Sociedá

Los Conceyos occidentales de Bual, Navia y El Franco acaben d’anunciar la rotulación billingüe de les sos Cases del Conceyu. De magar dellos díes los cartelos indicativos tán en gallego-asturianu y castellán, “aprovechando” les sovenciones a conceyos pa la normalización social del asturianu y gallego-asturianu, comenten dende la Oficina de Coordinación Cultural y Llingüística del Parque del Navia.

Y ye qu’esti llabor tuvo coordináu por esta Oficina de Coordinación Cultural y Llingüística del Parque Histórico del Navia, dende onde espliquen que los nuevos cartelos inclúi les plaques dientro de los edificios alministrativos de los “achegando á xente a posibilidá de ver espeyada el gallego-asturiano por primeira vez”.

La revista etnográfica “Cultures”, dirixida pol antropólogu Roberto González-Quevedo y espublizada pola Academia de la Llingua Asturiana acaba de llevar a les llibreríes el númberu 16, dempués de venti años de vida. Ente les novedaes más destacaes, un estudiu hasta agora inéditu de la escritora l.lacianiega Eva González Férnandez, qu’hasta la so muerte nel 2007 yera la decana de les lletres asturianes.

Nesti númberu nuevu de Cultures, tamién s’inclúi l’estudiu «Los cuentos tradicionales asturianos: un averamientu a la cultura asturiana al traviés de los cuentos de tresmisión oral na obra Contáronmelo pa que lo contara, de Milio’l del Nido», de Santiago Fano; «La música nel conceyu Proaza», d’Antonio Alonso de la Torre García y Francisca Iglesias Álvarez; y «Xuegos nel Alto Ayer», de Covadonga González Muñiz. Amás, la revista tien tamién una sección de reseñes, onde se fala de les obres La chute du ciel. Paroles d’un chaman yanomami, de Davi Kopenawa y Bruce Albert, titulada «Camín del acabóse»; Retour aux sources, de Françoise Héritier, titulada «Alcordanza del informante»; y L’adieu au voyage. L’ethnologie française entre science et littérature, de Vincent Debaene, col títulu de «L’antropólogu como escritor».

La décima edición de la Selmana Cultural de Cangas va llegando a la so fin dempués de dellos díes d’actividaes. Esti xueves 17, va dase llectura a la conferencia “La minería na historia ya na identidá d’Asturies”, a cargu de Francisco Erice, de la Facultá d’Hestoria de la Universidá d’Uviéu. Sedrá a les siete y media la tarde nel Auditoriu Casa Cultura “Palaciu d’Oumaña”.

El vienres, a les ocho y media el grupu Teatru Kumen lleva a la “vil.la” la obra de teatru “Derrabe” a partir de les ocho y media, nel Teatru Toreno.

El sábadu rematen les actividaes cola entrega de premios de los concursos de manualidaes y poesía, y charra-coloquiu “Lliteratura y minería”, cola presencia de Benigno Delmiro Coto y Alejandro Gallo, moderamdp Amalia Fernández Menéndez, profesora de lliteratura del IES Cangas del Narcea. L’actu va facese tamién nel Auditoriu de la Casa Cultura “Palaciu d’Oumaña”, de magar les siete y media la tarde.

Amás, hasta’l 31 de marzu, va siguir abierta la esposición de la X Selmana Cultural de Cangas “Pueblu Mineru”, nel mesmu edificiu.

L’Academia de la Llingua Asturiana ta organizando pa los conceyos de Carreño y Gozón – xunto col Serviciu de Normalización Llingüística de la Mancomunidá d’El Cabu Peñes – un cursu d’alfabetización pa persones adultes en llingua asturiana como preparación pa la Prueba de Conocencia d’Asturianu, que va ser pal 28 de mayu de 2011 con un plazu de matrícula (pa esta prueba) del 16 al 26 de mayu.

El cursu tien un llargor de 36 hores, y va dase los martes y xueves de los meses d’abril y mayu, de 17:00 a 19:30 hores, y una hora de presentación y esposición del cursu. El sitiu onde se va dar esti añu ye’l polivalente La Baragaña de Candás, Carreño.

Pa más información consultar la páxina web www.faronorte.org o ponese en contactu col Serviciu de Normalización Llingüística de la Mancomunidá d’El Cabu Peñes nos teléfonos 985883050 y 985872406, amás de los correos llingua@mcabop.com y clasesdavid@hotmail.com

La Conseyería de Cultura convoca sovenciones pa programes d’actividaes culturales d’asociaciones, fundaciones culturales privaes y actividaes culturales d’interés pal páis, promovíes por particulares, fundaciones y asociaciones, con un importe total de 260.363 euros, anque la cantidá máxima por proyectu ye de 25.000 euros. Los proyectos pueden presentase hasta’l 6 d’abril, baxo les condiciones afitaes nel BOPA del 7 de marzu.

Dientro do “Plan d’Ociu y Participación Cultural” l’Asociación “San Tirso del Eo” entama l’actu “Pálpitos da Terra – Presentación de creacióis culturales da comarca Eo-Navia”, una xornada que va facese esti vienres viniente, 18 de marzu, de magar les siete y media la tarde y teniendo como marcu l’Auditoriu Municipal de San Tiso d’Abres. Esti actu celébrase per segunda vegada esti añu y va cuntar con música, arte, cine y lliteratura.

L’arte del Eo-Navia va tar representáu pola obra de José Manuel García Fernández, dibuxos a carbonciellu. La lliteratura polos poemes de Miguel R. Monteavaro y la narrativa d’Aurora G. Rivas y Belén Rico Prieto. La xornada va cuntar amás con un audiovisual, el documental “A bruxa de Brañavara” d’Alberto Álvarez Peña, y cola música del discu “7 sones” del grupu folk Darbukka y del Grupo da Escola de Música Tradicional San Tiso del Eo.

Na inauguración va participar tamién la Directora Xeneral de Política Llingüística d’Asturies, Consuelo Vega.

El domingu 27 de marzu La empresa Globentos, dedicada a la decoración profesional con globos y a l’animación, ufierta un cursu d’aniciu a la globoflexa, prácticu dafechu. Nel mesmu van dase a conocer los tipos de globos y marques, técniques d’infláu y anoyáu y dellos principios básicos de la globoflexa, amás de les técniques de torsión de globos y l’animación con globos (gorros, xuegos, etc).

El cursu va impartise de 10:00 a 14:00 y de 16:00 a 20:00 hores, na Academia Opositta na cai Picu Urriellu, 5, Uviéu, con un preciu de 65 euros. Más información en info@globentos.com

Baxo’l títulu N’asturiano queda guapo II, el Serviciu de Normalización L.lingüística del Conceyu Cangas vieno acabante presentar la s0 campaña de normalización social dirixida a educación infantil y primaria, qu’estiañu desenvuelve por segunda vez consecutiva.

La serie’i materiales que s’ufiertan enmárcase dientro de la segunda fase del proxectu N’asturiano queda guapo, que tien por fin “apurrir al profesoráu ya al alumnáu d’educación infantil ya primaria materiales que-ys permitan conectar cono léxicu patrimonial vinculáu a las distintas zonas ya a los distintos ámbitos, nesti casu: el monte: flora ya fauna, la ribera: flora ya fauna, las estaciones: primavera, branu, seronda ya iviernu; la vistimenta, el calzáu ya los complementos; la casería ya’l cuerpu humanu por dientro”.

Sigún asoleya una nota de prensa de la Oficina de Normalización de Cangas esti martes “espérase que los materiales que s’ufiertan valgan d’apoyu didácticu nas distintas clases”.

La organización de mocedá independentista “Darréu” prepara pal viniente 12 de marzu, les III Xornaes “Trabayadora Güei, Trabayadora Siempres”, onde van ufiertar delles actividades empobinaes “na llucha escontra’l patriarcáu y el modelu de sociedá vixente”, como un mural reivindicativu, la proyección d’un documental, una charra alderique y una espicha pa zarrar les xornaes. El mural va facese en Sotrondio y el restu d’actividaes van desendolcase na tarde del día 12, nel Centru Social L’Ayalga de Xixón, de magar les 17:30 hores.

La proyección del documental “Esclaves del sexu”

Narra delles hestories de muyeres que tuvieron que prostituyise en distintos países europeos víctimes de los malos tratos, de les amenaces y de les continues violaciones executaes con estrema crueldá. Un documental empobináu a denunciar el negociu del tráficu de muyeres pa la so esplotación sexual.

Charra – alderique

Compuesta por persones de diferentes organizaciones y colectivos, tará orientada a falar sobre la situación de los movimientos feministes y les diferentes visiones del feminismu. Analizaranse temes como’l negociu que supón la prostitución, la hestoria de los movimientos feministes, la la llucha escontra’l patriarcáu, el feminismu revolucionariu, y la violencia machista, ente otros.

La recién entamada Tertulia Enrique García-Rendueles organizó un alderique sobre la teritorialidá asturiana pa lo que convidó al escritor Xaviel Vilareyo, autor del llibru “Los ámbitos de la Nación Asturiana” pa esponer les sos idees sobre’l territoriu d’Asturies. Xaviel Vilareyo desplicó cómo s’orixinaron per primer vegada les fronteres del territoriu d’Asturies señalando que la frontera sur que divide les agües al norte ye la más moderna yá que data del añu 910. Les otres fronteres d’Asturies, la occidental marcada pol cursu del ríu Eo y la oriental que desllenda a Asturies de Santiyana nel valle del ríu Miera són inda más antigües.

Según Xaviel Vilareyo los oríxenes de la llende del ríu Eo como frontera occidental d’Asturies hai que buscalos “na demarcación eclesiástica y nos dominios del obispáu d’Uviéu creáu por Alfonsu II llende eclesiástica que perduró hasta 1954 y que civilmente remaneció dende 910 hasta 1834, cuando s’esgayaron artificialmente los conceyos asturianos de Burón, Suarna y Conforto”.

L’autor de Mieres desplicó que la llende ente Asturies de Santiyana con Tresmiera “ye tamién mui antigua” y tien el so orixe na creación del obispáu de Veleya-Valpuesta, el segundu obispáu del Reinu d’Asturies que col tiempu pasó a pertenecer dafechu al Reinu de Pamplona. L’obispáu d’Uviéu quedaba asina reducíu al territoriu ente los ríos Eo y Miera. Esta llende oriental d’Asturies de Santiyana con Tresmiera “inda sigue esistiendo”, afirmó.

Civilmente, l’orixe de les fronteres actuales del territoriu d’Asturies daten del añu 910 cola división del Reinu en trés partes, quedando Fruela II cola parte tresmontana situada al este del ríu Eo. Nel sieglu XII, l’obispáu d’Uviéu pierde Asturies de Santiyana (salvo Yermu) a favor de Burgos y Asturies de Santiyana va convertise nuna merindá o provincia de Castiella, respetándose siempre la so frontera histórica con Tresmiera. Llébana formaba una merindá propia que a fines del XVIII vincúlase formalmente a Asturies de Santiyana. Asturia d’Uviéu y Asturia de Santiyana configuraron modernamente el territoriu de Les Asturies, en plural “yá que se refier a dos entidaes o territorios igualmente asturianos”, esplicó Vilareyo.

Pa Xaviel Vilareyo, el territoriu d’estes Asturies ye lo que conforma’l territoriu nacional d’Asturies, dotáu non sólo d’una hestoria propia sinón tamién d’una mesma llingua, cultura y tradiciones, y sobre tou un mesmu territoriu qu’hestóricamente siempre se nomó Asturies y qu’albidra, “el nacionalismu asturianu ha reivindicar política y territorialmente como parte integrante d’una mesma nación asturiana”.

El ponente recalcó per otru llau na so idea de reivindicar los Países Asturianos del sur de los Montes Asturianos culturalmente como parte de la cultura asturiana “pero non como parte del so territoriu nacional yá qu’esta tierra dexó de nomase Asturies dende l’añu 910”.

El públicu asistente a la tertulia participó tamién nun vivu debate sobre la idea de la territorialidá asturiana y los fenómenos culturales alrodiu d’ella y per últimu toos definieron d’un xeitu diferente y estremáu lo que personalmente entendía pol conceptu de “nación”.