Sociedá

El Vicerrectoráu d’Estensión Universitaria, Cultura y Deportes organiza esti miércoles 19 d’ochobre, a les 19:30 hores nel Paraninfu de la Universidá d’Uviéu l’alcuentru científicu “L’universu nuna cáscara de nuez. Los grandes retos de la ciencia del futuru”, con Sir Paul Nurse, Presidente de la Royal Society y Premiu Nobel de Medicina 2001 y Rafael Rodrigo, Presidente del Conseyu Cimeru d’Investigaciones Científiques. Va actuar de moderador César Nombela, caderalgu de Microbioloxía de la Universidá Complutense de Madrid. Esta conferencia enmárcase dientro de la Selmana de los Premios Príncipe d’Asturies 2011.

Elebide, el Serviciu pa la Garantía de los Derechos Llingüísticos, recibió l’añu pasáu un total de 261 quexes, lo que supon un 23% más qu’en 2009, de les que 254 correspuenden al euskera y les siete restantes al castellán. La viceconseyera de Política Llingüística, Lurdes Auzmendi, detalló ayeri estes cifres que, al so xuiciu, demuestren, que “gracies a Elebide y a otros organismos, los vascos conocen meyor cuálos son los sos derechos llingüísticos”. En concretu, el serviciu recibió en 2009 un total de 212 quexes (trés correspondientes al castellán y el restu, al euskera), cifres que se elevaron l’añu pasáu.

El director de Normalización Llingüística de les Adminisaciones Públiques, Patxi Martinez de Marigorta, destacó que l’oxetivu principal de Elebide ye llograr un equilibriu ente los dos llingües cooficiales. Por ello, presentó una campaña col lema Elebide protexe los tos derechos, qu’empieza güei y va estendese hasta’l próximu llunes en marquesina. La campaña n’Internet, redes sociales y radio enllargará unos díes más.

El Conceyu Universitariu pol Asturianu (CUPA) y l’Academia de la Llingua Asturiana (ALLA) van inaugurara la segunda edición de los Cursos Básicos d’Asturianu del CUPA esti llunes 17 d’ochobre a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llanez 68, baxu), cola participación de los alumnos, el profesor del cursu y un representante de l’Academia, Pablo Xuan Manzano, amás d’otru de Caxa Rural, que patrocina los cursos, y que van dar entamu a los dos cursos organizaos por dambes organizaciones.

El CUPA valora mui positivamente esta esperiencia formativa qu’entama per segunda ocasión en collaboración cola Academia de la Llingua Asturiana y la financiación de Caxa Rural y que tuvo una perbona acoyida, con cuasi 20 inscritos, ente universitarios y ciudadanos de dellos conceyos d’Asturies.

Amás sigue abiertu’l plazu p’apuntase al cursu d’asturianu básicu Nivel II qu’organicen dambos organismos tamién en Xixón, y que va entamar nel mes de payares.

El Centru Social La Semiente, sigue cola programación d’ochobre proponiéndonos esta vegada una charra qu’axunta lliteratura y feminismu. El xueves 13 a les 20 hores va tener llugar la charra “Feminismu pa poligoneres”, na que se presentara’l llibru de Rosario Hernández Catalán, “Feminismo para no feministas, la Vane contra la Partrix”, l’ultimu trabayu d’esta dramaturga y ensayista llangreana.

Un manual d’urxencia pa toes eses moces qu’en plenu sieglu XXI siguen perdíes victimes d’un submundu cad vez más esteriotipáu. El llibru contién nes sos coraes una obra teatral, que col títulu de “La poligonera feminista” ye’l platu fuerte de la obra. L’autora va repartir gratuitamente exemplares a tolos asistentes a la charra, que va tener llugar nel mesmu Centru Social La Semiente nel 6 de la cai Eladio Jove de L’Entregu.

Dende’l grupu de Xéneru de la Coordinadora de ONGD d’Asturies, entamen les s Xornaes sobre muyeres y economía, problemática del cudiáu, recursos y participación política, con delles convidaes. Van ser los díes 13, 14 y 15 d’ochobre na Biblioteca Pública Xovellanos de Xixón, y nel Vieyu Institutu Xovellanos, na mesma villa.

Nos actos van estudiase y discutise los diversos aspeutos clave pa subvertir la desigual estructura de poder qu’esclúi a les muyeres, tantu nel Norte como nel Sur. El Grupu de Xéneru de la Coordinadora de ONGD d’Asturies decidió promover estes xornaes como espaciu nel que se dean a conocer distintes reflexones y práctiques feministes alredor de los enfoques y estratexes de desenvolvimientu y fortlecer aliances con organizaciones de muyeres y feministes, del Sur, centraes fundamentalmente n’América Llatina, y organizaciones del Norte.

La organización quier “tescender l’academicismu habitual d’estes temes y construyir ente toes y toos una teoría crítica, orientadora y propositiva dende la praxis, y tamién dende la teoría, organizativa y activista”.

Nestes xornaes enceta la cuestión de los derechos económicos de les muyeres, non entendíos namás como la igualdá d’oportunidaes ente homes y muyeres nel accesu al mercáu llaboral y los drechos sociales que d’ello se deriven, sinón, espliquen “dende una perspectiva más global y tresformadora del sistema, perspectiva que ta nel senu de los alderiques feministes”.

Programa completu
Programa completu d’actividaes de les Xornaes

Tal como taba anunciao l’Asociación Cultural N’Ast celebró una rueda de prensa esti llunes 10 d’ochobre nel Atenéu Obreru de Xixón pa esplicar el so posicionamientu al rodiu del discutiniu del Centru Niemeyer y l’estáu actual de les polítiques culturales n’Asturies, que recuerden, dende’l colectivu “ye consecuencia de la xestión desendolcada nos caberos años pol PSOE”. Na mesa onde se presentó’l comunicáu tuvieron Lluis Antón González, actor y escritor; Javier Cubero, responsable d’organización de N’Ast y ensayista; ya Inaciu Berdiales, asociáu de N’Ast.

Comunicáu

Dende l’Asociación Cultural N’Ast por cuenta de la polémica que se vien desendolcando nes últimes selmanes na sociedá asturiana en rellación al Centru Cultural Internacional Oscar Niemeyer de la ciudá d’Avilés, y que ta venceyada sustancialmente a la diversidá esistente de paradigmes de programación y xestión cultural, queremos manifestar la viniente:

1) La sociedá asturiana tien que dexar de ser considerada como una entidá simplemente receptora de cultura producida fora de les nueses fronteres. Si realmente se quier apostar por una Asturies viva y dinámica, hai qu’ellaborar y desendolcar una política cultural en clave de País, ye dicir, una política autocentrada na realidá específica de la producción cultural autóctona y de la mayoría social d’Asturies, entendiendo la cultura asturiana non como una realidá secundaria sinón como una auténtica plataforma dende la qu’abordar la universalidá. Asina consideramos que solamente plantegando y promocionando el calter de la sociedá asturiana como productora y emisora de cultura, realmente se va consiguir qu’Asturies adquiera una proyección internacional nel ámbitu cultural.

2) Les polítiques culturales nun puen tar diseñaes dende una perspectiva elitista y sucursalista al marxe de la mayoría social d’Asturies, sinón que tienen que tar empobinaes a la re-creación, modernización y homologación internacional de les pautes culturales asturianes, en collaboración colos axentes sociales y culturales del País. Igualmente los productos culturales promocionaos dende les Alministraciones públiques nun puen ser concebíos como productos pa un consumu acutáu a una minoría sinón que tienen de ser promocionaos socialmente y conectar cola realidá popular asina como cola totalidá del territoriu asturianu.

3) Asina dende N’Ast defendemos la continuidá del Centru Niemeyer, y entendemos más que lexitimu que la ciudá d’Avilés disponga d’esi centru pues la planificación pública de la vida cultural asturiana tien que dexar de tar esclusivamente centrada nel circuitu d’Uviéu-Xixón.

4) La defensa de la continuidá d’esi Centru ye pa nós perfectamente compatible cola demanda d’una restructuración radical, pues el Centru Niemeyer ye unu de los meyores exemplos del desastre que supunxeron los Gobiernos d’Areces pa la realidá cultural d’Asturies: un estilu faraónicu desconocedor de cualisquier criteriu d’austeridá, una programación cultural de calter posmodernu que despreciaba la realidá asturiana, y una xestión arbitraria más esmolecida de xenerar redes caciquiles que de realizar un serviciu a la ciudadanía asturiana.

5) Igualmente consideramos necesaria pa la necesaria rexeneración social que precisa Asturies una investigación sobre los aspeutos económicos de la construcción y xestión del Centru Niemeyer hasta’l momentu actual.

L’obispu nuevu de la diócesis de Bragança-Miranda, a la que pertenez Miranda del Douro, utilizó la variedá mirandesa del asturianu pa dirixise a los sos feligrses nuna misa celebrada na comarca. “Deixai que bos fale na buossa lhéngua mirandesa; perdonai-me se nun la sei falar tan bien cumo bós”, fueron les primees pallabres en mirandés emitíes por José Cordeiro, al final de la homilía.

La Diócesis de Braganza-Miranda ñació’l 22 de mayu de 1545 precisamente en Miranda del Douro, fechu que recordó’l nuevu obispu, que tamién afirmó que nun faló mirandés por simpatía, sinón porque ye “la segunda llingua oficial de Portugal”. Dalgunos recordaron la polémica surdida en 1997 cuando la diócesis pasó de llamase Brangança e Mirada a usar namás un guión ente los dos territorios, lo que nun prestó un res a los mirandeses.

Dende l’Asociación de Trabayadores de la Normalización Llingüística vienen d’amosar nun comunicáu esti vienres “la nuestra preocupación cola “tranquilidᔠque ta teniendo’l Gobiernu Asturianu pa resolver les subvenciones d’asociaciones, empreses y particulares pa la normalización social del asturianu. Vemos con munchu esmolecimientu’l fechu de que téamos a día de güei, 6 d’ochobre, (a piques de qu’acabe’l períodu llegal pa resolver los espedientes presentaos) a la espera de la resolución de la Conseyería de Cultura no tocante a les subvenciones pa la normalización social del asturianu y del gallego-asturianu pa empreses, asociaciones y particulares, que se convocaron por resolución d’esa mesma Conseyería’l 14 d’abril del 2011 y publicaes nel BOPA del 29 d’abril del 2011”.

Pa l’asociación “ye chocante que tovía nun se sepia nada al respectu, teniendo como tienen les persones o entidaes beneficiaries d’atropar tola documentación requerida, asina como les muestres escrites o/y fotográfiques que xustifiquen el destín de les perres subvencionaes, si ye que les hubiere, primero del 30 de noviembre, por nun mencionar a les persones y organismos que yá invirtieren eses perres nos proyectos pa los que solicitaren apoyu económicu”.

Dende l’ATNLL “preocúpanos que nun se resuelvan nel plazu llegal porque eso supondría la pérdida de les subvenciones, como yá ta pasando n’otres comunidaes con llingua propia”.

Estes subvenciones apoyen proyectos mui importantes pa la normalización social de les llingües d’Asturies. Empreses y asociaciones desenvuelven actividaes de sensibilización social, usen l’idioma como llingua vehicular de la empresa, etc., cumpliendo de llargo col oxetivu pal que se destinen eses ayudes que nun ye otru que prestixar y normalizar los idiomes d’Asturies.

Por too esto, a l’Asociación de Trabayadores de la Normalización Llingüística “prestaría-y enforma que la Conseyería de Cultura materializara l’apoyu a la normalización del asturianu y del gallego-asturianu anunciada na campaña del so partíu y nes sos intervenciones públiques resolviendo aína les subvenciones destinaes a la normalización ente empreses, asociaciones y particulares, tan necesaria p’acabar cola diglosia que se vive n’Asturies”.

L’Institutu d’Estudios Altoaragoneses organiza estos díes la sesta edición de la so “Vi Trobada d’Estudios e Rechiras arredol d’a Luenga Aragonesa e a suya literatura”, un espaciu pal estudiu filolóxicu y sociollingüísticu de la llingua aragonesa, onde’l profesor de la Universidá d’Uviéu, Ramón d’Andrés, va dar llectura a la conferencia “El asturiano y el aragonés en la taxonomía lingüística peninsular. Ciencia e ideología”.

Les xornaes tienen llugar n’Uesca (Aragón), del 6 al 8 d’ochobre.

Programa completu d’actividaes de la Trobada

Una de les tiendes más conocíes de Barcelona, La Manual Alpargatera, asoleya un folletu sobre la hestoria, usu y conservación d’esti calzáu tradicional en delles llingües, ente les que s’atopa l’asturianu. Amás, na so web puede vese una versión n’asturianu de los testos.

La torna fízola unu de los veceros del negociu y súmase a les más de 50 llingües que cuenten con folletu d’esta tienda catalana.

Web de la tienda n’asturianu