Sociedá

La lluvia paró esti vienres pa permitir que la Manifestación pola Oficialidá percorriera la cai Uría d’Uviéu ensin problemes. Miles de persones salieron un poco más tarde de los programao tres de delles pancartes d’organizaciones como la Xunta pola Defensa de la Llingua Asturiana, qu’organizaba la yá tradicional manifestación, Unión URAS-PAS, Izquierda Xunida-Los Verdes d’Asturies, Bloque por Asturies-UNA, Conceyu Abiertu, CSI Mocedá, SUATEA, CCOO Enseñanza, Trafego, Xunta Moza, Darréu, Mocedá Bloque-UNA y PCPE-CMC.

Amás, otres organizaciones tuvieron presentes ensin pancarta, incluyíos miembros de Foru Asturies, el partíu d’Álvarez Cascos, como ye’l casu d’Inaciu Iglesias o Xicu Yepes, o de Frente de la Izquierda.

En terminando l’actu, diose llectura al discursu de la manifestación, onde la Xunta pola Defensa de la Llingua Asturiana fizo un repás a la situación del asturianu nos años últimos, coincidiendo cola fin de la llexislatura presente y les elecciones del próximu 22 de mayu.

La representante de la XPDLA que lleó’l discursu punxo en dulda qu’un país ensin oficialidá pue dicise “democráticu” y recordó’l llargu camín del movimientu de reivindicación “son munches les ediciones del Día de les Lletres y munchos los quilómetros que tenemos percorrío peles cais en reivindicación de los xusto y lo llegal”.

Pa la XPDLA, el Gobiernu d’Asturies “fizo nestos años una política que más qu’activar propúnxose desactivar y desanimar, porque nun se fizo nada del llabor esperáu”. Amás, destacaron especialmente la escasa presencia del asturianu “nel sistema educativu, l’alministración y los medios de comunicación públicos”

La Xunta denunció amás que “nada se sabe del prometíu plan de normalización social del asturianu” y otres cuestiones ya incumplimientos alredor de la toponimia, l’estatus llegal de la llingua y el cumplimientu de la Llei d’Usu.

El comunicáu terminó faciendo un llamáu a los falantes d’asturianu “podemos facer muncho na nuesa vida diaria. Usándola colos fíos, mercando llibros y discos n’asturianu. Creyendo nello de verdá, vitalmente”.

Galería de semeyes de la manifestación

Un añu más la cai Uría d’Uviéu conviértese nel centru de la reivindicación llingüística asturiana. A les 19:30 hores los participantes na manifestación pola oficialidá del asturianu van salir de estación de tren d’Uviéu, percorriendo la cai Uría hasta les puertes del Teatru Campoamor. Yá dientro del teatru uvieín, l’Academia de la Llingua Asturiana organiza la so tradicional Xunta Estraordinaria, col nomamientu del filólogu lleonés José Ramón Morala como Miembru d’Honor de l’ALLA y la reconocencia a la figura del ex ciclista Chechu Rubiera “pol so llabor d’encontu a la llingua y cultura del País”, amás d’actuaciones musicales.

“Da-y al play” ye’l lema pa la manifestación nesta ocasión. yá que dende la XPDLA ven nésti, el momentu “de movilizase pa poder exercer los nuestros derechos y posibilitar la salvación del asturianu”.

La celebración del XXXII Día de les Lletres Asturianes va entamar a les 20,30 hores presentáu pola llocutora de la RPA, Sonia Avellaneda y el director d’ASTURNEWS, Próspero Morán, cuntando con un entamu musical a cargu del gaiteru Oscar Fernández González y del cantante José Manuel Collado y teniendo como pieslle l’actuación del grupu musical Xera.

Esta Xunta Estraordinaria de l’Academia de la Llingua Asturiana finará col discursu institucional de la presidenta, Ana María Cano González.

Los 5 pases del anunciu Da-y al play! que van poer vese na Televisión Pública d’Asturies, entamen a ufrise esti miércoles y van desenvolvese hasta’l vienres día 6. Les emisiones fadránse: el Miércoles 4 de mayu: 13:55h y sobre les 19:00h, el Xueves 5 de mayu: 13:55h y sobre les 19:00h; y el Vienres 6 de mayu: 13:55h.

La Xunta pola Defensa de la Llingua Asturiana ye la promotora d’esti vidiu promocional de la Manifestación pola Oficialidá del Día de les Lletres Asturianes 2011, nel qu’apaecen l’actriz María Cotiello y los presentadores y músicos, Xosé Ambás y Esther Fonseca.

Vuelven otra vegada más les Xornaes de Llingua y Cultura Asturiana na so décimosesta edición, proyectu de la fastera oeste de Xixón, frutu del trabayu en comuña ente la Fundación Municipal de Cultura, Educación y Universidá Popular, la Oficina Municipal de la Llingua y diez colexos públicos del distritu xixonés, cola collaboración del Centru de Profesores y Recursos de Xixón y de Caxastur. Per primer vegada les actividaes ábrense al públicu, con cine n’asturianu, monologuismu, teatru y música.

El martes, 3 de mayu, ente les 18 y les 19:30 hores, van proyectase dos películes n’asturianu “Los viaxes de Gulliver”, a les seis y “El tercer home” a les 19:30 hores. Les películes son dos de los primeros proyectos de doblaxe al asturianu de llargometraxes.

El xueves 5 de mayu, a les siete y media la tarde les actividaes siguen con “La Llei del cuchu”, espectáculu escénicu de Carlos Alba “Cellero”.

Yá la selmana que vien, el martes 10 de mayu, a les seis de la tarde, el grupu Asturmitomanía llega al Atenéu La Calzada con “Vamos a contar un cuentu”, una prestosa, tienra y orixinal historia, na que toos deprienden que, pa vivir en paz, ye obligao respetar yaceutar a los demás tal como son, por bien distintos que seyan.

El xueves 12, a les siete y media la tarde, el grupu folk Gueta na fonte toca dientro de les Xornaes, zarrándoles el martes 17, un Festival de monólogos n’asturianu organizáu pola Asociación d’Intérpretes de la Canción Asturiana (AICA) cola participación de Ludivino Díaz “Pin de la Cotolla”, Marcelino Díaz Losada, Luz Mari del Sol, Armando Felgueroso “Min de les Pieces” y la presentación de Fernando Ruiz.

Amás, del 3 al 17 de mayu, na Biblioteca Municipal d’El Natahoyo ta celebrándose la esposición L’enigma del Palaciu Bao.

Programa completu d’actividaes de les Xornaes

La Xunta pola Defensa de la Llingua Asturiana acaba espublizar un vidiu promocional de la Manifestación pola Oficialidá del Día de les Lletres Asturianes 2011, que comenten “tien que ser una xornada de fiesta pa la lliteratura asturiana pero tamién ye un momentu pa facer balance de la situación del idioma y pa reivindicar un estatus d’igualdá pa tola ciudadanía que quier usar l’asturianu como la so llingua de cada día”. Nel vidiu apaecen l’actriz María Cotiello y los presentadores y músicos, Xosé Ambás y Esther Fonseca. “Da-y al play” ye’l lema nesta ocasión yá que dende la XPDLA ven nésti, el momentu “de movilizase pa poder exercer los nuestros derechos y posibilitar la salvación del asturianu”. La manifestación va celebrase’l vienres 6 de mayu, a les siete y media la tarde, n’Uviéu.

Balance d’un añu más ensin oficialidá.

A naide-y pue cayer embaxo la situación tan preocupante que sufre la llingua asturiana pola perda cada vez más grande de falantes. La presencia testimonial del asturianu nos medios de comunicación públicos y el so usu tan escasu pola Alministración asturiana nun ayuden precisamente a que la nuestra llingua gane prestixu y reconocimientu ente la xente. La precariedá de l’asignatura nes primeres etapes educatives y en Secundaria dan una idea de la poca importancia que merez pa l’Alministración educativa.

Namás se pue cortar el retrocesu d’un idioma minorizáu como’l nuestru con una política de normalización decidida qu’abra espacios d’usu al asturianu, que lo faiga dalgo normal na vida diaria n’ámbitos como la educación, los medios de comunicación o l’Alministración y que nun seya ensin más un adornu anecdóticu o folclóricu. La política llingüística del Gobiernu asturianu, por desgracia, va nesta llinia: usos testimoniales per un llau y, cuando se trata d’iniciatives fundamentales como’l trabayu de les Oficines de Normalización nos Conceyos, precariedá na dotación y falta de control. Otro tanto se pue dicir de la recuperación toponímica, que se fai namás sobre’l papel, porque la propia Alministración qu’aprueba esos topónimos nun los usa.

Por eso, esti vienres 6 de mayu, vamos volver a venos a les 19:30 hores na Estación del Norte d’Uviéu pa percorrer les cais hasta’l Teatru Campoamor. Vamos ponenos en marcha y demostra-yos que ye’l momentu, que nesta llexislatura tien que salir p’alantre la oficialidá y que nun van ser quién a paranos.

Vidiu

Ciento cincuenta trabayadores de RTVE danse cita esti domingu en Xixón nun alcuentru deportivo y social que cada añu faen nun llugar distintu de la xeografía española.

Ente les actividaes propuestes va haber fútbol, tenis, pádel, golf y campeonatu de bolos La 18 edición de los Xuegos Nacionales RTVE llega anguaño a Asturies.

Xixón va ser see, esta fin de selmana, de la décimu octava edición de los Xuegos Nacionales RTVE, qu’anguaño entama’l grupu d’empresa de RNE Madrid. Esti eventu surdió como un alcuentru de el trabayadores de RTVE en toles comunidaes autónomes. Cada añu celebrar nun llugar distintu d’España y nesta edición van participar 150 persones n’Asturies.

Los trabayadores entamen diverses actividaes deportives, que se van desenvolver en distintes cortiles y zones de Xixón. Los alcuentros de fútbol van xugase nos campos de Mareo. Les competiciones de tenis y pádel van tener llugar nel pabellón municipal de deportes de La Calzada. Pela so parte, el campeonatu de golf, nel campu municipal de La Llorea; y el Parque de Moreda va acoyer los xuegos de petanca, mientres que los de bowling van facese nes instalaciones de Parque Principáu, en Siero. Tamién s’entamen concursos de dardos y mus, que se van celebrar nel Hotel Begoña.

La entrega de premios va tener llugar el domingu 1 de mayu, a partir de les 21 hores, nel Llagar de Castiellu.

Esti vienres 29 d’abril n’Uviéu, l’Observatoriu de la Inmigración n’Asturies (Odina) va celebrar el so décimu aniversariu con unes xornaes qu’axuntarán a especialistes de toa España.Nel añu 2000, xurde l’Observatoriu de la Inmigración n’Asturies (Odina) como una esperiencia pilotu promovida por Accem y financiada pola Conseyería de Bienestar Social y Vivienda del Principáu d’Asturies. Odina créase col envís d’estructurar y desendolcar un dispositivu permanente d’observación cooperativa sobro la situación socio-económica del coleutivu de les persones inmigrantes que s’asitien na nuesa comunidá. Nel añu 2001 espublízase’l primer Diagnósticu de la Inmigración n’Asturies, suponiendo esti momentu l’afitamientu de la estructura partenarial del observatoriu. A lo llargo d’estos años d’andadura ficiéronse numberosos diagnósticos (llocales y autonómicos), seminarios, publicaciones y lleváronse a cabu distintos aiciones coles persones inmigrantes dende los Talleres Odina (educación, empléu y escontra la esclusión). Ye por ello, que por cuenta de la conmemoración del so X Aniversariu, el próximu 29 d’abril de 2011 va celebrase una xornada conmemorativa de los 10 años d’observación participativa y collaborativa sobro’l fenómenu de la inmigración n’Asturies. Los detalles d’esti actu espónense darréu: ACTU: X ANIVERSARIU ODINA. PARTICIPACIÓN, INTERCULTURALIDÁ Y NON DISCRIMINACIÓN. DÍA Y HORA: Vienres 29 d’abril de 2011 de 09:00 a les 14:00h LLUGAR: Salón d’Actos del Edificiu Alministrativu de Servicios Múltiples (EASMU) C/Coronel Aranda, nº2 Uviéu PROGRAMA DEL ACTU: PRESENTACIÓN INSTITUCIONAL (9:30 a 10:30h) · Dª. Noemí Martín González. Conseyera de Bienestar Social y Vivienda del Gobiernu del Principáu d’Asturies. · Dª. Julia Fernández Quintanilla. Directora Xeneral Accem. · Dª Esperanza Fernández Puerta. Conceyala de Servicios Sociales del Conceyu de Xixón. · Dª. Yolanda Alonso Fernández. Conceyala de Bienestar Social del Conceyu d’Avilés. · Dª Silvia Junco Martínez. Conceyala Delegada d’Inmigración del Conceyu d’Uviéu. · D. Fco. Javier Mahía Cordero. Coordinador Odina. Odina. Observatoriu de la Inmigración n’Asturies CONFERENCIA MARCU (10:30 a 12:00h) “Participación, interculturalidá y non discriminación: perspeutives y retos de futuru”. D. Xavier Besalú. Profesor de Pedagoxía de la Universitat de Girona y Vicepresidente de l’Asociación GRAMC, (Grupu d’Investigación y Actuación con Minoríes Culturales y Trabayadores Estranxeros). Xavier Besalú ye profesor de Pedagoxía na Universidá de Girona. Dende 1991 trabayó, dende la universidá y dende los movimientos sociales, al rodiu de les migraciones estranxeres, la interculturalidá, la esclusión y el racismu. Nestos momentos ye vicepresidente de l’asociación GRAMC (Grupos d’Investigación y Actuación con Minoríes Culturales y Trabayadores Estranxeros), una pequena ONG que trabaya nesti ámbitu. Collabora cola Cátedra Unesco d’Inmigración, Derechos y Ciudadanía de la Universidá de Girona y forma parte del Comité entamador del Simposiu sobro Llingua, Educación ya Inmigración qu’afalen los ICE de les Universidaes de Barcelona y de Girona. Cunta con bayura d’investigaciones y publicaciones sobro estos temes. MESA D’ESPERIENCIES (12:30 a13:45h) · Dª. Ana Turiel Pintado. Serviciu de Participación y Orientación Educativa de la Conseyería d’Educación y Ciencia del Principáu d’Asturies. “Programes d’Acoyida nos centros educativos d’Asturies” · D. Antonio Blanco Prieto. Direutor de la Fundación Alimerka. “La Responsabilidá Social Corporativa de les Empreses” · Dª. Dolores Díaz Paz. Promotora de la Rede Asturiana de Bancos del Tiempu. “Los Bancos del Tiempu Escolares. Puntos d’Alcuentru Educativu”

L’Academia de la Llingua Asturiana (ALLA) acaba de dar anuncia de los actos preparaos pal XXXII Día de les Lletres Asturianes, que va celebrase nel Teatru Campoamor d’Uviéu, el vienres 6 de mayu, de magar les ocho y media la tarde. Ente les actividaes previstes na Xunta Estraordinaria de l’ALLA, el nomamientu del filólogu José Ramón Morala Rodríguez como Académicu d’Honor, amás del homenaxe al ciclista, recién retiráu, Chechu García, qu’amosó’l so compromisu pa cola llingua asturiana a lo llargo de tola so carrera, participando en campañes a favor de la oficialidá.

L’actu del Día de les Lletres va entamar cola tonada de José Manuel Collado, acompañáu a la gaita por Oscar Fernández González. Darréu va nomase al nuevu académicu y va poder sentise’l discursu de la presidenta Ana Cano. Darréu va facese la reconocencia a Chechu Rubiera, rematando l’actu una esbilla de poemes de Lletres Lliterariu y l’actuación del grupu Xera.

Darréu l’actu fadráse una espicha nel Llagar Herminio de Cualloto a la que s’ha de confirmar l’asistencia enantes del 4 de mayu nel teléfonu 985211837.

Nuevu Académicu d’Honor: José Ramón Morala Rodríguez

Doctor en Filoloxía Española pola Universidá d’Uviéu, ye Caderalgu de Llingua Española nel Departamentu de Filoloxía Hispánica de la Universidá de Lleón dende l’añu 2000. Trabayó en diversos aspeutos de la llingua española anque siempres rellacionaos colos campos diacrónicu y diatópico: la toponimia como fonte pa la dialectoloxía diacrónica, la llingua de la documentación medieval de la dómina d’oríxenes – con especial atención a la grafemática- y de la dómina alfonsí o la variación xeográfica nel léxicu de la vida cotidiana a partir de les relaciones de bienes de los sieglos XVI-XVII, tantu peninsulares como americanos. Frutu d’estes llínies de trabayu publicó o participó na publicación de siete llibros, amás de más de mediu centenar d’artículos en revistes y monografíes, como los artículos “Sobre los toponimos de tipo ‘Gordón'”, “Toponimia y diacronía. Los sufijos diminutivos en León” y “El proceso de castellanización al sur de la Cordillera Cantábrica en el siglo XVII”, espublizaos en Lletres Asturianes.

En 2006 organizó’l Congresu Menéndez Pidal y el Dialecto Leonés, onde se fizo alcordanza del entamu de los estudios filolóxicos de la llingua asturiana.

Biblioteca d’artículos del nuevu académicu

Esti mediudía conocíase’l programa d’actos de la 32 Selmana de les Lletres Asturianes, n’homenaxe al escritor Manuel d’Andrés Fernández, Mánfer de la Llera (1918-2005), que va tener la so Gala inaugural el día 3 de mayu nel Nuevu Teatru de La Felguera (Llangréu).

El programa completu d’actividaes pue descargase dende esta mesma páxina ya entama tres d’esa Gala inaugural a les 13:00 hores del miércoles 4 na Xunta Xeneral del Principáu d’Asturies (Uviéu) cola Llectura pública institucional de testos n’asturianu nel Salón Europa y a les 20:00 hores otra vuelta nel Nuevu Teatru de La Felguera (Llangréu) col Conciertu 13 x Mánfer, que va cuntar coles actuaciones d’Alfredo González, Felpeyu, Hermanos Valle Roso, Mario Fueyo (Dark la eMe), Renacencia, Toli Morilla, Xera, Silvino Torre y alumnáu y docentes del IES Cuenca del Nalón.

El xueves día 5 a les 13 hores na Casa de los Alberti (Ciañu, Llangréu)presentarase la edición conmemorativa “Mánfer de la Llera, de la rampla a la pluma”, volume ilustráu al rodiu del escritor y la so época y el llibru “En cata de la mio lluna” Antoloxía lliteraria, de Mánfer de la Llera. Esie mesmu día a les 20hores na Casa la Cultura de Sama (Llangréu)habrá Asturianada y monologuismu: conciertu n’alcordanza de Mánfer de la Llera; con José Manuel Reguero (El Maestru), Valentín Fuente, Juan Pablo Santos, Manolo Collado, Bibiana Sánchez y Carlos Ronderos. Y a les 20 hores na Capiella de los Dolores (Grau) fadráse un recital poéticu n’homenaxe a Mánfer de la Llera. Cola participación de los poetes Xuan Xosé Sánchez Vicente, Xuan Bello y Ana Vanessa Gutiérrez, en collaboración cola Fundación Aula de les Metáfores.

Pa finar el vienres 6 de Mayu, a les 11 hores nel Barriu de La Llera, en Sama (Llangréu) fadráse’l Descubrimientu d’una placa dedicada al escritor, na cai Mánfer de la Llera y a les 12:00 hores nel IES Cuenca del Nalón (La Felguera, Llangréu) habrá’l tradicional actu escolar de celebración de la Selmana de les Lletres Asturianes cola entrega de premios del «XVI Concursu de Poesía y Dibuxu» y del «VIII Concursu de Cartelismu», amás de l’actuación del grupu Duerna.

La Xunta pola Defensa de la Llingua Asturiana acaba de facer públicu’l lema y cartelu de la Manifestación pola Oficialidá del Día de les Lletres Asturianes 2011, que comenten “tien que ser una xornada de fiesta pa la lliteratura asturiana pero tamién ye un momentu pa facer balance de la situación del idioma y pa reivindicar un estatus d’igualdá pa tola ciudadanía que quier usar l’asturianu como la so llingua de cada día”. Amás, recuerden qu’esti añu “tamos a pocos díes d’unes elecciones onde vamos poder escoyer diputaos y diputaes pa la Xunta Xeneral: eses persones van tener la responsabilidá hestórica d’aprobar un estatutu d’autonomía p’Asturies que recueya la oficialidá de la llingua asturiana”. Por ello, albidren que ye’l momentu de “da-y al play”, de movilizase pa poder exercer los nuestros derechos y posibilitar la salvación del asturianu. La manifestación va celebrase’l vienres 6 de mayu, a les siete y media la tarde, n’Uviéu.

Balance d’un añu más ensin oficialidá.

A naide-y pue cayer embaxo la situación tan preocupante que sufre la llingua asturiana pola perda cada vez más grande de falantes. La presencia testimonial del asturianu nos medios de comunicación públicos y el so usu tan escasu pola Alministración asturiana nun ayuden precisamente a que la nuestra llingua gane prestixu y reconocimientu ente la xente. La precariedá de l’asignatura nes primeres etapes educatives y en Secundaria dan una idea de la poca importancia que merez pa l’Alministración educativa.

Namás se pue cortar el retrocesu d’un idioma minorizáu como’l nuestru con una política de normalización decidida qu’abra espacios d’usu al asturianu, que lo faiga dalgo normal na vida diaria n’ámbitos como la educación, los medios de comunicación o l’Alministración y que nun seya ensin más un adornu anecdóticu o folclóricu. La política llingüística del Gobiernu asturianu, por desgracia, va nesta llinia: usos testimoniales per un llau y, cuando se trata d’iniciatives fundamentales como’l trabayu de les Oficines de Normalización nos Conceyos, precariedá na dotación y falta de control. Otro tanto se pue dicir de la recuperación toponímica, que se fai namás sobre’l papel, porque la propia Alministración qu’aprueba esos topónimos nun los usa.

Por eso, esti vienres 6 de mayu, vamos volver a venos a les 19:30 hores na Estación del Norte d’Uviéu pa percorrer les cais hasta’l Teatru Campoamor. Vamos ponenos en marcha y demostra-yos que ye’l momentu, que nesta llexislatura tien que salir p’alantre la oficialidá y que nun van ser quién a paranos.