Sociedá

El domingu que vien, el quioscu de música de Noreña va ser espectador d’esceición de la segunda xornada del Campeonatu d’Asturies de Liriu. La Camaretá de Liriu de Noreña, virtual líder de la clasificación xunto a la seición masculina d’Asturlirio, va organizar la xornada nel paséu de Frai Ramón, na villa noreñense. La partida oficial escomenzará a les cinco de la tarde (un cuartu d’hora enantes abriránse les inscripciones de los equipos). Acabante la mesma, cálculase que pa les seis y media, va facese’l sortéu previu al II Abiertu’l Picadillu de Noreña.

Pesie a la coincidencia col partíu’l Sporting a la mesma hora y ser día de regresu de vacaciones, les fiestes del picadillu que se celebren na villa condal sofiten la idea de que l’ésitu de públicu pue ser asemeyáu al del añu pasáu. Dende’l CNL tán seguros que vien de xente “s’allugará a la rampla u los lirios esnalaran el domingu”.

L’Asociación Dante Alighieri, nel marcu de les sos actividaes culturales, entama 2 nuevos cursos de fotografía, unu d’aniciu, del 28 d’abril al 26 de mayu, los xueves de 20 a 22 hores; y otru avanzáu, del 25 d’abril al 25 de mayu, los llunes y miércoles de 17 a 18 hores.

Los cursos van facese na so sede d’Uviéu, nel 34 de la cai Foncalada, y ye necesario cuntar con una cámara réflex (dixital o analóxica), siendo’l preciu del cursu de 90 euros.

Les inscripciones pueden facese nel corréu danteasturias@gmail.com o llamando al teléfonu 985 21 12 35.

L’Academia de la Llingua Asturiana y la Oficina de Coordinación d’Actividaes Culturales y Llingüístiques de la Mancomunidá Ozcos-Eo entamen la celebración d’un cursu d’alfabetización en gallego-asturianu p’adultos, con 36 hores de duración. El cursu, que ye de baldre y nun precisa conocimientos previos va facese de ocho a diez de la nueche, tolos martes y xueves dende’l 26 d’abril nel Llocal d’Asociaciones d’A Veiga.

P’apuntase, los interesaos han ponese en contacto cola Oficina de Coordinación d’Actividaes Culturales y Llingüístiques, nel teléfonu 985 634 067 o nel corréu lletrónicu: culturalylinguistica@oscos-eo.net

La recoyida selectiva d’envases de vidriu xorreció un 6,8 por cientu n’Asturies demientres el 2010, pa llegar a recoyese nos contenedores verdes un total de 15.816.790 kilogramos, esto ye, sobre 1.001 tonelaes más que nel 2009. D’esta manera, Asturies algama ser la Comunidá Autónoma española na que más sxorrez la separación d’esta residuos.

Más de 500 muyeres de 21 conceyos asturianos participen esti martes 12 y el miércoles 13 nos intercambios del programa Tiempu Propiu que promueve l’Institutu Asturianu de la Muyer.

Tiempu Propiu ye un proyectu empobináu a muyeres mayores de 50 años qu’ufierta un espaciu d’alcuentru al traviés d’actividaes d’intercambiu y de talleres en materia de salú, cultura y nueves tecnoloxíes. Tratase d’una esperiencia que fomenta la participación social d’esta coleutividá ampliando y consolidando les sos relaciones sociales al traviés del aprendizaxe, la meyora de la salú y l’esfrute del tiempu llibre. El programa encadármase alrodiu d’una serie de talleres y d’actividaes complementaries, ente les que s’atopen estos intercambios.

El programa d’esti martes 12 tien a les muyeres de Samartín del Rei Aurelio como protagonistes en Cangues d’Onís: van faer un percorríu per Cangues dende les 10 de la mañana, pa siguir con una visita a la Casa Riera, la Ponte Romana y la Capiya de Santa Cruz.

Mañana, miércoles, muyeres de Llanes participantes nel programa Tiempu Propiu van viaxar a Grau y Pola de Siero: a les 10 van ser recibíes na Casa de Cultura de Grau para, de siguío, visitar la Casa de Cultura y la Capiya de los Dolores. Darréu, van mover a Pola de Siero pa conocer l’Auditoriu y percorrer la localidá.

Los españoles trabayen al paecer más hores que el alemanes y que los daneses, que son los que menos tiempu dediquen al emplegu remuneráu, sigún un informe de la OCDE que fina colos tópicos sobre los ciudadanos con más preste pol trabayu. La organización, qu’axunta los 30 países más ricos del mundu, ordenó a los países en función de les hores de trabayu emplegaes, tantu n’estudios y ocupaciones retribuyíes como en llabores del llar. Y España nun sale mal parada, con 276 minutos al día dedicaos al trabayu (4,6 hores, una media que sal d’estremar la xornada llaboral ente la población con edá de trabayar, ente 15 y 64 años). Xunida a la de llimpieza o cocina, la xornada raspia en total los ocho hores.

El alemán, sicasí, dedica de media 3,75 hores al trabayu pagu que, cuntando los llabores del llar, alzase a 7,35 hores. Otros países con fama de llaboriegos, como Holanda, Bélxica y, d’últimes, Dinamarca, queden per debaxo de la marca alemana.

El motivu pol que les cifres resulten tan baxes mora na base de cálculu que toma la OCDE. L’estudiu estrema’l tiempu de trabayu selmanal ente los siete díes de selmana, colo que la media resulta pocu representativa d’una xornada de trabayu real. Amás, les hores ocupaes partense ente tola población arrexuntada nesa franxa d’edá (15-64), trabayen o non.

La Conseyera de Bienestar Social y Vivienda, Noemí Martín, fixo públicos güei los datos de persones que n’Asturies tán recibiendo atención social, al traviés de servicios profesionales o de cuidos familiares, y que sumen yá 26.780 persones, el 2% del total de la población.

D’estes persones, 15.028 tán siendo atendíes al traviés de la Llei de promoción d’autonomía personal y Atención a la Dependencia qu’entamó la so implantación nel añu 2007, tando previsto que se complete nel añu 2014.

N’Asturies hai más de 11.600 persones que tán recibiendo atención al traviés de la rede pública y que nun son inda beneficiarios de la Llei de Dependencia, bien porque nun la solicitaron, porque tea la so reconocencia en trámite o porque’l so grau y nivel de dependencia entá nun tien valir.

Anguaño, 19.105 persones tán recibiendo atención profesional al traviés de los servicios de xestión pública o privaos que yá tán acreditaos n’Asturies y otres 7.675 persones tán recibiendo atención familiar al traviés de la Llei de Promoción de l’Autonomía Personal y Atención a la Dependencia.

L’Academia de la Llingua Asturiana dio anuncia yá de los sos cursos de branu, inxertos dende l’añu pasáu na Universidá Asturiana de Branu (UABRA). Esti añu van cuntar con dellos cursos más que van otorgar creitos oficiales de llibre configuración, darréu del pautu firmáu cola Universidá d’Uviéu, pol qu’hasta agora cuntaba con trés programes formativos dientro del programa de los Cursos d’Estensión Universitaria. A la ufierta de davezu súmense seis nuevos, dedicaos a internet, los xuegos tradicionales, economía y sociedá, didáctica y toponimia.

Los alumnos que participen nellos podrán algamar ente 6 y 4’5 creitos de llibre configuración. Los Cursos que, nun principiu, propunxo l’Academia sedrán impartíos por profesores de la Universidá d’Uviéu.

Como cada añu, repítense el Cursu Elemental de Llingua Asturiana (dirixíu por Miguel Ramos Corrada), de 40 hores llectives y dirixíu a estudiantes que quieran averase a la conocencia práutica de la Llingua Asturiana. Esti cursu completaráse con 20 hores de clases práutiques; el Cursu Avanzáu de Llingua Asturianu (Dirixíu por Ana Cano), de 40 hores llectives y dirixíu a estudiantes que tengan la certificación de Conocencia Básica de la Llingua Asturiana per cualquiera de les víes previstes na convocatoria. Esti cursu completaráse con 20 hores de clases práutiques, y el Cursu de Capacitación pa la Traducción al Asturianu (Dirixíu por Cristina Valdés Rodríguez), de 30 hores llectives y dirixíu a estudiantes que tengan una conocencia avanzada de la llingua asturiana, cuntando con 15 hores práutiques.

Los cursos que dende agora van cuntar con creitos oficiales universitarios son: Xuegos y Tradiciones Populares Asturianes, dirixíu por Roberto González-Quevedo y cola participación de Lluis Miguel Álvarez González y Xandru Armesto; Coses nueves n’Internet. Aplicaciones personales y educatives, que va cuntar cola coordinación de Xicu Xabiel García Pañeda y profesores como David Guardado, Xulio Berros, David Melendi y Naciu Varillas; Historia d’Asturies: Nueves perspeutives, dirixíu por Isabel Torrente y cola participación de Margarita Fernández Mier y Francisco Javier Fdez. Conde; Asturies nel sieglu XXI: Crisis, economía y sociedá, dirixíu dirixíu por José Alba Alonso, con profesores como Antón Fuertes, José Luis Prieto, Antón Fernández y Antón González; Cómo trabayar la espresión escrita n’asturianu na Educación Secundaria y Bachilleratu, coordináu por Xosé Antón González Riaño, y cola colaboración de Marta Mori d’Arriba, Berta Piñán y Berto Cobreros; Cursu d’aniciu a la investigación toponímica, dirixíu por Xosé Lluis García Arias y cola participación d’Héctor García Gil ya Iván Huerga.

Toos estos cursos son de 30 hores llectives y con 15 hores práutiques, dirixíos a tou tipu de persones, sacante’l d’investigación toponímica, empobináu a persones con nivel altu d’asturianu.

Formación pa maestros del Eo-Navia

Amás, l’ALLA ufre otros cursos pa maestros de gallego-asturianu: El Navia-Eo: espaciu, cultura y futuru, nel que se fai posible l’afondamientu na conocencia social, cultural y artística del Navia-Eo per parte del profesoráu de Gallego-Asturianu d’Educación Primaria y Secundaria, coordináu por Ágata García Castro, y participando tamién como profesores Benxamín Méndez García, Xosé Antón Fernández «Ambás» y Ricardo Saavedra Fernández-Combarro; y una nueva Primeira Fase del Curso de Gallego-Asturiano pa Maestros.

Información de los cursos na páxina de la Universidá d’Uviéu

El vienres 22 d’abril de 12 del meudía a 10 de la nuech va celebrase “la folixa más sidrera de toles qu’esisten”, un esforzáu percorríu de chigre a chigre y de llagar en llagar, con sidra a esgaya, pinchinos, dos espiches, música asturiana a cargu del gaiteru oficial Pelayu Cuaya, y de toos aquellos que s’animen a llevar gaita, curdión, panderu, o con ganes de cantar.

Esti añu ta previsto nun entamu tornar a facer la ruta del Barriu la Sidra (Xixón) y del Camín Rial de la Sidra (Cualloto), con parada pel llagar y espicha en Noreña (Sidrería Villa Condal), pa finar con otra espichona na Primer Sidre l’Añu, onde tendrá llugar un recibimientu trunfal a estos campeones de la sidra y la folixa.

El preciu ye de 40 €, 35 € pa soscritores de la revista La Sidra, apuntándose nel corréu info@lasidra.as pa facer la reserva.

IX-Los Verdes presenta los candidatos a la Xunta del Oriente y los de les alcaldíes de Parres, Villaviciosa y Ribesella.

El conceyal d’Urbanismu de Parres, Antonio de Pedro, llidera la llista d’IX de la circunscripción Oriental a la Xunta Xeneral del Principáu, siguíu por Pedro Zamora, de Los Verdes, qu’amás d’ocupar esti puestu tamién va ser el candidatu de la coalición IX-Los Verdes a l’alcaldía de Villaviciosa. Ramón Villar, teniente d’alcalde de Parres anguaño, va repitir como candidatu a l’alcaldía dempués de cuatro año nos llabores de Gobiernu, acompañáu porJorge Villar, De Pedro y Carmen Díaz. Este ye’l resume del actu nel que participó ayeri Jesús Iglesias, candidatu d’IX a la presidencia d’Asturies, de la que l’asamblea de Ribesella escoyía de nuevu a Francisco Vázquez como candidatu a l’alcaldía na villa riosellana.