Sociedá

La bodega Obanca, de Cangas, va presentar güei na capital del conceyu, el primer vinu etiquetáu dafechu n’asturianu. Un ‘verdéu tintu’ que sufrió les torgues de la Conseyería de Mediu Rural, que nun quería que fuere etiquetáu namás n’asturianu. Una decisión que llama l’atención, teniendo en cuenta que la Conseyería ta en manes d’Iquierda Xunida-Bloque por Asturies, con Aurelio Martín a la cabeza.

La presidenta de l’Academia de la Llingua Asturiana, Ana Cano, y l’académicu Pablo Xuan Manzano, dieron anuncia esti vienres pasáu n’Uviéu, de los premiaos nos Concursos de la insituticón, na so convocatoria de 2010. Más de 6.600 euros repartíos ente trabayos lliterarios, audiovisuales, gráficos y d’investigación, con nomes como Ricardo Candás, Pablo Rodríguez Alonso, Enrique Carballeira, Pablo A. Quiroga o Ramiro Delgado, ente otros.

El premiu de Recoyida de material toponímico oral declaró ganador de 600 euros al trabayu tituláu “Toponimia de la parroquia de Caranga (Proaza)” de la que son autores Antonio Alonso de la Torre y Francisca Iglesias Álvarez, dando amás accésits a “Toponimia de la parroquia de Trabáu (Degaña)” de Francisco Javier Redondas Maseda, “Toponimia de la parroquia de Llabares (Santu Adrianu)” y “Toponimia de la parroquia de Villanueva (Santu Adrianu)” del que ye autor Jesús Fernández Fernández, y “Toponimia de la parroquia de Llabra (Cangues d’Onís)” del que ye autora María Aurina González Nieda.

Nel casu del Concursu d’investigación de Recoyida de léxicu asturianu premióse a Xulio Llaneza Fernández con 600 € pol trabayu tituláu “Léxicu del Valle de Santa Bárbola (SMRA)”, con 300 a Ramón Rodríguez Corao por “Vocabulario de Ruenes (Peñamellera)” y con 150 a “Un palabreru Cabraliegu” del que son autores Xuan Santori Vázquez-Azpiri y Juan Vicente Inguazo Prieto.

No que cinca al Concursu d’investigación llingüística apautóse premiar con 600 € el trabayu tituláu “Una torna al asturianu, íntegra y crítica, del Tirant lo Blanch dende l’orixinal valencianu de 1490” del que ye autor Pablo Suárez García, que comentó na entrega les dificultaes atopaes pa tornar un testu “enllenu d’arabismos, pallabres y xiros medievales, etc”. El Concursu d’Investigación sobre lliteratura asturiana quedó ermu.

Los premios de lliteratura tuvieron una bona collecha esti añu. Nel Concursu de llectures pa rapazos diose’l premiu de 600 €, ex aequo a les obres titules “La maldición de Llucescuna”, d’Abel Martínez González y “Xaime Bon y el casu de la corona preciosa” de la que ye autor Enrique Carballeira Melendi; resultando ganador del Concursu de creación lliteraria, premiu “Llorienzu Novo Mier” el xixonés Ricardo Candás, por “Nos díes pensatibles”. El premiu de teatru foi pal hestoriador Pablo Rodríguez Alonso, pola obra “L’internu”.

Del Concursu de recoyida de material lliterario escrito, premiu “Federico G.-Fierro Botas” concediéronse esti añu dos accésits: “Obra manuscrita de Pachín de Melás”, del que son autores Ramiro y Clara González Delgado, y “«Yo quixera cantate» y otros poemes llangreanos” , del que ye autor Inaciu Galán y González. El concursu de Recoyida de Material Lliterario Oral quedó nesta ocasión ermu.

El realizador Pablo Quiroga Prendes fízose colos 1.200 euros del Concursu de Curtios Cinematográficos pol curtiu Bisarmes, mientres que del Concursu de Cómics en Llingua Asturiana resultó ganador el trabayu tituláu “De la materia de los sueños” del que ye autor Manuel Antonio García Iglesias.

Semeyes de la entrega de premios

El grupu d’investigación Seminariu de Filoloxía Asturiana de la Universidá d’Uviéu entama un congresu que, baxo’l títulu xenéricu «Ciencia, llingua y fronteres», va celebrase los díes 5 y 6 d’ochobre del 2010 na Facultá de Filoloxía de la capital asturiana. Nel alcuentru que se ta organizando, el Seminariu quier buscar soluciones “al problema de clasificar y tipificar la diversidá llingüística mundial, la realidá multiforme del llinguaxe como atributu biolóxicu de la especie humana”.

Nel Congresu van presentase dellos estudios novedosos que “miden les fronteres llingüístiques al traviés d’unidaes matemátiques” y van plantegase cuestiones tales como “¿Tien sentíu’l conceptu de llingua (o dialectu)? Si tien sentíu, ¿de qué naturaleza son los criterios manexaos?” o “¿Cómo se conciben les fronteres ente llingües (o ente dialectos)?”.

Nesti alderique van participar especialistes en Llingüística Xeneral, en Romanística, en Dialectoloxía Hispánica y Dialectoloxía Asturlleonesa, asturianos, d’otres zones del Estáu, y europeos. Sicasí, el Congresu va dexar espacios pa la Filosofía del Llinguaxe, l’Antropoloxía o la Bioloxía, disciplines que, según comenten dende’l Seminariu, “comparten delles de les esmoliciones alredor del conceptu de tipu y frontera”.

Nel Comité Organizador tán Ramón d’Andrés Díaz (presidente), Profesor Titular de la Universidá d’Uviéu; Taresa Fernández Lorences (secretaria), Profesora de la Universidá d’Uviéu, Xulio Viejo Fernández (vocal), Profesor Titular de la Universidá d’Uviéu; Fernando Álvarez-Balbuena García (vocal), Profesor de la Universidá d’Uviéu y María Cueto Fernández (vocal), Becaria Pre-Doctoral FICYT, Universidá d’Uviéu.

Amás, el Comité Científicu cunta con Hans Goebl (O. Univ. Prof. de Romanística, Universidá de Salzburgo, Austria), Joan Veny i Clar (Catedráticu Eméritu de Filoloxía Catalana, Universidá de Barcelona, Institut d’Estudis Catalans); José Ramón Fernández González (Catedráticu de Filoloxía Románica, Universidá d’Uviéu); Antonio Vespertino Rodríguez Rodríguez (Catedráticu de Filoloxía Románica, Universidá d’Uviéu); José Antonio Martínez García (Catedráticu de Llingua Española, Universidá d’Uviéu) y Enrique del Teso Martín (Decanu de la Facultá de Filoloxía, Universidá d’Uviéu).

El Tercer Teniente d’Alcalde y Conceyal de Cooperación y Solidaridá Internacional, Jesús Montes Estrada, va presentar güei, a les 13,30 hores, nel Salón de Recepciones del Conceyu de Xixón, la Memoria 2009 de la Conceyalía de Cooperación y Solidaridá Internacional, editada por Ediciones Trea, y que fai un refechu percorríu por tol trabayu realizáu por a la conceyalía nel añu pasáu.

Nes más de 200 páxines de la memoria, esbíllense toles actividaes y proyectos desenvueltos na área, que nel añu pasáu destinó casi 1,9 millones d’euros a la cooperación al desenvolvimientu, lo que supunxo un 0,76 % del presupuestu municipal.

Con un diseñu ameyoráu y más curiosu visualmente, la Memoria 2009 de Cooperación y Solidaridá Internacional contien distintes gráfiques y tables onde s’esplica’l destín de les distintes subvenciones y convenios desenvueltos, los sectores d’incidencia, y les Organizaciones non Gubernamentales coles que trabayó la Conceyalía. Del total del presupuestu municipal de cooperación, un 58,25 % destinóse a la Convocatoria de Subvenciones, un 38,1 % a l’Ayuda Institucional directa, siendo para gastos de funcionamientu y publicaciones un 3,65 %.

Esta ye la quinta memoria añal de la Conceyalía de Cooperación y Solidaridá Internacional, que dende 2.005 lleva realizando esta publicación ininterrumpidamente, a la que se xunió’l pasáu añu la Memoria 1.979 – 2004”, colo que tola hestoria de la Cooperación xixonesa ta recoyida nestes publicaciones, disponibles na Rede de Biblioteques Municipales y na web del Ayuntamientu.

La Universidá d’Uviéu, l’Academia de la Llingua Asturiana y el Conceyu de Cangas del Narcea roblaron esta mañana’l pautu de collaboración que supón la puesta en práutica de la Universidá Asturiana de Branu (UABRA). Esti alcuerdu dexa afitao que Cangas del Narcea va ser dende agostu d’esti mesmu añu sede permanente de los cursos y actividaes d’UABRA.

N’efeutu, y según declaren dende l’ALLA, a lo llargo de la primera quincena del mes d’agostu les instalaciones de la Escuela Hogar, Casa de la Cultura, Institutu d’Educación Secundaria y Teatru Conde Toreno acoyerán el programa diseñáu pola UABRA nel que destaca un ambiciosu programa formativu (investigación filolóxica, estudiu de la realidá social y cultural asturiana y capacitación llingüística), asina como otres xeres d’espardimientu social de la cultura, la ciencia y l’arte asturianu.

Los estremaos cursos y actividaes desarrollaránse, como se vien diciendo, na villa canguesa del 2 al 13 d’agostu y, hasta esti momentu, confirmaren la so asistencia más d’un centenar de persones, según informa la institución asturiana. El plazu de matrícula fina’l próximu vienres, día 4 de xunu.

Información completa de los cursos de l’UABRA

El Plan de Drogues d’Uviéu entama güei, llunes 31 de mayu, en Club de Prensa Asturiana, una charra alredor de la prevención de les drogodependencies. La comunicación va tener llugar a les ocho la tarde, centrándose nel impactu de la Llei de Midíes Sanitaries pal Tabaquismu. Tará al cargu de Mónica Pérez Ríos de la Sociedá Española de Epidemioloxía y de Martín Escandón de l’Asociación Española contra’l Cáncer n’Asturies.

Anueite, el Conceyu Cangas reguníu en Plenu aprobóu la creación del Conseyu Asesor de la L.lingua de Cangas del Narcea sin niún votu en contra a la propuesta presentada pola Conceyala de Cultura, Bibiana Martínez, que feixo la súa intervención íntegramente n’asturianu.

En breve, espuéis de la súa publicación no BOPA, espera empicipiar la súa andadura no conceyu cangués esti organismu encargáu de mirar polos intereses de la sociedá asturiana ya unu de los sous dreitos más fundamentales, el de poder expresase na l.lingua propia sin torgas. Con esta iniciativa’l Conceyu Cangas apuesta pola l.lingua asturiana ya polos avances en cuestión de dreitos civiles, cumo yá lo fixera anteriormente el Conceyu Xixón.

El Plan de Drogues d’Uviéu entama una charra en Club de Prensa Asturiana alredor de la prevención de les drogodependencies. La comunicación va tener llugar a les ocho la tarde del próximu llunes, 31 de mayu, centrándose nel impactu de la Llei de Midíes Sanitaries pal Tabaquismu. Tará al cargu de Mónica Pérez Ríos de la Sociedá Española de Epidemioloxía y de Martín Escandón de l’Asociación Española contra’l Cáncer n’Asturies.

El Chigre Cantábrico de Xixón, asitiáu na cai del Muelle d’Oriente, nos Xardinos de la Reina, acueye mañana, xueves 27, a les ocho y media, una tertulia titulada “Toros. Saca tarxeta encarnada al maltratador”.

Na tertulia van participar Antonio Coviella, de l’Asociación Nacional Animales con Derechos y Libertad; Xicu Mata, de l’Asociación Cultural y Medioambiental La Foz del Pielgu, y Santiago Artime, de Moción contra’l maltratu animal del Conceyu Carreño.

L’Academia yá tien na cai “Nomes de los paises del mundu y de les sos capitales y xentilicios”, númberu 6 de los cartafueyos normativos y qu’ufre una actualización nesi tarrén. El trabayu tien un llistáu de los 195 países pertenecientes a la ONX, amás d’otros que son independientes pero nun tán nesti organismu internacional o nun tienen reconocencia plena (Palestina, Sáḥara, Kósovu).

Tamién inxertaron los nomes de países que nun siendo independientes tienen daqué representación autónoma o relevancia internacional (Cornualles, Escocia, Groenlandia). Pa la igua d’esti cartafueyu, estudiaron y esbillaron les formes más emplegaes nes llingües más averaes al asturianu (castellán, catalán y gallegu), y les más espardíes internacionalmente, como l’inglés o’l francés.