Sociedá

Repítese esti añu la campaña “Na mar nun sías calamar”, que cunta col sofitu de la Mancomunidá d’El Cabu Peñes y la Conseyería de Cultura y Turismu, y ta entamada pol Serviciu de Normalización Llingüística de la mesma Mancomunidá y ye una actividá n’andecha col SNL de la Comarca de la Sidra. Cuenta esta campaña con un cartel en tres llingües (asturianu, castellanu y inglés) sobre delles situaciones rellacionaes cola “cadena de sobrevivencia”, un manual dirixíu sobre manera a los/les socorristes de les nuestres playes y del que tamién pue participar el ciudadanu de la cai; un trípticu bien prestosu sobre midíes de seguridá nes playes (solina, cortes de dixestión, picadures, encamientos pa neños/es, etc) y un balón de playa.

El presidente de la ciudá autónoma de Melilla, Juan José Imbroda (PP), respondió nun alcuentru dixital celebráu na páxina de Televisión Española a una entruga sobre la posibilidá d’oficialización de la llingua tamaazigh (falada polos bereberes de la ciudá -más d’un terciu de la población). Imbrola dixo nun ver esta posibilidá, yá que “Melilla ta a la cabeza en fracasu escolar y ye fundamental afondar nel dominiu del español pa evitalu”.

Imbrola afirmó tamién que “tolos bereber de Melilla conocen el tamaazigh” que calificó como “un idioma que se fala muncho, qu’hai que protexer, pa que nun se pierda”, yá que, dixo, “ye una riqueza cultural pa toa Melilla”. De la mesma forma describió la situación de la llingua de los bereberes como “igual que’l bable asturianu”, yá que l’Estatutu d’Autonomía de la ciudá “nun reconoz la oficialidá del tamaazigh”.

Nun ye la primer vegada qu’Imbrola compara estes dos llingües, falaes nel Estáu español. El presidente melillense llegó a dicir en 2004 que’l tamaazigh “nun ye una llingua española” y camienta que “detrás de les propuestes d’oficialidá tán los intereses de Marruecos por facese con Ceuta y Melilla”.

Ibramola dixo nel so día que taba dispuestu a “apoyar y promocionar” la llingua de los bereberes “como se fai n’Asturies col bable”.

Alcuentru dixital con Imbrola

Güei, llunes 28 de xunu, y a partir de les 19:30 hores, va celebrase en Xixón l’actu políticu-institucional del «Día del Arguyu LGTB 2010», celebración internacional na que se reivindiquen los drechos del colectivu de gais, lesbianes, bisexuales y transexuales. Nel actu van intervenir fuercies polítiques, sindicales y sociales d’Asturies, y nél va dase entrega de los Premios Lladriyu Rosa, Triángulu Rosa y del XIII Concursu de Cartelos de XEGA. El llugar escoyíu ye’l Salón d’actos del Centru de Cultura Vieyu Institutu. En terminando l’actu va celebrase una manifestación “Arguyu LGBT 2010” dende la cai Xovellanos hasta la Plaza Mayor.

Al rematar la manifestación, va lleese’l Manifiestu del Arguyu 2010: “Pola igualdá trans”.

Sicasí, los actos van entamar yá pela mañana. A les 11:45 va irguise la bandera LGBT na Casa Conceyu de Llangréu. A les 12, nel Parque Dorado de Sama va celebrase una charra-alderique alredor de la orientación afectivosexual y la identidá de xéneru. Pa rematar los actos en Llangréu, va facese una Marcha Arguyu LGBT ente Sama y La Felguera.

Güei, xueves 24 de xunu a les 19.30 hores, na Llibrería Alborá de Xixón (plaza Rumaldo Alvargonzález) va presentase’l llibru últimu editáu por Grupu Epona que lleva’l títulu de “Cuentos prestosos escritos por escolinos y escolines” y que como indica’l titulu ta escrito ya ilustráu por escolinos de diferentes escueles de Xixón que participaron en Talleres de narrativa, escritura y cuentacuentos magar l’añu 2000, entamaos pola Asociación Cultural Grupu Epona.

Dende la organización comenten qu’esta obra ye “un reconocimientu al trabayu d’estos escolares d’asturianu y agradecimientu a los maestros y direiciones de les escueles que collaboraron neses actividaes”. Na presentación participarán los miembros de l’Asociación asina como dalgunos escolinos que participaron nel llibru.

El programa de la Foguera de San Xuan d’Avilés, que tien llugar xunto al banzáu de Trasona, ye unu de los más ambiciosos. Va entamar a les diez de la nueche con un conciertu d’Spanta la Xente. A les once, celébrase una actuación del grupu de teatru pa neño “El Ñeru de los Coríos”, que muestra’l so espectáculu Los Pyroduendes II. Dempués de la foguera conciertu de la banda de gaites de Corvera, Rarefolk y a les dos de la mañana, como pieslle, Llangres.

El barriu de Llaranes tamién celebra una foguera vecinal, dempués de dellos años ensin convocala.

Asturies foi la tercera de les seis comunidaes autónomes qu’amenorgó’l crecimientu la so población nel añu 2009 al rexistrar más fallecimientos que nacimientos. Asturies rexistró en 2009 8.307 nacencies escontra 12.774 fallecimientos, colo qu’ufrió un crecimientu vexetativu negativu de -4.467, según los datos asoleyaos esti día pol Institutu Nacional d’Estadística (INE).

Galicia, con un saldu negativu de 7.580, y Castiella la Macha (-6.312) foron les comunidáes que superaron a Asaturies.

El conceyal de cultura lleonesa, Javier Chamorro, acompañáu polos conceyales Gema Cabeces y Abel Pardo, que tuvo d’abandonar el cargu qu’agora tien Chamorro pol casu “Llïonpedia”, participaron esti sábadu la quinta edición del “Día de la Llingua Llionesa”, que tuvo llugar nel Palaciu de Don Gutierre, na capital del territoriu lleonés.

Un actu que “quier celebrar la esistencia d’una llingua propia del Reinu de Lleón, una llingua qu’inda perdura y caltiense viva”, según remarcó Javier Chamorro. El vicealcalde de la ciudá fizo referencia nel so discursu al artículu 5.2 del Estatutu d’Autonomía de Castiella y Lleón “nel que se garantiza’l derechu al usu del lleonés, según la protección específica del mesmu”.

Chamorro recordó qu’esti artículu alvierte que “el lleonés va ser oxetu de protección específica per parte de les instituciones pol so particular valor dientro del patrimoniu llingüísticu de la Comunidá. La so protección, usu y promoción van ser oxetu de regulación”.

Nel actu tuvo llugar la entrega de los diplomes a los cerca de cien neños pertenecientes a 16 colexos de la ciudá que xuníos a otros 120 adultos, conformen l’alumnáu total de los cursos que s’entamen dende la Conceyalía de Cultura Lleonesa. Coles mesmes l’actu tuvo arrodiáu de distintes actividaes toes elles siempres encuadraes dientro de la cultura tradicional lleonesa, con un actu final de l’actuación de la Banda de Gaites Ciudá de Llión na Plaza de Don Gutierre.

Güei, llunes 21, y hasta’l 25, ta abiertu’l plazu p’apuntase al cursu promovíu pol Conceyu de Carreño y la Oficina d’Información Xuvenil pa neños d’ente 6 y 12 años. La duración de cada taller ye de dos hores al día, dos díes a la selmana (llunes y vienres), demientres trés selmanes; concretamente los díes: 28 de xunu y 2, 5, 9, 12 y 16 de xunetu, de 10 a 12 hores el primer taller y de 12 a 14 hores el segundu.

Los talleres consten d’hores teóriques y hores práctiques. Les primeres van ser nel Centru Polivalente y les segundes n’El Muelle.

Les inscripciones pueden facse de 9 a 14 hores (por orde d’inscripción) na Oficina d’Información Xuvenil de la Mancomunidá del Cabu Peñes, nel Centru Polivalente “La Baragaña”, 4, de Candás. Más información nos teléfonos 985 88 48 44 ó 958 87 24 06.

El Real Institutu d’Estudios asturianos (RIDEA) nomó a trés nuevos miembros de les cuatro vacantes de Miembros Numberarios Permanentes de la institución. Los nuevos miembros son el catedráticu de Drechu Alministrativu Leopoldo Tolivar Alas, el caderlagu de Filoloxía española Julio Concepción Suárez y l’abá de Cuadonga Juan José Tuñón.

Amás d’ello, aceptóse la propuesta de la Xunta Permanente pa nomamientos de Miembros Correspondientes, formada por Nuria Anadón (bióloga), Elisa Villa Otero (xeóloga), Martín Caicoya (médicu), José Antonio Fernández Prieto (botánicu), Benigno Fernández Fano (veterinariu), Luis Jesús Llaneza González (matemáticu), Felix Fernández de Castro (inxenieru mines), Conchita Paredes (directora del Archivu Hestóricu d’Asturies), Ángel Villa Valdés (arqueólogu), Agustín Guzmán Sancho (hestoriador), Yvan Lissorges (biógrafu de Clarín), José Carlos García Ramos (xeólogu), Eva Barreno (botánica) y José María Casielles Aguadé (abogáu).

Andecha Astur llamentó al traviés d’un comunicáu la decisión tomada per parte del Grupo Osborne “d’iguar el toru d’Ambás”, nel conceyu de Carreño, que resultó destruyíu’l pasáu mes de febreru a causa de les fuertes raches de vientu.

P’AA, esta igua ye “daqué intolerable” teniendo en cuenta que “demientres el padremuñu asturianu sigue ignoráu y esfarrapándose por falta de presupuestu, sigan gastándose perres en recostruyir estos símbolos del españolismu”.

P’Andecha Astur ye “inalmisible” que s’utilice comu reclamu publicitariu y de propaganda la silueta d’un animal que pa ellos representa “el maltratu y l’agresión animal pagaos y sovencionaos por parte del Estáu Español”. Amás recuerden “la refuga social que xeneren n’Asturies estes valles, una amuesa d’ello son les constantes agresiones que sufren (ésta en concreto taba enllena pintaes)”.