Sociedá

A lo llargo de los díes 8, 9 y 10 d’abril La Llaboral de Xixón abre les sos puertes y ufierta la oportunidá de ver y conocer, de baldre, los espacios que componen el complexu, la so arquitectura y la hestoria d’esti edificiu emblemáticu. Demientres les visites van celebrase delles actuaciones con magos de tol estáu, que van animar los espacios de La Llaboral. Ente los espacios a percorrer van tar el patiu corintiu, la plaza, el teatru, la Escuela Cimera d’Arte Dramáticu y Profesional de Danza y les vieyes llavanderíes.

El vienres 8 d’abril les visites de grupos van entamar a les 16:30, 17:30 y 18:30 hores, mientres que’l sábadu 9 y el domingu 10 d’abril van ser cada media hora, de 10:30 a 13:30 hores, y de 16:00 a 19:00 hores.

Pueden facese visites llibres el vienres, de 16:00 a 20:00 hores; y el sábadu y domingu, de 10:00 a 15:00 y de 16:00 a 20:00 hores.

Les reserves pa grupos de más de 20 persones, han facese nel 902 306 600 ó al traviés del corréu eventosrecrea@recrea.asturias.es

La Radio Televisión del Principáu d’Asturies también va abrise esos díes a visites en grupos pequeños y con reserva previa. El vienres 8, a les 17:00 y 18:30 h.; el sábadu 9 y domingu 10, a les 10:30, 12:00, 17:00 y 18:30 hores.

La Conseyería de Cultura y Turismu convoca les sovenciones pa la normalización social de la lliteratura n’asturianu y en gallegu-asturianu nel ámbitu editorial, pal añu 2011 y con dos llínies: Promoción del llibru n’asturianu y en gallego-asturianu, dotada con 171.000 euros, y Fomentu de la traducción y/o edición n’otres llingües d’obres asturianes, con 18.000 euros nel presupuestu.

Les solicitúes de subvención, xunto cola documentación que se precisa, van presentase según modelu normalizáu, nel rexistru Xeneral Central de l’Alministración del Principáu d’Asturies o al traviés de cualesquier de los medios establecíos na llei, hasta’l 30 d’abril.

Bases nel BOPA de 31 de marzu de 2011

L’Asociación Cultural N’Ast ta acabante asoleyar un comunicáu onde espresen públicamente “la nuesa más fonda solidaridá col arqueólogu Ángel Villa” énte “l’acosu que ta sufriendo”. Les pretensiones de la Conseyería de Cultura d’inhabilitalu, diz N’Ast, fundaméntense en qu’informó del afayu d’un zulu con materiales arqueolóxicos nel Muséu de la Campa Torres de Xixón al Muséu Arqueolóxicu d’Asturies y a la Fundación Municipal de Cultura enantes qu’a la so xefa de serviciu, lo que pa l’actual “élite burocrático-caciquil constitúi una «falta mui grave»”, denuncien.

L’asociación en defensa de la llingua y cultura d’Asturies sorraya que de resultes de la so denuncia “alcontráronse nun estáu casi irrecuperable más de trescientes caxes con pieces procedentes de la escavación que concluyeren diez años enantes los arqueólogos José Luis Maya y Francisco Cuesta”.

La Conseyería de Cultura pide p’Ángel Villa sanciones de la másima durez, que van dende’l despidu disciplinariu hasta la suspensión d’empléu y sueldu con una duración másima de seis años. “Una vegada más la élite gobernante del PSOE amosa la verdadera esencia de la so política: el palu y la cenahoria. Cenahoria pa los que callen y glorifiquen el so réxime, y palu pa tou aquel que atrévase a discrepar y denunciar la incompetencia y/o la corrupción de l’actual Alministración pública”, denuncia l’asociación qu’esixe que finen los ataques al arqueólogu y que recupere la normalidá llaboral darréu.

El Llar Social Conceyu Abiertu d’Uviéu acueye esti vienres, 1 d’abril, a les 19:30 hores, una charra-alderique nel que va intervenir Martí Caussa, editor del Plural del númberu 114 de la revista Viento Sur.

Nel viaxe que’l Papa fixo va poco, apoyó a les clares el fundamentalismu de la Conferencia Episcopal y criticó abiertamente’l «laicismu gafu» del Gobiernu español; anque ta claro que l’Estáu español nun ye laicu y que la Ilesia Católica disfruta d’un tratu preferencial bien ostentosu. Un tratu que contrasta col que-yos da a otres relixones, sobre manera al Islam.

Bien de Conceyos siguen bloquiando la construcción de mezquites con tou tipu de sides. Delles escueles impidieron la entrada a una alumna musulmana por llevar pañuelu y al altu cargu de Xusticia qu’avaló esti derechu cesáronlu por esti motivu. Otros Conceyos tomaron iniciatives pa prohibir el burka nos edificios municipales y llevantáronse voces pa prohibilu tamién na cai.

Los discursos de dellos políticos, publicistes y medios de comunicación encerricen la islamofobia. Y la so progresión impulsa a otros políticos a sumáse o acobardálos pa encaráse con ella.

La Universidá d’Uviéu acaba de facer pública la creación d’un órganu que va asesorar al rector en materia d’usu y promoción de la llingua asturiana dientro de la insititución. La Comisión créase col envís de dar calce a les previsiones conteníes nel artículu 6 de los Estatutos, en rellación cola protección y usu de la llingua asturiana. Esta midida obedez, según comenten dende’l Rectoráu “a un compromisu firme contraíu col que se pretende encauzar la demanda d’una parte de la comunidá universitaria, cola finalidá d’impulsar actuaciones asemeyaes a les yá entamaes nos trés últimos años en favor del asturianu”.

El Rectoráu destaca, d’ente estes acciones la posibilidá de presentar escritos ante’l Rexistru de la Universidá en llingua asturiana; la incorporación del minor o la mención d’asturianu nos nuevos graos de Filoloxía y Maxisteriu; l’usu d’esta llingua como preséu de comunicación institucional al traviés de la Web corporativa; o la traducción de determinaos testos al asturianu, ente los que s’inclúi la recién edición de los nuevos Estatutos de la Universidá.

La Comisión va tar integrada pol propiu Rector, Vicente Gotor Santamaría, el Vicerrector d’Informática y Comunicaciones Víctor G. García García, el Director d’Área Aplicaciones de xestión, David Melendi Palacio, la Profesora del Departamentu de Filoloxía Clásica y Románica, Ana María Cano González, el Profesor del Departamentu de Filoloxía Española, Ramón d’Andrés Díaz y los estudiantes Inaciu Galán y González, Javier Cubero de Vicente y Santiago Fano Méndez.

La Tertulia Enrique García Rendueles recibe esti xueves 24 de marzu a Santiago Fano, militante del movimientu estudiantil y miembru del Conseyu d’Estudiantes de la Universidá d’Uviéu, que va a falar de la difícil situación de la Universidá anguaño y de les reivindicaciones del movimientu de base por una Educación pública y de calidá. Sedrá nel llocal L’Ayalga, nel 11 de la cai Prendes Pando de Xixón.

La Plataforma d’Asociaciones en Defensa del lleonés y el gallegu organiza en collaboración col Conceyu d’Estorga, una Xornada sobre Patrimoniu Llingüísticu. Les sesiones van tener llugar esti sábadu 26 de marzu na biblioteca del conceyu lleonés, cola presentación a les once la mañana, per parte d’Enrique Soto de Soto, Teniente-Alcalde d’Estorga, al que van siguilu espertos llingüistes y xuristes de Lleón y Asturies.

A les once y media la mañana Ángel Iglesias Ovejero, Caderalgu eméritu de la Universidá d’Orléans y miembru de Documentación y Estudio de El Rebollar, va falar del “Pasado, presente y futuro del habla de El Rebollar (Salamanca): perspectiva general”. A les 12:15, Fernando Álvarez-Balbuena García, Profesor de Filoloxía Románica de la Universidá d’Uviéu y miembru de la Xunta Asesora de Toponimia d’Asturies, va presenmtar la so ponencia “La toponimia mayor de las áreas falantes de gal.lego(portugués) ya (astur)l.lionés de L.lión ya Zamora: estáu actual ya prospectiva del sou conecimientu”. A la una la tarde, y pa pesllar les sesiones de mañana, José Ignacio Martín Benito, Caderalgu d’Hestoria y Xeografía nel IES León Felipe de Benavente, Presidente del Centro de Estudios Mirobrigenses y Procurador nas Cortes de Castiella y Llión pol PSOE, va dar llectura a la ponencia “El patrimonio lingüístico de Castilla y León. Estatuto y realidad”.

Pela tarde, la Xornada va siguir cola conferencia “Tutela de las llinguas minorizadas na Comunidá Autónoma de Castiella y Llión nel marcu européu y estatal”, por José Manuel Pérez Fernández, Profesor de Derechu alministrativu de la Universidá d’Uviéu, especialista en Derechu llingüísticu y coordinador del llibru “Estudios sobre el estatuto jurídico de las lenguas en España”, de magar les 16:30 hores.

A les cinco y cuartu, María Cueto Fernández, becaria pre-doctoral del Departamentu de Filoloxía Española de la Universidá d’Uviéu, va facer “Una aproximación a la dimensión social y ecollingüística del asturllionés”, siguida de Xabier Lago Mestre, miembru del Colectivo Cultural Fala Ceibe, qu’a les seis, va comentar delles cuestiones alredor d’“A minoría lingüística galegueira en O Bierzo”. Pieslla la tarde José Alfredo Hernández Rodríguez, miembru de l’Asociación Cultural Zamorana Furmientu, con “El asturleonés en el noroeste de Zamora: situación actual y colectivos de fidelidad lingüística”.

L’Alcalde d’Estorga Juan José Alonso Perandones va poner el ramu a la Xornada a les 19:15 hores.

Nel BOPA del 11 de marzu espublizáronse lesbases reguladores y la convocatoria conxunta de subvenciones a entidaes llocales, nel ámbitu de la Conseyería de Cultura y Turismu, del añu 2011. Dientro d’esta convocatoria, la llinia 1 ye la de “Normalización social del asturianu y del gallego-asturianu”. Esta convocatoria cuenta con una dotación de 166.500 euros pa financiar proyectos y actividaes de les entidaes locales empobinaes al desenrollu de proyectos y actividaes que busquen la normalización social del asturianu o gallego-asturianu. El plazu pa presentar proyectos acaba’l llunes 11 d’abril.

La Oficina de Coordinación Cultural y Llingüística del Parque Hestóricu del Navia espubliza, n’edición billingüe en castellán y gallego-asturianu, el llibru d’oficios tradicionales “Memoria de las manos / Memoria das maos”, nel que se trata d’averar al llector una amuesa d’oficios tradicionales que se dieron hestóricamente, ente otros munchos llugares d’Asturies, nel territoriu de los conceyos de la contorna Navia-Porcía.

Memoria das maos, avérase a esta selección d’oficios tradicionales tomando como referencia la esperiencia concreta de delles persones de los conceyos de Bual, Cuaña, El Franco, Grandas de Salime, Eilao, Navia, Pezós, Tapia y Villayón, que nos averen a ellos en calidá d’informantes. Los techadores con paya de centenu, la producción del vinu, los texedores, los apicultores, los ferreros de clavazón, los caleros, los molineros y les molineres, los pescadores de ribera, les rederas y les pescaderes son los llabores poles que se fai un percorríu nesta publicación, na que garra una importancia fundamental la perspectiva llingüística, que dexa apaecer los términos más importantes que describen l’oficiu na llingua tradicional de los informantes, el gallego-asturianu, tamién na versión castellana.

Esti llibru va distribuyise gratuitamente nos conceyos del Parque Hestóricu del Navia y na sede de la Fundación Parque Hestóricu del Navia, y va presentase esti miércoles 23 na sede de la Fundación Parque Hestóricu del Navia.

Per aciu del so Presidente, Xosé María Estrada Janáriz, l’Aconceyamientu de Xuristes pol Asturianu vien de proponer la candidatura del Conceyu por Otra Función Pública n’Asturies (COFPA) a la 1er Edición del Premiu de Drechos Humanos “Amparo de Drechos y Libertades” creáu pela Procuraduría Xeneral del Principáu d’Asturies, al empar que refuga como presidenta del tribunal a la señora Felgueso, Procuradora Xeneral, pol fechu de que COFPA sigue acciones llegales énte’l Tribunal Constitucional escontra la mesma, por conculcación del artículu 21.1 de la Declaración Universal de los Derechos Humanos que proclama’l derechu d’aportar a los puestos de trabayu del sector públicu en condiciones d’igualdá, cosa que, n’opinión de COFPA, nun se respeta na Procuradoría Xeneral del Principáu d’Asturies.

La Procuradora “corrixe” una convocatoria discriminatoria