Sociedá

L´Asociación de Trabayadores de la Normalización Llingüística denunció ayeri’l pieslle del Serviciu de Normalización Llingüística, que pa ellos respuende “a la falta d’interés de les alministraciones pa col llabor de los Servicios de Normalización Llingüística”. El casu de Mieres, “ye sangrante por demás, yá l’añu pasáu tuvimos que denunciar la mesma situación y ver cómo l’alcalde salía respondiendo a la nuestra denuncia con ocurrencies”.

Pa l’Asociación “la xera de dignificación social del asturianu requier un trabayu seriu, continuáu, planificáu y que solo a mediu y llargu plazu pue dar frutu valorable, por eso ye necesaria la presencia d’un técnicu que se dedique a facer esi trabayu durante tol añu”. El Serviciu de Mieres escomencipió´l so llabor nel mes de payares del 2005 y tuvo abiertu hasta avientu del mesmu añu. Abrió otra vuelta a mediaos de mayu y zarró nel mes de payares del 2006. Na primavera del 2007 volvió de nuevo a abrise pa zarrase el martes 12 d’esti mes de setiembre.

Pa los denunciantes “esta situación intermitente emparamenta por demás el desenvolvimientu normal de les campañes que’l serviciu tien pendientes y amuesa una falta total de compromisu d’un Conceyu tan importante y significativu como Mieres na recuperación seria y planificada de la nuesa llingua”. Pero amás, añaden”la custión ye más grave, porque Mieres recibe una subvención de la Conseyería pa tener el serviciu abiertu, atender al públicu y facer campañes de normalización llingüística”.

L´Asociación de Trabayadores de la Normalización Llingüística “reclama una vez más la necesidá de que la Conseyería estableza un sistema de rellación colos Conceyos que permita la continuidá de los servicios de normalización”. Esto tendría de vese na firma d’un conveniu, la convocatoria de places fixes de plantiya, la concreción llegal d’una Rede de Normalización y el siguimientu necesariu del funcionamientu de los Servicios, yá que tán subvencionaos con partíes presupuestaries propies, toes estes son decisiones polítiques necesaries pa que’l llabor de normalización llingüística, lo demás ye pa ellos “xesto pa la galería o sea flor d’un día que s’esbarata énte la primer dificultá”.

Mocedá d’Izquierda Asturiana (MIAS), estaya de mocedá del partíu Izquierda Asturiana (IAS), volvió ayeri a desixir públicamente “la vuelta a la normalidá de les seleiciones deportives asturianes, tres d’un quinqueniu d’inactividá nel tarrén futbolísticu, por exemplu, lo mesmo que na mayoría de modalidaes deportives, que tamién siguen secuestraes.”

A xuiciu de la Xunta Permanente de mias>>, esti fechu “afita l’interés d’esti gobiernu -con Tini Areces al frente- de desaniciar cualquier tipu de rasgu identitariu que nos vincule como asturianos y asturianes hasta nesti tarrén deportivu, como yá fai efectivamente nel tarrén llingüísticu o cultural.”

Del mesmu mou, la Xunta Permanente de MIAS denuncia que “les autoridaes faen del citáu partíu de la seleición española un actu d’autoafirmación española con un despliegue de merchandising, banderes y eslóganes ultranacionalistes cola complicidá y presencia de les máximes autoridaes llocales.” Por too ello, dende Mocedá d’Izquierda Asturiana dexísese al executivu asturianu “que caltenga’l mesmu sofitu institucional y políticu pa col deporte asturianu que pa cola “selección española”, que carez añu tres añu la marxinación d’un presidente y un gobiernu que s’avergoña de ser asturianu.”

Nel comunicáu de prensa nel qu’asoleyaben el so paecer, ínstase tamién al gobiernu encabezáu por Álvarez Areces a que, urxentemente, “tramite la oficialidá de les seleiciones deportives asturianes d’una vegada por toes, permitiendo la so competición n’eventos deportivos de tou calter, acabando col ostracismu nel que tienen al deporte d’esti País dende bien d’años.“

El pasáu miércoles aconceyó la Xunta Direutiva del PP de Xixón. Nesi alcuentru alcordóse por unanimidá nomar al escritor y xestor cultural Presidente de la Comisión de Cooperación y Solidaridá. Esta comisión ye la encargada del estudiu y siguimientu de les polítiques municipales d’apoyu y solidaridá pa con otros países, asina como d’analizar la problemática del mundu la inmigración, afitando propuestes ya idees dende los postulaos d’esti partíu de centru derecha. La decisión del Partíu Popular paez siguir afitando la presencia d’asturianistes en puestos de responsabilidá de los partíos estatales.

Humberto Gonzali fuera igualmente confirmáu como representante del PP na Xunta Rectora de la Fundación Municipal de Cultura, Educación y Universidá Popular de Xixón nel Plenu del Ayuntamientu celebráu’l día 13 de xunetu. Figuró na candidatura popular a les anteriores elecciones municipales y ye miembru de la direutiva local del PP dende’l Congresu celebráu en setiembre de 2006.

Nuna asamblea xeneral del Conceyu Abiertu pola Oficialidá (CAO) celebrada ayeri n’Uviéu anuncióse la manifestación que se va celebrar el 24 de payares próximu peles casi d’Uviéu. Que pa los responsables “quier dar un saltu cuantitativu y cualitativu a les movilizaciones a favor del asturianu aumentando la presión na cai según se va acercando la reforma d’estatutu asturianu”.

Representantes d’organizaciones polítiques, sindicales y colectivos sociales sofitaron l’actu cola so presencia. La manifestación va salir a les 18:00 hores de la Estación del Norte d’Uviéu col recorríu habitual hasta la Plaza de la Catedral, pero la novedá ye que se tán organizando distintes marches que lleguen a Uviéu pa xuntase toes nuna na cai Uría.

Dempués del sonáu nomamientu de Consuelo Vega al frente de la Dirección Xeneral de Cultura y Política Llingüística y la comunicación fecha por Ramón d’Andrés dando anuncia de la so intención de nun siguir como Xefe de la Oficina de Política Llingüística va poques selmanes, faltaba conocer el nome de la persona que diba ponese al frente de la Oficina. sustitutu D’Andrés. La Conseyera de Cultura dio esta fin de selmana’l nome: María Antonia Pedregal Montes.

María Antonia Pedregal Montes, dedicada hasta agora al trabayu silenciosu de la investigación y a les clases, apaez na escena como una persona ayena a dellos enfrentamientos que caltuvieron sectores estremaos del asturianismu na pasada llexislatura y como la mano drecha de Consuelo Vega, cargu inmediatamente penriba d’ella.

Pedregal Montes ye hestoriadora y profesora de secundaria, autora d’una bayurosa producción de trabayos d’investigación filolóxica y hestórica. Nel apartáu de toponimia destaquen los tres cartafueyos editaos pola Academia de la Llingua Asturiana cola toponimia de la parroquia de Santa Mariña de Piedramuelle (Uviéu), la ‘Documentación de les parroquies de Narzana y Santiago’ (Sariegu) y la ‘Toponimia documentada de la parroquia de San Román de Sariegu’. Como profesora participó apocayá en cursos organizaos pola Oficina de Política Llingüística.

Como investigadora de la cultura tradicional ye habitual de la revista ‘Cultures’ y editó artículos como ‘La ellaboración del pan en Sariegu’, ‘Trabayos tocantes a la ganadería y andar a la yerba en Sariegu’, ‘El samartín en Sariegu’, ‘Aspeutos económicos, sociales y mentales de la matanza’l gochu en Tene (Quirós)’, ‘La ellaboración de sidra en Sariegu: una actividá económica tradicional’ o ‘Carauterización toponímica de Santa Mariña de Piedramuelle: Estudiu hestóricu y etimolóxicu. (I) Orografía y elementos físicos’, fechu a comuña col profesor Xulio Viejo. Otros artículos de la nueva Xefa de la Oficina de Política Llingüística son “Apéu de la Granxa de Villagarcía y términos de Berros (Sariegu) fechu nel añu 1480 pol monesteriu de Santa María de Valdediós””Carauterización toponímica de Santa Mariña de Piedramuelle: Estudiu hestóricu y etimolóxicu (II). El mundu natural y l’espaciu agrariu”.

En castellán tien espublizaos artículos d’ensayu hestóricu como ‘La creación del espacio histórico en Tene (Quirós, Asturias)’, ‘Evolución histórica del territorio de Santo Adriano y génesis del poblamiento medieval’, ‘Santo Adriano de Tuñón: Historia de un territorio en los siglos de transición’, ‘Moneda medieval en Asturies: Hallazgos en Santa María de Tina y San Salvador de Valdediós’ o ‘Fuentes arqueológicas relacionadas con San Salvador de Valdediós’.

Esti vienres abrióse al públicu en Xixón el quintu Salón del Llibru Asturianu na cai Francisco Tomás y Valiente, entamáu pol Gremiu d’Editores d’Asturies, qu’axunta a les venti editoriales qu’hai na Comunidá: Trabe, Abbat, Alpala Libros, Publicaciones Ámbitu, CICEES (Centro de Iniciativas Culturales), KRK, Llibros del Pexe, Madú, Picu Urriellu, Pintar Pintar, Septem, Trea y Yaganes

La carpa, d’unos cincuenta metros cuadraos y asitiada bien cerca de la Plaza’l Parchís de Xixón, va cuntar cola mayor parte del fondu bibliográficu de les editoriales asturianes p’averalu al públicu asturianu y a la xente que visita Asturies nestes feches.

A lo llargo de los díez díes que va durar el Salón del Llibru Asturianu van presentar obres Fernando del Busto, Cristina Muñiz, Víctor Alperi, Iván de Santiago y Xaviel Vilareyo ente otros. Amás, la editorial Pintar Pintar va entamar unos talleres pa los neños.

L’horariu d’apertura ye, hasta’l 2 de setiembre, de llunes a vienres d’11:00 a 14:00 hores y de 17:00 a 21:00 hores. Mientres que les fines de selmana va ser d’11:30 a 14:30 hores y de 16:30 a 21.30 hores.

El cantautor Rafa Lorenzo va dar un conciertu esti domingu que vien nel nuevu teatru del Institutu de L.luarca. Lorenzo va interpretar los cantares del so discu caberu ‘Primos hermanos’, a puntu d’asoleyase y qu’inclúi los seis poemes gallegos de Federico García Lorca y otros seis cantares n’asturianu occidental.

Nel recital, Rafa Lorenzo tará acompañáu pol poeta y narrador José María Peláez, ‘Peltó’; la cantante Nati González; el pianista Marcos Maoxu; el baxista-guitarrista Rafito Lorenzo, fíu del cantautor, y el percusionista Jorge Cambareli.

Redacción.

L’Asociación Cultura Zamorana ‘Furmientu’, que trabaya pola recuperación del patrimoniu oral de la provincia de Zamora ta acabante d’asoleyar el númberu 10 de la so revista de llingüística asturlleonesa, el que correspuende a los meses de xunetu, agostu y setiembre. La revista recueye testos d’estudiu y lliterarios sobre la fala asturiana de Zamora.

Nesti númberu la revista recueye una sección de noticies onde esponen novedaes como l’apaición d’un estudiu na revista ‘Lletres Asturianes’ sobre la fala de Zamora o l’apadrinamientu de pallabres del tueru asturlleones pol presidente Zapatero. Amás, convoquen el segundu concursu de vocabularios tradicionales.

La revista inclúi los estudios ‘Toponimia zamorana: ¿Yagona o Llagona?’ de Severino Alonso, ‘La conjunción ‘ia’ en Hermisende’ d’Alfredo Hernández y na parte lliteraria testos de Juan Andres Oria. La revista pue descargase en PDF n’internet o pidise escontra rembolsu.

Lleer ‘El Llumbreiru’

L’Asociación de Trabayadores de la Normalización Llingüística amuesa esti día nun comunicáu la so “indignación” pola “falta de respetu del gobiernu asturianu coles últimes midíes que ta tomando col asturianu”, al referise a la decisión . Los trabayadores de les Oficines municipales de normalización atalanten que “estos díes ta acabándose colo poco que se fexo na lexislatura anterior respecto a la señalética billingüe n’asturianu”.

L’Asociación canienta que “retirar les señales y impresos billingües qu’había nes dos úniques conseyeríes nes que l’asturianu tenía una presencia mínima” ye un exemplu del facer del nuevu gobiernu y acusa a la Conseyera de Bienestar Social, Pilar Rodríguez, de suprimir documentación billingüe. Sigún l’Asociación, “estes coses demuestren claramente que l’oxetivu inmediatu d’esti gobiernu ye echar abaxo cualquier presencia de la llingua asturiana p’acabar col asturianu d’una vez por toes, por eso cuando falen de que la oficialidá nun ye necesaria y qu’ellos tán a favor de la protección nun busquen más qu’enredar y engañar a la sociedá”.

Redacción.

La Xunta pola Defensa de la Llingua Asturiana fizo públicu’l so malestar poles primeres midíes tomaes pol gobiernu monocolor d’Areces poles qu’esti s’estrenó “faciendo desapaecer la llingua asturiana de los pocos rótulos oficiales de les conseyeríes onde taba presente”, lo que pa los responsables de la XPDLA ye “una declaración d’intenciones contundente que demuestra que la eliminación de la llingua asturiana ye una prioridá inaplazable pal nuevu gobiernu d’Areces”.

La Xunta pola Defensa de la Llingua Asturiana quixo amás denunciar “l’actitú hipócrita de los representantes políticos d’esti gobiernu, qu’en declaraciones a los medios dicen que tán a favor de la protección del asturianu al tiempu que na so acción de gobiernu amuesen síntomes d’alerxa patolóxica ente la presencia de la llingua asturiana”. Pa la XPDLA “da-yos perceguera l’asturianu y nun son a disimulalo”.

La XPDLA remata’l comunicáu comentando que “con estes actuaciones queda más claro entá que’l discursu anti-oficialidá d’esti executivu nun ye otro que la plasmación política de los sos prexuicios” y que’l gobiernu d’Areces dexa claru “el so apueste por mantener la marxinación del asturianu y la falta de derechos llingüísticos pa les persones que lo falen”.

Páxina web de la Xunta pola Defensa de la Llingua Asturiana