Sociedá

Esti vienres, 8 d’ochobre, va celebrase una charra-alderique titulada “Tres el golpe d’estáu. La situación actual n’Hondures” cola participación de Bartolo Antonio Fuentes, del Frente Nacional de Resistencia.

Bartolo Antonio Fuentes ñació en 1964 nel sureñu departamentu de Valle, la so familia foi movida pola guerra de les oligarquíes salvadoreña y hondureña de 1969. Dende entós vive na ciudá d’El Progreso, Yoro, Mariña Atlántica d’Hondures. Ye Coordinador Departamental del Frente Nacional de Resistencia Popular del Departamentu de Yoro.

Periodista pola Universidá Autónoma de Hondures. Redactor de Revístalu Vida Llaboral dende l’añu 2000 y dirixente social de la Organización COMUN, en 2006 foi candidatu a Alcalde y Rexidor (conceyal) d’El Progresu, tercer ciudá n’importancia d’Hondures, pol Partíu Unificación Democrática del que se retiró xunto a casi tolos militantes d’izquierda en 2009.

El próxsimu xueves, 7 d’ochobre a les 20:00 hores, va facese nel Conceyu Abiertu, una mesa redonda baxo’l título “Y depués del 29-S, ¿Qué?”, va tanto a analizase como a valoráse la xestación, conformación, oportunidá y resultáos de la xornada de Fuelga Xeneral del pasáu miércoles 29 de setiembre y sobremanera, ver qué perspectives, posibles coordinaciones, etc; van abrise nos prósimos meses y nos escenarios d’ésta actual coxuntura, económica, sindical, social y política.

L’actu ta convocáu pol Conceyu Abiertu y nel mesmu va participar una persona por caúna de les siguientes organizaciones sindicales: CSI, SUATEA, CNT y CGT.

El profesor Ramón d’Andrés presentó los avances del Proyectu ETLEN, del Seminariu de Filoloxía Asturiana, que busca “midir la frontera ente asturlleonés y galleo-portugués” y que según el propiu filólogu “nun apaez como intentu de desbancar absolutamente nada” sinón “como un atles llingüísticu de corte clasicu pero fechu con un programa informáticu”. Según cuntó na presentación usáronse los datos de 40 puntos d’encuestación, dellos na zona d’estudiu y otros nes fronteres oriental y occidental.

Nel estudiu mídense 532 fenómenos, de los que 150 son fonéticos y fonolóxicos; 241 morfolóxicos nominales y 141 morfolóxicos verbales, dexando fuera’l lésicu “por cuestiones operatives”. A la fin, alredor de 2.000 respuestes, qu’en tando remataes van permitir dixebrar les característiques según la so adscripción “asturlleonesea, gallegoportuguesa o esclusiva del Eo-Navia”, esplicó D’Andrés. Los primeros datos pueden vese na web del proyectu.

Tres la presentación, un alderique axuntó a los filólogos asturianos Xavier Barcia y Fernando Álvarez-Balbuena, y el gallegu Francisco Dubert.

Nel alderique Francisco Dubert, profesor de gallegu na Universidá de Santiago defendió que “nun se pueden facer fronteres llingüístiques namás de trazos” y reconoció que nun acepta “la tierra del Eo-Navia como de transición” yá que sedría “aceptar qu’hai un gallegu más puru qu’otru”.

Álvarez-Balbuena defendió la idea de que “toles fales son de transicion”, recordando que “les fronteres nun son de piedra” y que namás “l’acumulación d’isogloses permite falar de fronteres”.

Xavier Barcia, filólogu natural de la zona eonaviega qu’anguaño estudia los trabayos de Damaso Alonso sobre la fala de la zona, dio les gracies pola so participación nel foru, yá que, dixo “non en tolos foros pueden dase toles opiniones”. Pal autor eonaviegu “hai continum llingüísticu en tol dominiu gallego-portugués, pero hai que marcar fronteres pa la normalización, educación, etc”. Barcia opina que dellos grupos ven al gallego-asturianu venlo “como la perda d’identidá del país” cuando, diz, “l’asturianidá de la zona ye clara, anque-yos ruempa a dalgunos la idea d’una Asturies grande y llibre”.

Barcia diz del términu gallegu-asturianu que se siente “mui cómodu, acéptalu la mayoría la xente”, y de la llingua comenta “ye un dialectu gallegu con rasgos asturlleoneses”, que recordó “tien una vitalidá más importante que la del asturianu”. Opina qu’hai que sentase a falar “pa tomar midíes y solucionar esti problema de la normativa, la formación del profesoráu, etc. , pero non como si fueramos enémigos”.

Páxina del Proyectu ETLEN

La segunda y cabera xornada del Congresu “Ciencia, llingua y fronteres” va celebrase güei, miércoles 6 d’ochobre. L’eventu, organizáu pol Seminariu de Filoloxía Asturiana de la Universidá d’Uviéu celébrase na Sala de Conseyos del Departamentu de Filoloxía Española, asitiada nel pisu segundu del Edificiu Departamental. Los conteníos de güei xiren alredor de les fronteres llingüístiques dende dellos puntos de vista, echando una güeyada especial al midimientu de la frontera ente’l gallego-portugués y l’asturlleonés, en delles de les actividaes programaes.

La mañana va abrila José Enrique Gargallo Gil, de la Universidá de Barcelona, con «Fronteras romances en la Península Ibérica», siguiendo María Alba Niño, del Departamentu de Romanística de la universidá alemana de Friburgo, con «Fronteres llingüístiques nel ciberespaciu». Dempués de la posa de media mañana, Alfredo I. Álvarez Menéndez, del Departamentu de Filoloxía Española de la Universidá d’Uviéu, va falar a los asistente «De la lengua al idioma: los límites de la percepción de los hablantes», celebrándose darréu una mesa redonda sobre’l tema, onde van aldericar Xavier Barcia, Xosé Miguel Suárez Fernández y Francisco Dubert, embaxo la moderación de Xulio Viejo Fernández. Enantes van esponese delles característiques del proyectu d’investigación ETLEN sobre la frontera llingüística del Eo-Navia, n’Asturies.

Dempués de la hora la xinta, a les 16 hores, María Cueto Fernández, FICYT del Departamentu de Filoloxía Española de la Universidá d’Uviéu, va esplicar el so trabayu alredor de «La frontera nororiental del asturllionés: una aproximación crítica», siguiendo la esplicación de la profesora de filoloxía Taresa Fernández Lorences sobre l’«Alternancia y mestura de códigu asturianu/español. Problemes nel determín de les fronteres llingüístiques». El pieslle del Congresu va ponelu Pilar García Mouton, del Institutu de Llingua, Lliteratura y Antropoloxía, CCHS-CSIC cola conferencia «¿Fronteras entre variedades castellanas peninsulares?».

Programa completu

El profesor de filoloxía de la Universidá d’Uviéu, Alfredo I. Álvarez, faló esti meudía nel Congresu ‘Ciencia, lingua y fronteres’ sobre les llindes de la percepción de los falantes. Na so introducción dio dellos datos sobre la diversidá llingüística mundial. Ente los datos apurríos pol llingüísta la cantidá de llingües esistente, alredor de 6.909, una media d’un idioma por millón. Sicasí esplicó como ”la dixebra por continentes ye mui desigual”, 234 n’Europa (5 de media por estáu) frente a más de 1250 llingües n’Oceanía, con namás catorce estaos.

Álvarez Menéndez alertó del peligru de munches d’estes llingües. ”Unes 100 desapaecen cada añu”, una cada dos selmanes. Nesti momentu, recordó ”hai unes quinientes llingües con menos de 100 falantes”.

El congresu, organizáu pol Seminariu de Filoloxía Asturiana termina esta tarde con delles conferencies dedicaes a les fronteres y fenómenos de la llingua asturiana.

El grupu d’investigación Seminariu de Filoloxía Asturiana de la Universidá d’Uviéu entama esti Congresu los díes 5 y 6 d’ochobre na Facultá de Filoloxía de la capital asturiana col envís de responder al problema de “clasificar y tipificar la diversidá llingüística mundial, la realidá multiforme del llinguaxe como atributu biolóxicu de la especie humana”. Asina nesti congresu ponen en cuestión problemes específicos de taxonomía y categorización tovía non resueltos dafechu, como la concepción de les les fronteres ente llingües. La inauguración va facese güei a les 9:30 hores y va cuntar cola presencia del Rector de la Universidá d’Uviéu, Vicente Gotor.

La conferencia inaugural va echala’l profesor Hans Goebl, del Departamentu de Romanística de la Universidá de Salzburgo, n’Austria, falando de les «Áreas, fronteras, similitudes y distancias: lección breve de geolingüística cuantitativa». Darréu, Luis Manuel Valdés Villanueva, del Departamentu de Filosofía de la Universidá d’Uviéu va comentar «El mito del lenguaje: sistematicidad, convenciones, idiolectos». Dempués d’un pequeñu descansu, a les doce y cuartu, Antonio Fernández Fernández, de la Universidá d’Uviéu, dará la conferencia «La ilusión de las lenguas», rematando la sesión mañaniega Gonzalo Nieto Feliner, Director del Real Xardín Botánicu de Madrid, con «Barreras y fronteras entre especies. ¿Existe un modelo en el mundo vivo?»

Yá pela tarde, de magar les cuatro, Adolfo García Martínez profesor d’Antropoloxía na UNED, abrirá con «Fronteras culturales: pluralidad, alteridad e identidad», a la que va siguir la proyección del documental Entre Línguas, de João Aveledo, Eduardo Maragoto y Vanessa Vila-Verde; amás d’una mesa redonda titulada «Entre línguas. A fronteira política luso-espanhola na configuração linguística dos “galegos”», na que van intervenir Eduardo Maragoto, José Enrique Gargallo y Antonio Meilán, cola moderación de Fernando Álvarez-Balbuena.

La xornada primera d’esti Congesu va pesllala a les siete la tarde la conferencia titulada «La frontera entre el asturleonés y el castellano», del Catedráticu de Dialectoloxía, Universidá de Lleón, José Ramón Morala Rodríguez.

Mañana, miércoles va falase de les fronteres romances na Península Ibérica, fronteres llingüístiques nel ciberespaciu y va aldericase alredor del midimientu de la frontera ente’l gallego-portugués y l’asturlleonés, ente otros conteníos.

Programa completu

El martes 5 en L’Arcu la Vieya, Nacho González va dar la so “Crónica y fotos del viaxe per Chile y Bolivia”, que fizo en representación del Bloque por Asturies apocayá, conociendo los movimientos sociales y políticos del país suramericanu.

Entrevista con González

El vienres que vien, 8 d’ochobre, nel salón d’actos del Centru Integráu del barriu L’Arena va celebrase una charra divulgativa de Xurde Morán, baxo’l títulu “‘Programes televisivos percorriendo Asturies (1998-2010) y dalgo más; de Puente Roces a Bruseles”. Nel actu va entregáse-y a Morán, presentador de televisión y llocutor na radio, el premiu ‘Pegoyu asturianu’ de Luces de la Ciudad, creación d’Alberto Estrada de ‘Cerámica Laguia’ . L’actu ye d’entrada llibre y va tar presentáu por Gonzalo Mieres.

Xurde Morán ye ún de los periodistes más conocíos d’ente los qu’usen l’asturianu. El so trabayu vieno desenrrollándose primero en TeleXixón y dende va dellos años na Cadena Ser y en Canal 10, col so popular programa “L’andariegu”. Asturnews va ufrir esti vienres una entrevista na que va comentar cómo recibe esti premiu y va falar de la so trayectoria profesional.

La organización del Congresu Ciencia, Llingua y Fronteres anunció que sigue abiertu’l periodu de matrícula hasta’l próximu 4 d’ochobre. L’actu inaugural va tener llugar un día dempués, el martes día 5 a les 9,30 de la mañana, na Sala de Conseyos del Departamentu de Filoloxía Española (Campus del Milán, Edificiu Departamental, 2u pisu).

Hasta’l momentu tienen confirmada l’asistencia: el Rector de la Universidá d’Uviéu, el Director del Departamentu de Filoloxía Española, la Directora Xeneral de Política Llingüística y el Conceyal de Cultura del Conceyu d’Uviéu.

Información y programa del congresu

Del 25 d’ochobre al 2 d’avientu, el Serviciu de Normalización L.lingüística de Cangas del Narce organiza un cursu d’asturianu, que va impartise tolops llunes, miércoles y xueves, n’horariu de 18 a 20 hores, sumando en total 36 hores lectives.

La matrícula pues facese hasta’l día 22 d’ochobre, bien presencialmente, na Casa Cultura Palaciu d’Oumaña, La Plaza la Oliva, e/n; bien per teléfonu nel 985 81 26 17 o 985 81 70 89, n’horariu de 10 a 13:30.