Mieres queda ensin Serviciu de Normalización Llingüística

L´Asociación de Trabayadores de la Normalización Llingüística denunció ayeri’l pieslle del Serviciu de Normalización Llingüística, que pa ellos respuende “a la falta d’interés de les alministraciones pa col llabor de los Servicios de Normalización Llingüística”. El casu de Mieres, “ye sangrante por demás, yá l’añu pasáu tuvimos que denunciar la mesma situación y ver cómo l’alcalde salía respondiendo a la nuestra denuncia con ocurrencies”.

Pa l’Asociación “la xera de dignificación social del asturianu requier un trabayu seriu, continuáu, planificáu y que solo a mediu y llargu plazu pue dar frutu valorable, por eso ye necesaria la presencia d’un técnicu que se dedique a facer esi trabayu durante tol añu”. El Serviciu de Mieres escomencipió´l so llabor nel mes de payares del 2005 y tuvo abiertu hasta avientu del mesmu añu. Abrió otra vuelta a mediaos de mayu y zarró nel mes de payares del 2006. Na primavera del 2007 volvió de nuevo a abrise pa zarrase el martes 12 d’esti mes de setiembre.

Pa los denunciantes “esta situación intermitente emparamenta por demás el desenvolvimientu normal de les campañes que’l serviciu tien pendientes y amuesa una falta total de compromisu d’un Conceyu tan importante y significativu como Mieres na recuperación seria y planificada de la nuesa llingua”. Pero amás, añaden”la custión ye más grave, porque Mieres recibe una subvención de la Conseyería pa tener el serviciu abiertu, atender al públicu y facer campañes de normalización llingüística”.

L´Asociación de Trabayadores de la Normalización Llingüística “reclama una vez más la necesidá de que la Conseyería estableza un sistema de rellación colos Conceyos que permita la continuidá de los servicios de normalización”. Esto tendría de vese na firma d’un conveniu, la convocatoria de places fixes de plantiya, la concreción llegal d’una Rede de Normalización y el siguimientu necesariu del funcionamientu de los Servicios, yá que tán subvencionaos con partíes presupuestaries propies, toes estes son decisiones polítiques necesaries pa que’l llabor de normalización llingüística, lo demás ye pa ellos “xesto pa la galería o sea flor d’un día que s’esbarata énte la primer dificultá”.