Sociedá

Cruz Encarnada entama esti cursu gratuitu alredor de los colectivos vulnerables y la so inserción llaboral: inmigrantes, menores infractores, muyeres v víctimes de violencia de xéneru, toxicómanos y recluyíos. Ta empobináu a persones ente los 18 y los 30 años. Tien una duración de 55 hores de les que 20 son práctiques.

Va impartise na Cruz Encarnada d’Uviéu del 12 al 20 d’abril, de 09:00 a 14:00 hores. Pa más información ha llamase al teléfonu 986 209 635.

La Escuela de Música y Danza Tradicional de Noreña organiza, col sofitu la Conceyalía de Cultura del Ayuntamientu, el II Certame de Cantares en Chigre “Prohibido cantar… Desentonáu” que va celebrase güei xueves y mañana vienres col oxetivu de “recuperar l’actu espontáneu y popular de la canción dientro d’esos establecimientos tan emblemáticos na nuesa cultura como son los Chigres”.

Los organizadores recuerden que l’actu de cantar en compaña, ye “una forma de socialización qu’amás conservaba y caltenía vives les nueses tradiciones”. Xugando con aquellos cartelos que prohibíen cantar nos chigres, la organización ufre unos a los chigres onde pue lleese lo mesmo pero s’añade “….desentonáu”, el lema del certame.

A les siete y media de güei, na Casa Cultura de Noreña y cola presentación de Manuel Rosete, va inaugurase’l certame cola entrega de regalos a les rondes participantes y recuerdu al “Frayón” Cantador de tonada de Noreña. Pesllará l’actu l’Himu d’Asturies, a cargu de la Banda de Gaites de Noreña y un conciertu d’Anabel Santiago, Chus Solís y el Cuarteto Torner.

El vienres va celebrase un pasacais de tambor y gaita dende les siete y media. Y a partir de les nueve, les rondes pelos chigres que participen d’esta actividá.

L’Academia de la Llingua Asturiana comentó güei la Sentencia del Xulgáu de lo Contencioso-Alministrativu númberu 3 sobro la negativa del derechu al usu del asturianu per parte de los funcionarios del Principáu. L’ALLA que la mentada sentencia, de fecha 22 de marzu, “va dafechamente a la escontra del espíritu y la lletra del Autu del Tribunal Constitucional (TC), de fecha 25 de febreru del 2010, qu’afitaba, xustamente, el que tolos ciudadanos, al marxe del so llabor profesional, se pudieren empobinar nesta llingua a los muérganos dependientes del Principáu d’Asturies”.

La institución calificó la decisión de “sorprendente” y alvirtió “fraya los principios llegales calteníos na Llei d’Usu del Asturianu de 1998 y, de mou concretu, l’Artículu 4.2 onde se conseña la validez del emplegu d’esta llingua nes comunicaciones orales o escrites de los ciudadanos col Principáu d’Asturies”.

L’ALLA recuerda que yá la Llei d’Usu ye percurtia “no que cinca al exerciciu de los derechos llingüísticos y, dende llueu, non homologable al del restu de comunidaes del Estáu con llingua propia”, entá lo ye más “na so puesta en práutica”. Yá, que según comenten dende l’ALLA “les instituciones de gobiernu y los muérganos xurisdiccionales actúen mesmamente a la escontra de lo afitao na mentada Llei”.

L’ALLA ve en “casos tan llamentables como’l qu’agora comentamos amuesen, una y otra vuelta y de mou inequívocu, que l’argumentación, que dacuando remanen dalgunos dirixentes políticos asturianos nel sen de sopelexar que n’Asturies nun fai falta la oficialidá de la llingua porque la llibertá al usu llingüísticu yá ta reconocida llegalmente, nun tien xacíu dalu”.

Afítase l’Academia na solución “del estatus d’oficialidá pa la llingua histórica d’Asturies” como “ única garantía de que los nuesos derechos llingüísticos se puean exercer con llibertá y ensin imposiciones” y camienta que “nesti momentu del procesu de recuperación llingüística la sociedá asturiana ta dafechu madura p’acoyer una oficialidá consensuada, non traumática y afayada a la propia situación sociollingüística de la comunidá”.

Por ello, l’Academia encamenta a la Xunta Xeneral del Principáu y al Parllamentu Español, “la solución xurídica d’oficialidá pa iguar la situación llingüística n’Asturies. Ello ye una cuestión urxente y de llexítima xusticia”.

L’Asociación de Trabayadores de Normalización Llingüística denunció esti día al traviés d’un comunicáu que’l Serviciu de Normalización Llingüística del Conceyu de Piloña zarrará la so actividá’l 31 de marzu pa volver convocar la plaza de la persona responsable, cuando tien yá una sovención concedida pal so funcionamientu.

El colectivu pidió que se faiga una simple renovación autonómica del contratu de l’actual encargada y acusa a la Dirección de Política Llingüística del Principáu de “nun tener un mínimu control y siguimientu”.

Nesti comunicáu, l’asociación desplica que’l conceyu piloñés abrió’l Serviciu de Normalización (SNL) con una duración de cuatro meses de contratación y “agora que’l contratu de la técnica en normalización ta p’acabar, nun entendemos cómo nun se fai una renovación automática teniendo en cuenta que yá tienen una sovención aprobada y concedida de la Conseyería de Cultura pal so funcionamientu”. Pa esta Asociación “lo que ta faciendo’l Conceyu Piloña ye volver convocar una plaza col mesmu perfil que la que convocó hai cinco meses, paralizando asina’l funcionamientu d’esti Serviciu”.

El Plenu del Senáu vieno acabante apautase por unanimidá na aprobación d’una moción na que pide al Gobiernu qu’incluya a la Real Academia Galega na partida de creitos del Ministeriu d’Educación pa que puea disponer d’una asignación añal cola que llograr estabilidá y seguridá. La moción respuende a un cambiu d’un testu inicial ellaboráu pol senador pol Grupu Mixto José Manuel Pérez Bouza, que pertenez al BNG, nel qu’ésti pidía al Executivu la concesión pa estiu d’una sovención nominativa de 750.000 euros a la Real Academia Galega “pa compensar la situación de discriminación nos Presupuestos del Estáu del 2010”. La enmienda de sustitución a la moción nun inclúi nenguna partida concreta pero encamienta al Gobiernu que “contemple la inclusión de la Real Academia Galega na partida de creitos a reales academies del presupuestu del Ministeriu d’Educación pa que, xuntu cola española y les instituciones análogues catalana y vasca, puea tener les mesmes prerrogatives y disponer d’una asignación añal, al envís de poder realizar programaciones estables y cola seguridá d’una financiación adecuada al importante llabor que realiza”.

Xurde Blanco, el funcionariu al que-y negaron un persmisu pa operase por tar n’asturianu, ta acabante anunciar la sentencia del del Xulgáu númberu 3 de lo Contencioso-Alministrativo d’Uviéu. Esti xulgáu consultare al Constitucional alredor d’esti casu y pola mor de considerar illegal la Llei d’Usu del asturianu, pola que tenía de da-y la razón. Dempués de que’l TC-y confirmare les argumentaciones llegales de Blanco, el Xuez Miguel Ángel Carbajo Domingo falla contra Xurde Blanco, yá que diz, “l’Autu del TC nun s’adientra nel analís de la distinción ente funcionarios/ciudadanos a los efectos de la aplicación de la norma”.

Xurde Blanco dio anuncia yá de que va recurrir esta decisión y exercer “les acciones procedentes” escontra’l xuez responsable.

Ufrimos la esplicación completa de Xurde Blanco sobre los términos xurídicos d’esta sentecnia, qu’asoleyó’l xuez va dos díes.

Comentariu d’urxencia sobre la Sentencia, de Xurde Blanco

Embaxo’l títulu “¿Necesitamos una incineradora piquiñina… y galana?”, la Terturlia Pachín de Melás, qu’aconceya davezu na Cervecería Asturera de Xixón, xunto al vieyu Mercáu de San Agustín, va celebrar un alderique sobre la cuestión güei martes, 23 de marzu, de magar les 20:30 hores.

Nel alderique va cuntase cola participación de Fructuoso Pontigo, voceru del Conceyu contra la Incineración; José Antonio Ballesteros, abogáu y miembru de la Mesa Federal de Los Verdes d’Asturies, y Yolanda González, abogada y vocera d’Unidá Nacionalista Asturiana en Xixón. Presenta l’actu Tino Fernández.

La revista “La Sidre” ta acabante asoleyar na so edición en papel y dixital, el númberu 75, correspondiente al mes de marzu. Nesti númberu destaca un reportaxe con tola información de la ‘Primer Sidre l’Añu’ eventu que se va cellebrar los díes 2, 3 y 4 d’abril nel Pueblu d’Asturies de Xixón, cola participación de cantadores de tonada como Anabel Santiago o Mari Luz Cristobal Caunedo.

Esti mes ‘La Sidra’ tamién trata la polémica pol intentu de prohibir echar sidra nes cais de Xixón, la Feria Sival Angers 2010 o la sidra na parroquia avilesina de Miranda. Amás, nes más d’80 páxines, la publicación del Ensame Sidreru, caltién les secciones avezaes con entrevistes, actualidá, trivial sidreru, reportaxes… y too aquello que cinca al mundu la sidra.

La revista pue lleese de baldre calcando equí

L’Academia de la Llingua Asturiana ta acabante asoleyar el númberu 102 del so boletín, correspondiente al mes de febreru de 2010. La obra ábrese con un entamu nel que l’ALLA valora como “un llogru importante” los nuevos estudios oficiales d’asturianu en Maxisteriu y Filoloxía, anque recuerden la necesidá de que’l Gobiernu d’Asturies tien que reconocer “la profesión de maestru de llingua asturiana”. La revista cunta amás coles estayes habituales, que s’abren col trabayu “Llectura dialeutal de Cantabria”, de Xosé Lluis García Arias.

Los estudios siguen con “Áreas léxicas en el dominio astur-leonés: algunos nombres vernáculos de árboles y sus frutos, plantas herbáceas y flores”, de Janicl Le Men Loyer o “Viervo por vierbo: les inxerciones documentales y los sos problemes filolóxicos (un exemplu asturianu de 1295)”, por Clara E. Prieto Entrialgo.

Bien interesante ye l’“Estudiu sobro l’emplegu del DALLA on-line. Un averamientu sociollingüísticu”, nel que Xosé Antón González Riaño, Xabiel García Pañeda y David Melendi Palacio estudien les consultes al diccionariu de l’ALLA na rede, incluyendo un llistáu de les 100 pallabres más buscaes, y un estudiu de los resultaos atopaos polos usuarios del serviciu, que ficieron más de 154.700 consultes.

José Antonio Longo Marina sigue con “Les tierres ensin documentos son tierres con historia. O cómo mandándonos de la toponimia somos quien a reconstruyir la biografía d’un pueblu” y Margarita Torre Sevilla inclúi nesti númberu “Monarquía y nobleza: las transformaciones en el territorio leonés en los siglos X y XI a través del estudio del parentesco”.

Esti Lletres inclúi amás “El Derechu del Reinu de Lleón nel sieglu XIII: fontes, lliteratura xurídica y llingua”, por Nicolás Bartolomé Pérez, “L’analís del drechu políticu nel Fueru Xulgu afita una tapecida tesis de la Ilustración asturiana: la de la independencia política d’Asturies na Edá Media”, de Xurde Blanco Puente, y ýa dientro de la estaya “Lletres Vieyes”, la reproducción d’“Al artista genial Don Ramón Duarte con devoción y cariño de «Marcos del Torniello»”, por A. Parrales Rodríguez.

Como siempres Lletres Asturianes inclúi na parte final espaciu p’anuncies, reseñes y repás a la bibliografía n’asturianu espublizada apocayá.

El Conceyu Nacional del Liriu allugaráse esta ocasión al barriu d’El LLano de Xixón, onde’l Colexu Públicu “El Llano” y l’Asociación de Vecinos “El Fumeru”-y ceden les instalaciones al club Espor d’Asturies, organizador del eventu. Nesti entamu de campeonatu van tar los cinco equipos afiliaos al CNL, que llucharán polos primeros seis puntos, de magar les 11 la mañana.

Según esplica la organización y siguiendo’l sistema del añu pasáu de “xuntar la xornada’l Campionatu con un tornéu de llibre accesu pa tol mundu que s’avere”, Espor[a] organiza’l I Abiertu de Liriu d’El LLano, qu’escomenzará xusto dempués de la partida. Per primer vez, comenten dende la organización, “un abiertu preséntase como valederu pal I Campionau d’Asturies de Liriu Individual, a la espera de que se cumplan los requisitos d’homologación CNL”.

Dende’l CNL recuerden qu’esti xuegu “convertíu yá, ensin marcha atrás posible, en espor de plenu drechu”, dará a la fin de la temporada “los primeros pasos pa la federación”.

El I Abiertu d’El LLano de Liriu (Validu pal Campionatu Individual) va entamar el domingu 28 a les 13:15, pudiendo inscribise a lo llargo de tola mañana, too ello na pista del Colexu Públicu “El LLano”, asitiáu na cai Ríu d’Oru, 33, en Xixón.