Sociedá

L’asociación cultural asturiana, N’ast, ta acabantes d’asoleyar un comunicáu nel que felicita a Vítor Suárez pol so compromisu cola llingua asturiana, dempués de que consiguere que la compañía ALSA se comprometiere a usar la toponimia tradicional y oficial d’Asturies.

Asina dende N’ast feliciten a Vítor Suárez pol “ésitu na normalización social de la llingua”, y, amás, agradece-y “el so exemplu combativu ente la pasividá de milenta actores sociales yá institucionales”.

La presión d’un militantes llingüísticu, Vítor Suárez, fizo que la empresa de tresportres Grupo ALSA S.L.U. se comprometiere al usu correctu de la toponimia asturiana na so páxina web. La empresa toma esta decisión dempués d’un insistente trabayu de vindicación y esplicación del marcu llegal actual per parte de Suárez qu’esplica que-y pidieron un documentu colos erros atopaos na toponimia remanada pola empresa, pa proceder al cambiu y quéxase de que’l resultáu tenga de venir d’un particular y non de la xera d’una Dirección de Política Llingüística, “inesistente ya ineficaz”.

ALSA ye una de les empreses asturianes más conocíes y cunta con concesiones de llinies a lo llargo de tol país. L’usu de la toponimia asturiana nes sos llinies supondría un importante reblagu pa la difusión y normalización de los topónimos oficializados dende l’entamu del procesu recuperador nel añu 2004, cuntando con 49 conceyos cola toponimia mayor oficializada nestos momentos.

Amás, la reivindicación d’esti ciudadanu inclúi tamién la petición d’usu del asturianu per parte de la empresa asturiana de tresportes, tanto na so páxina web, que sí se puede consultar en gallegu, catalán y vascu, como nes máquines espendedores de billetes y otros elementos d’imaxe corporativa.

Como “enemigu de la cultura asturiana” acaba de calificar l’asociación cultural N’ast, al ex Presidente d’Asturies, Vicente Álvarez-Areces, al qu’estos díes se-y prepara una “espicha-homenaxe”. Dende l’Asociación Cultural N’Ast y por cuenta d’esti actu al políticu socialista, que va celebrase nel Recientu Ferial el próximu 23 de setiembre, afirmen que “el mundu de la cultura asturiana nun tien nada qu’agradecer a esti personaxe yá que, al marxe d’otru tipu de considerancies negatives que podríen realizase en rellación a la globalidad de la so xestión institucional, ye induldable que se caracterizó dende’l primer momentu por persiguir, reprimir y marxinar de manera sistemática cualisquier elementu cultural específicamente asturianu”.

Recuerden qu’Areces marxinó “la mesma bébora nacional, la sidre, marxinada siempres nos actos institucionales en beneficiu del vinu español, o la llingua asturiana, espresión principal de la nuesa tradición cultural, incumpliendo la lexislación esistente sobre la proteición social del idioma”. Pa N’ast, Areces manifestóse en toles sos actuaciones “como un virrei colonial más que como’l presidente d’un país democráticu y arguyusu de si mesmu”.

Pa N’ast, los organizadores d’esti actu “van volver quedar una vegada más retrataos na so identificación coles estructures caciquiles que desaniciaron socialmente la identidá asturiana tou lo que pudieron a lo llargo de los caberos trenta años”.

Como anécdota “significativa”, N’ast destaca que “esti actu preséntase públicamente como una espicha, pero ensin sidra”, lo que califiquen como “cosa absurda enxamás vista pero que resulta bien clarificadora sobre l’universu mental de los organizadores y del homenaxáu, asina como sobre’l so divorciu cola realidá cultural del País”.

Faceria acaba de ñacer nel territoriu lleonés pal “estudiu, divulgación, protección y proyección del patrimoniu cultural, históricu y llingüísticu de Lleón”. L’asociación yá tien abierta la so páxina web y n’ella espliquen el llabor que quieren llevar alantre pa recuperar un heriedu cultural qu’opinen “ta perdiéndose y tien munchos elementos desaniciaos pol gran cambiu social y económicu esperimentáu en Lleón nes décades últimes”.

Los miembors de l’asociación dícense, na cuestión llingüística, “heriedes y continuadores” de Facendera pola Llengua, y van dedicar “una especial atención, ensin desatender otros ámbitos culturales y llingüísticos de Lleón” a la propia llingua.

El términu “Faceira”

Faceira ye un términu con un son típicamente lleonés propiu de les tierres occidentales de Lleón y de Zamora, y que tamién se constata na Tierra de Miranda portuguesa.

Fritz Krüger señaló que faceira “(…) es un término colectivo: <> (Pedralba), <> (Benuza), <> (Trefacio). Considerando [faceira], <>, en este sentido colectivo, se puede ver cierto paralelismo con [facienda] <> y facendera <>; podemos pensar que [faceira] ha adquirido su significado en relación y contraste consciente con facienda, para significar <>”. [La cultura popular en Sanabria, 1991 (1925)]. Amás, nes tierres del norte de Lleón, n’Umaña o Babia, facera ye l’aprovechamientu d’un pastu común ente diferentes pueblos.

Páxina de Faceira

El XXIV Conceyu Internacional d’ICOS sobre Ciencies Onomástiques va celebrase en Barcelona del 5 al 9 de setiembre de 2011 y dientro de les sos ponencies y comunicaciones va cuntase con dellos representantes asturianos. A lo llargo d’esta selmana van falar de toponimia y antroponimia asturiana estudiosos como Ana Cano, Xulio Viejo o Xosé Lluis García Arias.

La profesora de la Universidá d’Uviéu y presidenta de l’ALLA, Ana María González Cano va participar nesti congresu cola comunicación “L’antroponomía asturiana y el procesu de castellanización”.

Xosé Lluis García Arias, caderaglu de la Universidá d’Uviéu va llevar a cabu un taller sobre onomástica asturiana que se celebra gracies a un alcuerdu ente l’Academia de la Llingua Asturiana y la organización del congresu, y nelque tamién va participar Ana Cano, esplicando les publicaciones y trabayos sobre toponimia de l’ALLA.

El tamién profesor de filoloxía, Xulio Viejo va dar llectura a la so comunicación “Tipoloxía toponímica y hestoria del territoriu n’Asturies”.

Pela so parte, el filológu lleonés, afincáu n’Asturies, Héctor García Xil, va llevar alantre la llectura de “Exonimia n’asturianu: los nomes de los países”.

La ex xefa de la Oficina de Política Llingüística d’Asturies, María Antonia Pedregal, va dar llectura a la comunicación “El procesu d’oficialización toponímica nel Principáu d’Asturies”.

N’últimu llugar, Inaciu Galán y González, escritor y periodista, va dar llectura a la comunicación “El procesu de oficialización de la toponimia asturiana (1974-2010)”.

Les sesiones van desenvolvese nel aulariu nuevu de la facultá de Filoloxía de la Universidá de Barcelona, que va ser la sede central del congresu. Los actos d’inauguración y de clausura van tener llugar nel Paraninfu d’esta universidá asitiada nel centru de la ciudá de Barcelona.

El primer congresu de ICOS celebróse en París en 1938 anque nun s’instituyó la celebración de manera periódica hasta’l segundu, celebráu na mesma ciudá en 1947. De magar, y cada trés años, asocediéronse los distintos congresos hasta esti XXIV congresu que se va celebrar en Barcelona en setiembre de 2011.

ICOS axunta a los principales estudiosos ya interesaos n’onomástica de tol mundu. El so campu d’investigación y estudiu son los nomes de persona, o antropónimos, nomes de llugar, o topónimos, y tou tipu de nomes propios. Los sos idiomes oficiales son l’inglés, el francés y l’alemán. Pal congresu de Barcelona los idiomes oficiales ampliáronse, col catalán y l’aranés como llingües propies y oficiales de Cataluña, y col español, tamién oficial nel territoriu catalán.

L’Academia de la Llingua Asturiana sofita y amiéstase al referíu conceyu como institución participante.

El sábadu 10 de setiembre, a les 13:00 hores, nel patiu del CCAI,Kenneth David Pettit desarrollará una charra titulada Asturies, paraísu micolóxicu, na que falará de les setes del País y del so usu gastronómicu. Ken Pettit ye inglés, antiguu profesor d’idiomes, y tuvo’l so primer contactu con estos fundos pluricelulares gracies a la so güela, nos praos del condáu de Suffolk, al noreste d’Inglaterra. Dende entós nun dexó de cultivar esta pasión. Ye miembru de la Sociedad Asturiana de Micología.

El domingu 30 d’ochobre va facese una concentración a favor de la presencia del asturianu nos usos alministrativos del Conceyu de Lleón, dempués de que’l nuevu Conceyal de Cultura Lleonsa, del Partíu Popular, anunciare que diben abandonase los vezos billingües entamados na dómina del gobiernu de PSOE y UPL.

La concentración va celebrase’l domingu 30 d’ochobre a les doce la mañana na Plaza Botines de Lleón.

El Día d’Asturies de 2011 va celebrase nel conceyu d’Amieva, y va tar marcáu pola austeridá, cos actos que van concentrase nuna única xornada, la del 8 de setiembre, frente a los cinco del añu pasáu en Ribesella, cola organización de la Conseyería de Cultura.

L’anuncia entá nun se fixo oficial, pero na páxina web d’una empresa qu’entama espectáculos festivos yá se desveló, sigún recueye esti día La Nueva España, que’l conceyu d’Amievava ser la see del Día d’Asturies. «Como’l llugar (la área de Trambesagües) ye pequenu van tenese qu’escoyer los participantes» nel mercáu asturianu que cada añu celebrar mientres el Día d’Asturies. La próxima selmana (pola actual) vamos dir colos representantes del Principáu a midir el llugar y yá vamos saber cuantos (puestos) vamos poder asitiar», señala na so web la empresa qu’entama’l mercáu asturianu, la mesma que yá lo fixo l’añu pasáu en Ribesella y en 2009 en Cuideiru.

El programa d’actos va cerrase dientro d’una selmana.Polo menos ye lo qu’amueseen los pasos qu’hasta agora siguió’l Gobiernu de Francisco Álvarez-Cascos, que yá se punxo en contactu con delles orquestes, colectivos y grupos folklóricos de la rexón pa que participen na xornada.

El conceyu d’Amieva ta rexíu por Foru Asturies, qu’algamó l’Alcaldía va dos meses gracies al sofitu del PP (el partíu más votáu nes elecciones municipales del 22 de mayu nel conceyu foi’l PSOE).

Les celebraciones lúdiques del Día d’Asturies van desenvolvese na área recreativa de Trambesagües, asitiada na localidá de Santillán, na redoma de la carretera del Pontón. El mayor problema va ser previsiblemente el circulatoriu, dao que la área de Trambesagües cunta con menos d’un centenar de places d’aparcamientu.

L’Executivu rexonal intenta demientres estos díes consiguir más zones d’aparcamientu nos praos cercanos a Santillán. Pel momento nun hubo casi nenguna respuesta positiva per parte de los propietarios.

El Conceyu Universitariu pol Asturianu (CUPA) abre’l plazu p’apuntase a la segunda edición de los Cursos Básicos d’Asturianu del CUPA, una esperiencia formativa qu’entama en collaboración cola Academia de la Llingua Asturiana y Caxa Rural que va celebrase nel conceyu de Xixón. Los cursos, que se va facer na sede del Conseyu de la Mocedá de Xixón (Avda. Manuel Llaneza 68), van entamar a partir d’ochobre nel casu del Nivel 1 y en payares el Nivel 2 y cuntando en dambos casos con 35 hores llectives.

CURSU BÁSICU D’ASTURIANU. NIVEL I

Llunes y miércoles, de 19 a 21 hores

-Empobináu a persones ensin conocimientos d’asturianu o con nivel baxu de conocencia

-Feches: 3 d’ochobre a 14 d’avientu de 2011

CURSU BÁSICU D’ASTURIANU. NIVEL II

Martes y xueves, de 19 a 21 hores

-Empobináu a persones que ficieren el primer nivel del cursu o tenga conocencia media d’asturianu y quieran afondar nes sos habilidaes llingüístiques

-Feches: 3 de payares a 15 d’avientu de 2011 & 10 a 26 de xineru de 2012

El preciu de la inscripción ye de 30 euros, incluyendo los materiales necesarios pa llevar alantre’l cursu, como’l manual “Xeitu”, que va sirvir de guía pal cursu y qu’asoleyó l’Academia de la Llingua Asturiana.

Les inscripciones pueden facese nel corréu lletrónicu conceyuasturianu@gmail.com o nel teléfonu 615 982 816, hasta’l 30 de setiembre nel casu del NIVEL I y hasta’l 30 d’ochobre nel casu del NIVEL II.

Dende’l CUPA animen a participar nestos cursos que van sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies.

L’organismu antirrepresivu asturianu Sofitu denunció una nueva multa a un mozu independentista. El motivu de la multa foi llevar la “AS” asturiana en llugar de la “E” española nel so coche, polo que la policía municipal d’Uviéu, tres llevar el so coche al depósitu, fizo al mozu pagar non sólo la multa pola retirada por mal aparcamientu, sinón tamién otra sanción de 90 euros impuesta pol “axente” númberu 610, qu’amás amenazó al mozu con nun dexalu sacar el coche d’ellí si nun quitaba la “AS”, según espliquen dende la organización denunciante.

Dende Sofitu denuncien que “ye la primer vegada que la policía municipal impón una sanción d’esi tipu,ya que ye vezu que los responsables de diches sanciones seya la Guardia Civil española”, por ello dende Sofitu llamen a la “insumisión a España”.