Sociedá

Esti xueves pasáu, 24 de febreru, el xuráu del VII Certame Periodísticu “Moscones en Xixón” decidió otorgar el gallardón d’esta edición al trabayu “Grau, el mercadón de la cultura”, un reportaxe espublizáu pol diariu ASTURNEWS nel añu 2010 y del que ye autor Inaciu Galán. Anque’l certame ta abiertu a obres en castellán y n’asturianu, esta ye la primer vegada que’l premiu va pa un trabayu redactáu n’asturianu nos siete años de vida del certame. Amás, ASTURNEWS ye’l primer mediu dixital que recibe esti gallardón, hasta agora otorgáu a trabayos espublizaos en La Nueva España y otros medios asoleyaos en papel, por periodistes como Luis Arias Argüelles-Meres, Lorena Valdés o César García Santiago.

Nel artículu premiáu Galán repasa les estremaes iniciatives y actividaes culturales que se desenrrollen en Grau “una montonera d’iniciatives culturales que trescienden del ámbitu moscón pa convertise nun focu d’emisión de cultura pa toa Asturies y pal restu del mundu”, en pallabres del propiu autor.

El premiu, convocáu pola asociación Moscones en Xixón y el Conceyu de Grau, va entregase na Casa Conceyu moscona a lo llargo del mes marzu y ta dotáu con 1.200 euros.

Inaciu Galán

Diplomáu en Turismu y Especialista en Xestión Cultural pola Universidá d’Uviéu, anguaño remata los sos estudios de Periodismu, amás de trabayar como redactor d’Asturnews, Inaciu Galán (Xixón, 1986) presenta’l programa “Al aldu: Xente de casa”, na TPA, dirixe’l departamentu de comunicación y prensa d’una empresa asturiana del sector de la moda y tien collaborao dende 2003 en medios como la Cadena SER, TLG, Asturies.com, Onda Peñes… Nesta última emisora dirixó dende 2004 a 2006 el programa “Asina foi… el Surdimientu”, pol que recibió’l Premiu de Periodismu Enriqueta González Rubín en 2005.

“Grau, el mercadón de la cultura”, trabayu premiáu col “Moscones en Xixón” de Periodismu

Once asociaciones roblen un manifiestu conxuntu esixendo a la Xunta de Castiella y Lleón el desenvolvimientu normativu y el cumplimientu efectivu del artículu del Estatutu d’Autonomía qu’establez la protección de los dos llingües minoritaries de la comunidá autónoma onde s’asitien los territorios de Lleón, Zamora y Salamanca. El vienres pasáu celebróse’l conceyu en Zamora, onde se constituyó la “Plataforma en Defensa del Leonés y del Gallego”.

Esti conxuntu d’asociaciones reclamen del Gobiernu Autonómicu l’adopción d’una política activa empuesta a la protección y promoción del usu de dambes llingües, tal como recueyen y prescriben los artículos 5.2 y 5.3 del Estatutu d’Autonomía de Castiella y Lleón. Dichos artículos aluden al respetu y la protección a la llingua gallega nos llugares onde s’utiliza y reconoz el particular valor del lleonés dientro del patrimoniu llingüísticu de la Comunidá, prescribiendo, amás, la regulación de la so protección, usu y promoción.”

Les asociaciones recuerden que’l gallegu ye llingua tradicional y d’usu habitual na parte occidental d’El Bierzo y de Sanabria. Pel so llau, el lleonés ye la llingua patrimonial de les contornes de la franxa norte y occidental de Llión, del noroeste de Zamora (escluyendo en dambos casos les zones gallegofalantes) y del estremu sudoccidental de Salamanca.

Les asociaciones constituyentes de la Plataforma en Defensa del Gallego y del Lleonés denuncien que, “mientres les demás comunidaes autónomes con patrimoniu llingüísticu distintu del castellán amparen les distintes llingües falaes nos sos territorios –seyan o non oficiales– y a los sos falantes, la de Castiella y Lleón desoi dafechu la protección del lleonés y, de forma parcial, la del gallegu”.

Esta ausencia de polítiques actives y efectives supón, según este organizaciones “una vulneración tantu del propiu Estatutu d’Autonomía como del restu de les normes xurídiques que tutelen el gallegu y el lleonés, esto ye: la Constitución Española, la Carta Europea de les Llingües Rexonales o Minoritaries del Conseyu d’Europa y la Llei de Patrimoniu Cultural de Castiella y Lleón”.

Dicha situación foi puesta de manifiestu y denunciada en repitíes ocasiones por distintes asociaciones culturales ya inclusive por diversu órganos de la mesma Comunidá Autónoma, como ye’l casu del Procurador del Común (Defensor del Pueblu) de Castiella y Llión y de les Cortes de Castiella y Llión, qu’encamentaron a la Xunta a llevar a cabu un cumplimientu efectivu del mentáu artículu 5.2.

El documentu robláu en Zamora esixe a l’alministración autonómica la creación d’un órganu alministrativu autonómicu encargáu de “les xeres de protección y promoción del lleonés y el gallegu, con cuenta de realizar una política de defensa de dambes llingües coordinada, coherente, eficaz y con continuidá”, y afala la promoción del gallegu y el lleonés “fomentando’l contactu cultural con otres zones que tamién tengan estes llingües como patrimoniales, anque diches zones tean fuera de les llendes alministratives autonómiques”.

Amás pide la Introducción del deprendizaxe del lleonés y el gallegu na enseñanza reglada “d’una forma afayadiza, con calter prioritariu nes zones onde estes llingües se caltienen o se caltuvieron n’usu polo menos hasta tiempos recientes, y d’alcuerdu a la demanda social nes demás zones”, xunto a la recuperación de la toponimia autóctona, y el sofitu a la creación cultural y lliteraria en lleonés y en gallegu, y a les publicaciones y editoriales qu’empleguen estes llingües.

Los colectivos que roblaron esti documentu son: Asociación Cultural Furmientu, Asociación Cultural Xente Nova, Buraco Asociación Cultural, Asociación Cultural Campo Aliste, Asociación Agora País Llionés, Asociación Ciudadanos del Reino de León, Documentación y Estudio de El Rebollar Asociación Cultural, Asociación Cultural Facendera pola Llengua, Asociación Cultural Fala Ceibe, Asociación Cultural El Teixu y Asociación Cultural La Caleya.

MANIFIESTU POLA DEFENSA DE LES LLINGÜES LLEONESA Y GALLEGA NA C.A. DE CASTIELLA Y LLEÓN

La páxina web del Muséu Etnográficu de Grandas de Salime amuesa dende va díes una versión en gallego-asturianu. La páxina ufre amás una versión en castellán y otra n’inglés, con espaciu pa los estremaos equipamientos, como A Retoral, a Corrada, a Casa del Molieiro o a Casoa.

Páxina del Muséu

La Tertulia Pachín de Melás, sigue cola so actividá esta vegada plantegando una tertulia sobre la tema de la evolución del movimientu gai n’Asturies nos últimos tiempos p’analizar los sos llogros, fracasos y proyectos pal futuru. Pa ello vamos cuntar cola presencia de Mané Fernández y Tino Burgos que son Coordinador xeneral de Xega y Coordinador del grupu d’educación de Xega respectivamente.

Dende l’agrupación d’Unidá Nacionalista Asturiana (UNA) nel conceyu de Xixón consideren que l’apueste pola igualdá efectiva de derechos de les persones independientemente de la so orientación sexual, ye una necesidá básica pa cualquier sociedá que quiera autodenominarse democrática, y toa’l discutiniu surdíu alredor del parque 28 de xunu (Día del arguyu gai) amuesa qu’inda queda enforma por avanzar nesti campu.

La Tertulia va tener llugar nel Chigre Cantábrico (C/Muelle d’Oriente, 3. Xardinos de la Reina, Xixón), a les 20.30 hores d’esti martes 1 de marzu.

El 2 de marzu a les 20:00 hores entama n’Uviéu un cursu básicu de gallego-asturianu promovíu pol Colectivo Trafego col fin d’acercar a la xente del Navia-Eo que vive nel centru d’Asturies la so llingua y d’averar a los que nun son falantes de gallego-asturianu a la realidá llingüística del occidente más estremu del país.

Esti cursu va impartise nel llocal del Conseyu da la Mocedá del Principáu d’Asturies (Plaza’l Sol, 4-6, Uviéu) y va tener una duración de 20 hores, que se van repartir nun día per selmana y en dos hores per día (dende la primer selmana de marzu hasta principios de mayu).

Los interesaos n’apuntase nel cursu, que tien un costu de venti euros, han facelo mandando los sos datos a colectivotrafego@gmail.com o bien llamando al 686 757 797. Va dase un diploma a los participantes.

L’Asociación Cultural N’Ast y l’Atenéu Cultural Xuan María Acebal informaron estos díes de la creación de la Tertulia Cultural «Enrique García-Rendueles», que surde de la collaboración ente los dos asociaciones col oxetivu de configurar “un espaciu abiertu d’alcuentru y alderique sobre la hestoria, la cultura y la situación actual del país”.

La Tertulia adopta’l nome del autor de “Los nuevos bablistas” n’homenaxe y alcordanza de quien ellaboró ún de los plantegamientos socio-llingüísticos sobre la realidá asturiana más avanzaos del tiempu anterior a la década de 1970 y al nacionalismu contemporáneu.

Nun principiu la Tertulia aconceyaráse los xueves a les 20:00 hores nel Centru Social «L’Ayalga» de Xixón (Cai Prendes Pando 11 Baxu) anque comenenten que “nun se refuga que posteriormente puea entamase n’otros conceyos”.

Conceyu Abiertu, espaciu cultural asitiáu n’Uviéu, va acoyer esti miércoles día 23 de febreru a les 19:30 hores, la presentación del llibru editáu pola Fundación Andreu Nin d’Asturies “Jose Maria Loredo Aparicio en el país de los soviets”. Nel actu va participar l’editor, Boni Ortiz, miembru de la FAN Asturies.

Dende hai dos años la Fundación Andreu Nín cuenta con una sección n’Asturies, el Colectivu Emilio García, que bien desenrrollando un interesante llabor de cara a la recuperación de la memoria hestórica en tolos aspectos “rellacionaos col pasáu revolucionariu de la nuestra tierra”.

Nesti tiempu, fízose un Alcuentru Estatal de la Fundación en Xixón, coincidiendo col 75 aniversariu de la Revolución d’Ochobre de 1934, púnxose en funcionamientu la so páxina web, ficiéronse delles presentaciones y editóse’l llibru.

José María Loredo Aparicio en el país de los soviets- nel que se recueye los testos publicáos por esti asturianu, pioneru del comunismu, nel periódicu xixonés El Noroeste después de que volviera de la Unión Soviética nel branu de 1923.

José María Loredo Aparicio, abogáu de profesión, foi fundador del PCE nel que militara hasta que na etapa final de la dictadura de Primo de Rivera entró en contactu cola oposición Trotskista. Poco dempués de proclamáse la II República constituyóse la Esquierda Comunista d’España qu’agrupaba a los seguidores de les tesis de Trotsky na deriva del cursu totalitariu empredíu por Stalin na URSS.

Nel llibru, amás de reproducir los artículos citaos, aparez una biografía de Loredo Aparicioqu’ofrez numberosa información sobre los debates que recorrieran a la esquierda en Asturies nos años trenta.

Esti martes, 22 de febreru, a les 17 hores y na Aula Magna del Edificiu Hestóricu, va celebrase la Xornada “La inclusión de la bicicleta na movilidá urbana y universitaria”, entamada pol Vicerrectoráu d’Estudiantes y Empléu. Con ella preténdese impulsar el potencial del usu de la bicicleta nel ámbitu urbanu y particularmente como alternativa de tresporte nos desplazamientos de la comunidá universitaria. Ente los ponentes va cuntase cola presencia del ex ciclista profesional Chechu Rubiera, que va participar nuna mesa sobre conseyos prácticos nel ciclismu urbanu.

La bicicleta ye una alternativa de tresporte urbanu que puede funcionar nos desplazamientos de los miembros de la comunidá universitaria. Embaxo esta premisa analizará’l potencial de los dos ruedes como vehículu habitual na xornada “La inclusión de la bicicleta na movilidá urbana y universitaria”.

El rector, Vicente Gotor, va inaugurar les meses d’alderique, xunto a la xefa Provincial de Tráficu d’Asturies, Raquel Casado, la conceyala de Seguridá Ciudadana y Tráficu d’Uviéu, Concepción García, y la vicerrectora d’Estudiantes y Empléu, Susana López.

Baxo’l lema “Escontra una nueva cultura de la movilidá” la Mesa 1 va cuntar como ponentes con especialistes venceyaos a la xestión del tráficu urbanu y a diverses árees de la Universidá. La Mesa 2 va dedicase a ufiertar conseyos pa la práctica del ciclismu urbanu y va tener ente los sos integrantes al ex ciclista Chechu Rubiera.

Programa completu de la xornada

L’Asociación de Trabayadores de la Normalización Llingüística vieno acabante denunciar la situación del Serviciu de Normalización Llingüística de Mieres y desixe l’apertura nunes condiciones que garanticen la so estabilidá y continuidá “col oxetivu de que la normalización social del asturianu sía un procesu activu y participativu y non como se vien desarrollando nesti Conceyu que se-y permite tar en funcionamientu seis meses al añu, col preste de la Conseyería de Cultura”.

L’Asociación denuncia que depués de casi tres meses andaos del 2011 el Conceyu Mieres sigue col Serviciu de Normalización Llingüística peslláu y diz nun entender “porqué unos Conceyos, contando cola mesma financiación, caltienen el SNL abiertu tol añu mientres que’l de Mieres sufre añu tres añu la desconsideración, dexadez y falta de compromisu de los/les responsables municipales y, al empar, del Principáu d’Asturies. Nel casu d’esti Conceyu la situación ye bien grave, porque nesta ocasión lleva peslláu dende’l 31 d’agostu del 2010”.

Va casi pa ocho años desque s’abrieron los primeros servicios de normalización nos conceyos d’Asturies y nos que dende l’Asociación de Trabayadores de la Normalización Llingüística vienen trabayando por buscar soluciones a la inestabilidá llaboral y a la temporalidá de dellos SNL, presentando propuestes a la Dirección Xeneral de Política Llingüística pa iguar esta situación. La respuesta nestos últimos años foi sigún l’Asociación “la d’inorales y nun dar soluciones a los problemes que venimos denunciando”.

Los trabayadores de l’Asociación nun son a entender “cómo ye posible que la Dirección Xeneral de Política Llingüística conceda subvenciones pa los SNL y nun garantice’l so funcionamientu l’añu enteru y nin siquiera lleve un control de cuála ye la política llingüística que se desenvuelve nesi Conceyu”.

El pieslle del SNL de Mieres tien un problema añadíu y ye que “nestos meses pasaos los SNLs desenvolvieron, diseñaron y xustificaron toles campañes empobinaes a la normalización del asturianu. ¿Cómo les desenvolvió en Mieres si nun hai personal técnicu dende’l 31 d’agostu?”.

PA l’Asociación de Trabayadores de la Normalización Llingüística “los Conceyos tienen una responsabilidá evidente nel pieslle del SNL, pero la Conseyería, que ye la que financia’l SNL, tien una responsabilidá mayor, por ser l’organismu que xestiona esti dineru públicu y que tien el deber de controlar el so gastu y evitar la so malversión”.

La Dirección Xeneral de Política Llingüística “tien de garantizar que los SNLs puedan desenvolver el so trabayu nunes condiciones estables y dignes. El métodu pol que se financien estos servicios ye claramente insuficiente y nengún añu garantizó la continuidá de tolos SNLs y eso ye demostrable, basta con mirar pa lo que vien pasando munches veces nel Conceyu Mieres y n’otros”.

La Fundación Belenos ta acabante asoleyar el númberu 30 de la so revista “Asturies, memoria encesa d’un país”. Nesti númberu espublícense los trabayos que vienen darréu: “Monte Castrelo de Pelóu: un asitiamientu prehistóricu de llarga perduración en Grandas de Salime. L’ocasu del paradigma castreñu d’aniciu romanu n’Asturies”, “El faunu de Moñes (Piloña)”, “Los primeros colonos asturianos de Norteamérica. La llaceriosa espedición de Pánfilo de Narváez a La Florida según Álvar Núñez Cabeza de Vaca”, “Aportaciones al estudiu del llinu n’Asturies”, “L’acebu, un abellugu na viesca”, “L’alfarería asturiano tradicional. Un centru d’interpretación: utopía o realidá” y “La gueite ribera”.

Amás, los sos conteníos complétense coles seiciones habituales de “L’estoxu”, “Cartafueyos de Belenos” y “Editorial”, dedicáu nesti casu a la polémica xenerada pola apaición en prestixosos medios de comunicación internacionales de la sidre vasco comu dalgo “único” n’Europa. La revista, que nel mes de xunu cumplirá los quince años d’esistencia, ye tou un referente nel estudiu de la cultura y etnografía d’Asturies.