Xulio Vixil critica ‘l’asturfobia’ nel pregón de la X Fiesta de la Oficialidá de Bimenes

La X edición de la Fiesta de la Oficialidá de Bimenes volvió desixir un añu más el reconocimientu llegal pa la llingua asturiana nel Estatutu d’Autonomía d’Asturies, nun pregón a cargu del filólogu y escritor, Xulio Vixil Castañón, que foi más duru que nunca colos políticos rexonales. N’especial col presidente del Gobiernu, Vicente Alberto Alvarez Areces, al que tachó de presidir “l’asturfobia”.

Nel pregón lleíu en Xenra esti pasáu sábadu, Xulio Vixil Castañón clamó pola denfesa del asturianu, “como una defensa de nós mesmos, yá que lo más importante de la cultura de cualisquier pueblu ye’l so idioma”. Por esta razón, Vixil criticó a los anteriores gobiernos asturianos, porque toos ellos negaron el derechu de los ciudadanos a falar la so llingua propia, y especialmente llevó les sos crítiques a la Federación Socialista Asturiana y a Ana Rosa Migoya, “conseyera d’incultura”, en palabres de Vixil, “por dexar morrer les fales de los asturianos”.

Na tarde del vienres, el teniente d’alcalde de Miranda do Douro, Antonio Carçao, el xefe de política llingüistica del Principáu, Ramón d’Andres, y l’alcade del conceyu yerbatu, Emilio González, fixeron entrega del premiu de Cuentos pola Oficialidá, que nesta decima edición correspondió-y a Quique Faes, algamando’l segundu y tercer premiu, Pablo Rodríguez Medina y Pablo X. Suárez, respectivamente.

Los actos de la fiesta de la oficialidá amás de cuntar colos tradicionales conciertos, talleres d’artesanía y la so xinta tradicional a base de fabada asturiana y arroz con llechi, remataron cola misa n’asturianu oficiada pol sacerdote Jose Manuel García, que definió la llingua asturiana como “un derechu humanu” que, como tal, tien de ser reconocíu.