Portada Sociedá Los piquetes traten de paralizar Asturies a fueu

Los piquetes traten de paralizar Asturies a fueu

by asturnet

Les barricaes ardieron en numberosos puntos d’Asturies dende primer hora de la mañana. Los piquetes provocaron estrozos nes zones industriales y comerciales d’Asturies, zarrando accesos a centros de trabayu y comerciales, magar les declaraciones que facía ayeri a La Nueva España, Justo Rodríguez Braga, secretariu xeneral d’UXT, nes qu’afirmaba que se diba poder “trabayar con normalidá y ensin coacciones”. La imaxe ye d’esta mesma mañana, a les 8:30, na autopista Y, onde munchos ciudadanos quedaron atrapaos pola acción de los piquetes.

Los servicios mínimos nun se cumplieron nos tresportes como reconoz CCOO d’Asturies na so páxina “L’aeropuertu permanez zarráu” y munches persones viéronse atrapaes nes barricaes feches nes principales carreteres asturianes. La prensa paró nun 80% según los sindicatos. Asina, La Nueva España renunció güei a sacar la so edición, TVE tien la señal cortada n’Asturies, lo mesmo que TPA, que tardó más en facelo, pero que dende les 11 la mañana nun emite señal nenguna.

“El serviciu de recoyida de basures paró al 100% y Correos nun 90%, ente que nel sector industrial el siguimientu ta siendo prácticamente total: Arcelor Mittal y Alcoa el 100%, Asturiana de Cinc el 75%”, siempres según los sindicatos.

Tamién te podria gustar