Sociedá

L’agrupación de la Xunta pola Defenda de la Llingua Asturiana en Xixón entamó la selmana pasada les les xornaes “Llingua y Normalización”. Les charres son nel llocal de Sestaferia, asitiáu na cai Joaquín Alonso Bonet, 3, y a partir de les 20.00 hores.

Pa güe, xueves 18, el tema escoyíu ye’l procesu de normalización nos conceyos.

L’Auditoriu Municipal de Santiso d’Abres, va acoyer esti sábadu 20 de marzu a partir de les seis de la tarde, un actu que quier “axuntar y facer venceyamientu cultural y texíu social”, al traviés de la presentación de producciones culturales en gallego-asturianu. L’actividá lleva por nome “Pálpitos da terra” y n’ella van participar los escritores Arturo Álvarez y Aurora G. Rivas, xunto alos músicos de Folkgazais y l’arte escultóricu de Fernando Villapol.

Arturo Álvarez Fernández va presentar “Volta de Paso”, el so llibru últimu de poesía en gallego-asturianu, asoleyáu por Suburbia Ediciones. Moncho García, de l’Asociación Rapalacois, presentará’l llibru.

Aurora García Rivas va presentar dos obres, “As razóis d’Anxélica”, la primer novela en gallego-asturianu, asoleyada por Editorial Trabe; y la torna al portugués de “Contos ducia e media d’eles”, llibru de cuentos, asoleyáu por D&G Edições. Humberto Gonzali, escritor, va presentar les obres.

Amás van dase a conocer delles escultures de Fernando Villapol Parapar y va poder sentise la música del primer discu de Folkgazais , “Cama de Folkga”, que va presentar Félix Menéndez, de l’Asociación Polavila.

Al actu van asistir amás la Directora Xeneral de Política Llingüística del Principáu d’Asturies, Consuelo Vega; l’Alcaldesa de Santiso d’Abres, María Goretti Quintana Rey; el conceyal de Cultura del Ayuntamientu de Xixón, Justo Vilabrille y el presidente de l’Asociación Cultural San Tirso del Eo.

El próximu xueves, 18 de marzu, a les 19.30 h., nel Salón d’Actos de la Cátedra Gaspar Melchor de Xovellanos d’Estensión Universitaria de la Universidá d’Uviéu, asitiada na vieya Escuela de Comerciu de Xixón, Juan Manuel Bonet va pronunciar la conferencia “Tres voces del Septentrión: Melquiades Álvarez, Galano y Pelayo Ortega”. L’actividá realízase en collaboración con La Llaboral Centru d’Arte y Creación Industrial. La entrada ye llibre y gratuita.

La organización d’esquierda soberanista FAI! salió a les cais d’Uviéu y Xixón pa engalanar seis estatues con mensaxes qu’afondaben na necesidá de superar les situaciones de desigualdá machista na nuesa sociedá. Asina, aprovechando la temática espeyada nes estatues, representábense comportamientos machistes a cargu de militantes de Fai! demientres s’espardíen cientos de panfletos desplicativos sobre la llucha antipatriarcal pola igualdá de derechos sociales pa muyeres y homes. Vidiu y semeyes.

En Xixón escoyéronse les obres de “la madre del Emigrante” -con un gran símbolu feminista nel brazu-, “l’emperador Augusto” -esplumadera en mano- y “el elogio del horizonte”, onde s’instalaron cartelos nos que se podía lleer, en cada casu, “nun tamos lloques, namás somos feministes”, “vini, vi y ficiéronme la cena” o “esti retrete vas llimpialu tu, King Kong”.

D’otra banda, n’Uviéu les intervenciones reivindicatives fueron nes estatues de “el torero”, “el culu” y “la maternidá de Botero”, onde se ficieron representaciones con militantes antroxaos de la organización que calteníen comportamientos machistes (la supuesta superioridá masculina del “macho ibérico”, la “cosificación” y desixencies estétiques de la muyer, encarnaes nún ciruxanu plásticu o la non collaboración doméstica espeyada nel trabayu de les muyeres al tiempu que l’home ve la tele). Les estatues taben engalanaes nesta ocasión con con cartelos nos que se lleía “el machu español querémoslu n’estincíon”, “si nun te presta’l mio culu mírame a la cara” o “si nun criare sola a les nueses fíes y fíos yo tamién podría vivir”.

De la mesma manera, yeren espardíos cientos de panfletos con esti testu, col que Fai! quixo poner puntu y siguíu a una selmana qu’entamaba cola ridiculización de la concentración antialbortista de la ultraderecha católica, el mesmu día enantes de la conmemoración del 8 de marzu, nel que se facía un repasu poles principales discriminaciones qu’inda carecen les muyeres nel planeta.

Vídiu de les aiciones

La LLABoral Centru d’Arte y Creación Industrial ta acabante abrir la segunda Convocatoria d’Ayudes a la Producción Artística 2010, empobinaes a creadores asturianos, o residentes n’Asturies, menores de 45 años. Con una dotación global de 14.000 euros, les ayudes pa la investigación y producción de proyectos artísticos inclúin una fase previa de residencia d’investigación y preproducción en GlogauAIR, Berlín, y nel Centru Párraga espaciu d’ investigación y desenrrollu de les artes escéniques, Murcia, anque pueden contemplase otros destinos. Na segunda fase, inclúinse un periodu de postproducción que se desenrrollará en Plataforma 0_LLABoral Centru de Producción.

Les ayudes van tar dotaes d’un máximu de 7.000 euros por proyectu y el tiempu de disfrute sedrá d’un mínimu de dos meses. Pueden presentase proyectos hasta’l 5 d’abril. Pa más información, consultar les bases o llamar al teléfonu 985 185 582.

Bases de la convocatoria

El Llocal Cambalache, asitiáu en La Cuesta La Noceda 30, Uviéu, va acoyer la presentación de la revista Viento Sur, esti vienres 12, a les ocho la tarde. Nesti númberu de la revista, recuérdase los qu’asocedió en Seattle y vese la evolución d’esti movimientu nestos últimos diez años. Nel actu van intervenir Josep María Antentas, profesor de socioloxía de la Universidá Autónoma de Barcelona, miembru de Revolta Global-Esquerra Anticapitalista y del Comité de redacción de Viento Sur.

El concursu de vocabularios de l’asociación zamorana Furmientu sorprendió a los organizadores “pola cantidá y calidá de los trabayos presentaos”, y reconocer tar más cerca del pal que se creó esti concursu, “rescatar del escaezu parte del patrimoniu llingüísticu de la nuesa provincia que con tantu amor dalgunos de los nuesos paisanos fueron coleccionando a lo llargo de los años y con tanta arrogancia lo faen públicu al traviés del nuesu concursu”.

Nesta ocasión el primer premiu recayó en Patricia Otero Alonso, con un vocabulariu recoyíu nes llocalidaes de Murias y San Xusto. Ha destacase que per primer vegada un vocabulariu recoyíu en Sanabria resulta ganador. Concédese-y a Claudino Rozados Miguel, pol so Vocabulariu samireño, recoyíu na localidá alistana de Samir de los Caños, un premiu especial col que’l xuráu quier premiar la fidelidá y la calidá del trabayu del so autor, que yá presentó trabayos n’ediciones anteriores, resultando amás ganador de la II edición del concursu.

Resultaron finalistes Eloy López Codesal, con un vocabulariu de Carbayales d’Alba, y Mª del Carmen Garrote Bernabé, con un vocabulariu de Monumenta, destacando tamién el bon nivel de dambos trabayos.

El xuráu tuvo compuestu pol llingüista Juan Carlos González Ferrero y los miembros de Furmientu: Severino Alonso Proy, José Alfredo Hernández Rodríguez y Pedro Gómez Turiel, actuando como secretariu Miguel Ángel Gelado Devesa.

El premiu consiste nun llote de llibros pal primer premiu y pal especial del xuráu, y un llote de menor cuantía pa caún de los dos finalistes. Amás agasáyase con dalgún llibru al restu de participantes. En total 80 llibros donaos pola librería Semuret, Caxa España y Furmientu, toos ellos cola cultura zamorana y la llingua asturlleonesa como temátiques.

L’Academia de la Llingua Asturiana amosó al traviés d’un comunicáu la so satisfaición énte la solución dada pol Tribunal Constitucional (TC), con fecha 25 de febreru de 2010, no que cinca a la cuestión d’Inconstitucionalidá plantegada pol Xulgáu de lo Contencioso-Alministrativu númberu 3 d’Uviéu. Pa l’ALLA “nun ye solo que’l TC refugue la inconstitucionalidá del árticulu 4.2 de la Llei d’Usu del Asturianu, onde s’afita la validez del emplegu d’esta llingua nes comunicaciones orales o escrites de los ciudadanos col Principáu d’Asturies, sinón qu’amás “obliga” a l’alministración autonómica a acoyer ensin torga dala les comunicaciones que se-y apurran n’asturianu”.

L’Academia destaca amás el fechu de que se trate d’un procesu nel que, “nel so aniciu, un ciudadanu, ye dicir, un representante de la sociedá civil más concienciada, decide respir con puxu y enfotu polos sos derechos llingüísticos a la escontra de les estorvises que la mesma alministración pon davezu pa nun facer vidable’l marcu xurídicu del asturianu”.

Entiende l’ALLA, sicasí, que nun se pue “cayer na autocomplacencia”, pues recuerden “los asturianos carecemos una situación, dafechu “peculiar” nel contestu español, d’inseguridá xurídica que nun afeuta, por ciertu, a los ciudadanos gallegos, vascos, navarros, catalanes, araneses, valencianos o baleares”.

La institución califica de “llamentable”, nesti sen, que tengan que ser persones individuales o coleutivos ciudadanos los que, “de contino, esixan l’exerciciu de drechos llingüísticos qu’afiten la Constitución Española y los trataos internacionales a los qu’España se venceya”.

L’Autu del TC, recuerda l’Academia “a la escontra de lo que dalgunos quieren facer ver nun implica nenguna clas d’oficialidᔠyá que “namái afita como dafechu válidos los usos llingüísticos de los asturianos y asturianes colos muérganos dependientes del Principáu d’Asturies, acordies cola llegalidá vixente”. Queden, d’esti mou, fuera de les llendes afitaes nel Autu del TC los usos del asturianu n’otros ámbitos tan importantes como los de los conceyos o les delegaciones de l’alministración central asitiaes n’Asturies.

L’ALLA llaméntase de que “los drechos llingüísticos de los asturianos tienen enforma menos grau de reconocencia que los del restu de ciudadanos de les otres comunidaes del Estáu con llingua propia en contestos tan emblemáticos como l’educativu, el de l’alministración de xusticia, la xestión ciudadana, la vida universitaria, etc.”.

La carauterística básica de la situación llingüística asturiana ye pa l’ALLA “per un llau, la inseguridá xurídica y, per otru, la curtia reconocencia de derechos llingüísticos”. La realidá sigue’l comunicáu “amuesa testonamente una vuelta y otra que namái la oficialidá pue garantizar y homologar los drechos llingüísticos de tolos asturianos de mou que dexemos, d’una vegada yá, de ser ciudadanos de segunda nel marcu de la Constitución Española qu’a toos debería abellugar per igual”.

Por ello l’Academia fai un llamáu a les fuercies polítiques asitiaes na Xunta Xeneral del Principáu “pa que tomen determín nesti sen, de mou que’l marcu xurídicu del asturianu algame una solución, firme y estable, d’oficialidá afayada a les necesidaes sociollingüístiques d’Asturies; y reitera la ufierta fecha nel so momentu pa collaborar con tolos axentes sociales nel llogru del citáu marcu xurídicu”.

El pasáu día 23 de febreru, l’asociación cultural Furmientu, pa la defensa del patrimoniu llingüísticu de Zamora, solicitó formalmente a la Xunta de Castiella y Lleón el desenvolvimientu del artículu 5 d’Estatutu d’Autonomía, onde se diz que’l lleonés va ser oxetu de protección específica per parte de les instituciones pol so particular valor dientro del patrimoniu llingüísticu de la Comunidá, y asina mesmo figura que “va gociar de respetu y protección la llingua gallega nos llugares en que davezu s’utilice”.

El colectivu solicitó la traducción del Estatutu d’Autonomía de la comunidá a estes dos llingües reconocíes oficialmente por esi mesmu testu llegal, a manera d’esperiencia pilotu, a la que, según el colectivu, “deberíen de siguir otres igualmente empuestes a la salvaguarda del lleonés y del gallegu”.

Nesi sentíu, Furmientu ufiertóse “a collaborar cola alministración nes traducciones, que los sos exemplares seríen partíos peles zones en que se falen estes llingües propies de Castiella y Lleón”. L’asociación cultural acompañó l’escritu cola contestación dada pol Procurador del Común de Castiella y Lleón va pocos meses, na que “se daba la razón a Furmientu en rellación a la quexa presentada pola falta de desenvolvimientu llegal d’esti mesmu apartáu del estatutu”.

El Gobiernu d’Asturies va celebrar el Día Internacional de les Muyeres con dellos actos institucionales na capital del conceyu de Valdés, L.luarca. El programa, al igual que n’años anteriores, inclúi distintes actividades; dalgunes d’elles puestes en marcha en collaboración con ayuntamientos asturianos y centros educativos. L’actu institucional se desenrrollará nel Auditoriu del Conservatoriu Profesional del Occidente d’Asturies, asitiáu en L.luarca. Va entamar a les 17.30 hores y cuntará cola presencia del Presidente d’Asturies, Vicente Álvarez Areces; la Conseyera de Presidencia, Xusticia ya Igualdá, María José Ramos, y l’alcalde de Valdés, Juan José Fernández Pereiro, ente otres autoridaes.

Al igual que n’años anteriores, les pallabres institucionales compartirán espaciu con otres voces de la sociedá. Nesta ocasión a través de: María Berdasco Menéndez, investigadora científica especializada n’Oncoloxía Molecular del Institutu d’Investigación Biomedica de Bellvitge (Barcelona); José Ignacio Nieto García, Director del Institutu d’Enseñanza Secundaria Carmen y Severo Ochoa de L.luarca, o Elena Badallo León, coordinadora Sociosanitaria del Área Sanitaria I.

Precisamente en reconocimientu a “la capacidá, los conocimientos, la esperiencia y la creatividá de les muyeres”, como recueye la Carta Europea, nel actu recordaráse a dos valdesanes mui especiales: la poetisa Nené Losada y la bioquímica del Conseyu Superior d’Investigaciones Científiques, Margarita Salas, quién al traviés d’una entrevista grabada dirixirá unes pallabres a toles persones asistentes.

L’actu tará amenizáu con actuaciones musicales, ente elles la interpretación de varies piezes musicales a cargu del alumnáu del propiu Conservatoriu Profesional del Occidente d’Asturies. Tamién actuarán el grupu de música fusión Delagua, y la cantante de tonada asturiana, Mari Luz Cristóbal. Amás contaráse cola actuación de la trapecista Laura Bolón que reproducirá unes escenes del so espectáculu “Inmuyerable”.