Portada Sociedá Seleiciones deportives asturianes: un puntu d’alcuentru énte nacionalistes

Seleiciones deportives asturianes: un puntu d’alcuentru énte nacionalistes

by asturnet

Col alderique sobre la xuntanza de los partíos nacionalistes abiertu, nestes fiestes son mayoría les fuercies que se ponen d’alcuerdu en pidir la oficialización de les seleiciones deportives asturianes, anque na mayor parte los casos nun se fai de forma conxunta. Xuventú Asturianista del PAS abrió la llista de peticiones, faciéndolo de siguío Bloque por Asturies, per un llau, y Darréu y Fai!, de forma conxunta.

Toles fuercies coinciden na necesidá de que les seleiciones asturianes tornen a los campos de xuegu, especialmente la de fútbol, que lleva más d’ocho años ensin xugar nengún partíu.

A Fai! y Darréu paez-yos “qu’entamar de nuevu un partíu amistosu con otra seleición nacional sedría un ésitu sinificatible”, yá qu’albidren que “la ciudadanía asturiana tien ganes de ver xugar a la seleición del so País y económicamente sedría un ésitu que podía ayudar al fúbol asturianu,sobremanera a les categories de mozos y moces, qu’anguaño viven munches dificultaes”.

Bloque por Asturies criticó la eliminación de beques al deporte base y pidió tamién la vuelta de los partíos de la seleición absoluta de fútbol “como forma de facer medrar l’autoestima de los asturianos y poder ver a xugadores d’élite asturiano qu’esportamos fuera del país”.

Xuventú Asturianista, pela so parte pidió, amás de la torna de la seleción asturiana absoluta de fútbol y el so afitamientu como representante futbolísticu de los asturianos y asturianes, “la oficialidá y la normalización internacional de toles federaciones deportives asturianes”.

Tamién te podria gustar