de Filoloxía de la Universidá d’Uvieu tachó d’ ‘inconcebible que s’atrevan a cuestionar la esistencia del asturianu como llingua cuando eso yá lo diz la llexislación del propiu Parlamentu asturianu, la esistencia de l’ALLA, la Universidá, la comunidá científica internacional, la UNESCO y hasta’l hasta el International Committee for the Safeguarding of Linguistic Rights in Asturies (ICSLRA)’.

Preguntada pola presencia de Rodríguez Vigil y Bernardo Fernández nel Conseyu Consultivu, políticos socialistes qu’en más d’una ocasión se manifestaron a la contra de la oficialidá, Ana Cano ironizó sobre que ‘les sos postures con bien conocíes, asina como los fundamentos xurídicos nos que les afiten. Lo que nun sabíemos hasta agora ye que fueren espertos llingüistes, sociollingüistes, sociólogos y hasta antropólogos’.

Lleer la entrevista completa

La X edición de la Fiesta de la Oficialidá de Bimenes volvió desixir un añu más el reconocimientu llegal pa la llingua asturiana nel Estatutu d’Autonomía d’Asturies, nun pregón a cargu del filólogu y escritor, Xulio Vixil Castañón, que foi más duru que nunca colos políticos rexonales. N’especial col presidente del Gobiernu, Vicente Alberto Alvarez Areces, al que tachó de presidir “l’asturfobia”.

Nel pregón lleíu en Xenra esti pasáu sábadu, Xulio Vixil Castañón clamó pola denfesa del asturianu, “como una defensa de nós mesmos, yá que lo más importante de la cultura de cualisquier pueblu ye’l so idioma”. Por esta razón, Vixil criticó a los anteriores gobiernos asturianos, porque toos ellos negaron el derechu de los ciudadanos a falar la so llingua propia, y especialmente llevó les sos crítiques a la Federación Socialista Asturiana y a Ana Rosa Migoya, “conseyera d’incultura”, en palabres de Vixil, “por dexar morrer les fales de los asturianos”.

Na tarde del vienres, el teniente d’alcalde de Miranda do Douro, Antonio Carçao, el xefe de política llingüistica del Principáu, Ramón d’Andres, y l’alcade del conceyu yerbatu, Emilio González, fixeron entrega del premiu de Cuentos pola Oficialidá, que nesta decima edición correspondió-y a Quique Faes, algamando’l segundu y tercer premiu, Pablo Rodríguez Medina y Pablo X. Suárez, respectivamente.

Los actos de la fiesta de la oficialidá amás de cuntar colos tradicionales conciertos, talleres d’artesanía y la so xinta tradicional a base de fabada asturiana y arroz con llechi, remataron cola misa n’asturianu oficiada pol sacerdote Jose Manuel García, que definió la llingua asturiana como “un derechu humanu” que, como tal, tien de ser reconocíu.

La tertulia cultural xixonesa d’El Garrapiellu organizó esti vienres que pasó la so XVI Marcha a Cuadonga, actu nel que’l colectivu, aprovechando’l so pasu pela localidá de Sietes, rindió homenaxe a la memoria del etnógrafu Rafael Balbín Loredo, fallecíu hai agora un añu.

El colectivu cultural El Garrapiellu, del que fuere collaborador Rafa Balbín, aprovechó’l so homenaxe pa volver pidir que’l conxuntu etnográficu de Sietes y el centru d’interpretación del horru que se va abrir nesta localidá lleve’l nome d’esti gran defensor de la cultura asturiana. Pa ello, l’asociación xixonesa yá tien mandao la correspondiente solicitú a la Conseyería de Cultura y al Ayuntamientu de Villaviciosa.

Otres de les piticiones d’El Garrapiellu pa honrar la memoria de Rafa Balbín, ye la de crear una beca d’investigación al so nome dedicada a la recuperación del patrimoniu popular, asina como la de da-y un homenaxe colectivu y una estela diseñada por un artista asturianu na ruta los Molinos de Profundu, que Balbín estudió pa depues espublizar un llibro sobre estos verdaderos descubrimientos hidráulicos.

Nesti actu, que valió tamien pa reclamar a les instituciones la defensa del patrimoniu llingüísticu asturianu, l’investigador Fernando Ornosa, representante del Conceyu Abiertu pola Oficialidá, recordó la memoria d’Igor Medio y Carlos Redondo, miembros de Felpeyu fallecíos la pasada fin de selmana.

El presidente del gobiernu del Principiáu d’Asturies, Vicente Álvarez Areces va presidir la Comisión del Arcu Atlánticu hasta 2008 con opción a dos años más. Asina resultó escoyíu na segunda xornada de l’Asamblea Xeneral de la Comisión celebrada en Xixón, na que se renovó el Buró políticu del Arcu Atlánticu.

Como primer decisión Alvarez Areces anunció la propuesta pa secretariu de la comisión del Arcu Atlánticu de Javier Velasco, director de la Oficina del Principáu en Bruseles, y la prósima reunión col comisariu europeu Joe Borg, na que piensa tresllada-y les conclusiones de l’Asamblea Xeneral.

Nel so primer discursu al frente de la Comisión Areces destacó especialmente la importancia de les nueves víes de tresporte marítimu como pilar del prósimu mandatu nel que’l Presidente aspira a potenciar les llamaes autopies del mar y la innovación.

Tamien reconoció como oxetivu primordial l’establecer “una política marítima integrada”, que meyore’l desarrollu de les actividaes propies del mar, como la pesca, el tresporte y la seguridá, les enerxíes renovables, el turismu, el mediu ambiente, l’urbanismu y la industria.

Nel programa d’actuaciones que presentó’l presidente del Principáu tienen especial importancia la necesidá d’impuslar la pesca como creador de riqueza y emplegu n’Europa y especialmente n’Asturies y la busca de la cooperación ente les rexones pa llograr que la Comisión se vuelva’l principal interlocutor ente les instituciones europees pa tolos asuntos del especiu marítimu atlánticu.

Otru de los oxetivos principales del programa pal nuevu periodi va ser l’apueste pola innovación mediante’l trabayu materia d’investigación y desarrollu, la cooperación ente centros tecnolóxicos, universidaes y empreses y la inversión en capital humanu.