Sociedá

La Xunta pola Defensa de la Llingua Asturiana (XDLA) va entregar los sos premios añales esti vienres 23 d’avientu, de magar les siete y media la tarde, nel Salón d’Actos del Vieyu Institutu de Xixón. El vinu L.lumés, el primeru etiquetáu n’asturianu va recibir el premiu positivu, el Pegollu; mientres que’ l Madreñazu, que s’otorga a dalguién que destacara polos sos ataques al asturianu, va nesta ocasión pa César Movilla Anta, alcalde de Noreña, qu’evitó qu’una moción n’asturianu presentada por Conceyu Abiertu de Noreña pudiera llevase al plenu del so conceyu.

La entrega de los Premios vaentamar a les 19.30 hores,. Tamién, como tolos años, dempués del actu va haber una espicha. Esti añu va ser nel chigre xixonés Canteli y la entrada val 20 euros. Pa dir, hai qu’acutar sitiu enantes llamando a los teléfonos 985229553 y 679650998, primero del miércoles 21 d’avientu.

L’asociación Iniciativa pol Asturianu presentó esti sábadu nel salón d’actos de la Biblioteca d’Asturies, n’Uviéu. La gala, presentanda por Mariluz Pontón, llocutora de RPA, abrióse cola música de Mariluz Cristobal Caunedo, que quixo dicir unes pallabres de sofitu al ñacimientu d’Iniciativa pol Asturianu. Les intervenciones siguieron entemecíes con vídeos y delles actuaciones, nun actu que se facía col envís de “pone-y fin a la inmovilidᔠy al qu’asistieron según la organización alredor d’un cientu de persones.

Darréu de la intervención de Mariluz Caunedo, Inaciu Galán, miembru de la Xunta Promotora de la organización, entamó coles intervenciones, con un dicursu nel qu’esplicó qu’Iniciativa pol Asturianu venía a “pone-y fin a la inmovilidᔠesperando sumar a “munchos más asturianos al trabayu pol so idioma”. Galán recordó que “de poco val facer autocrítica si nun mos ponemos en marcha pa cambiar la situación” y faló a lo llargo de la so intervención de la importancia de que tol mundu “dea un pasín pa garantizar el futuru del asturianu”.

De siguío emitióse un vídeu que puede vese yá na canal d’Iniciativa pol Asturianu en Youtube, que de mou esquemáticu esplica los oxetivos de la organización.

Nesi momentu Mariluz Pontón anunciaba la primer sorpresa del día, un vídeu del músicu Mario Fueyo, conocíu pol so nomatu de raperu “Dark la Eme”, que saludaba a los asistentes al actu al traviés d’un vídeu y sofitaba’l trabayu d’Iniciativa pol Asturianu. El vídeu podrá vese na rede nos díes vinientes.

L’actor Lluis Antón González punxo’l toque d’humor col monólogu “Les vacaciones”, y quixo amás, nun momentu más seriu, recordar los sos tiempos como miembru de Conceyu Bable, celebrando’l ñacimientu d’Iniciativa pol Asturianu, a la que definió como “perimportante pal futuru del idioma”.

Vieno dempués el momentu pa les intervenciones. Entamaron Vítor Suárez ya Itziar Montes, miembros d’Iniciativa pol Asturianu, qu’esplicaron la forma de funcionamientu de l’asociación, esplicando los puntos básicos y dalgunos de los planes de trabayu de la organización, ente los que tán “pequeñes campañes qu’abran espacios nuevos de normalidá pal idioma asturianu”.

Fueron entós apaeciendo miembros de sectores de la sociedá, que veníen a comentar los problemes y posibles soluciones pal futuru del asturianu na so estaya d’actividá. Entamó l’artistas y escritor Ánxel Nava, acompañáu del autor de la imaxe corporativa d’Iniciativa pol Asturianu, Alex Ordiales. Nava mostróse ilusionáu col ñacimientu d’Iniciativa pol Asturianu y felicitó a la organización, ufiertando la so collaboración al proyectu.

Los maestros d’asturianu tuvieron representaos por Ana García Peláez y Chechu García, que tomaron la pallabra esplicando les posibilidaes de futuru pal enseñu del asturianu y el so usu como llingua vehícular.

Tamién participaron nel actu Próspero Morán, director d’Asturnews y presentador de la TPA, y Xuanxo Mariño, director de Radio Sele, en representación de los medios de comunicación asturianos, y Xandru González Ramos, Xuan Pandiella y Denis Soria, en nome de la mocedá d’Asturies, esplicando lo que dende esti sector social podría facese pol futuru del asturianu.

Toos xuntos, nel escenariu zarraron esti actu de presentación con otru vídeu grabáu nes cais d’Asturies y onde ciudadanos espresen los problemes más graves que vive l’asturianu y piden soluciones, sofitando amás l’apaición d’Iniciativa pol Asturianu.

La folixa siguió dempués nel chigre L’Esperteyu, onde munches persones decidieron “tomar la inciativa” y apuntase a la organización acabante nacer.

La páxina web púnxose en marcha esti mesmu sábadu, anque entá nuna versión en pruebes, que dirá rematándose a lo llargo de les selmanes vinientes.

La organización califica l’actu como un ésitu, anque recuerda qu’esti ye namás l’entamu d’una etapa de munchu trabayu na que tiene la complicada xera de movilizar a la sociedá asturiana y convencela de la importancia de trabayar pa que l’asturianu tenga futuru.

L’asociación Iniciativa pol Asturianu va presentase na tarde de güei, sábadu 17 d’avientu nel salón d’actos de la Biblioteca d’Asturies, n’El Fontán, Uviéu. Un actu con delles actuaciones va sirvir de marcu pa la presentación de les llínies maestres del proyectu. A les siete la tarde va entamar l’actividá.

L’asociación Iniciativa pol Asturianu va presentase esti sábadu 17 d’avientu nel salón d’actos de la Biblioteca d’Asturies, n’El Fontán, Uviéu. L’actu va consistir nuna pequeña gala con intervenciones, proyección d’audiovisuales y actuaciones musicales, amás d’otres sorpreses. Iniciativa pol Asturianu ye, según espliquen dende la Xunta Promotora de l’asociación “una organización que ñaz pa implicar a tola sociedá asturiana nel procesu de recuperación y normalización del asturianu”. El so trabayu va centrase tanto nel sector públicu como nel priváu “a la busca de nuevos espacios de normalidá pal idioma asturianu”.

L’asociación, añaden, “entama la so actividá pública dempués de dellos meses de trabayu discretu pa xenerar una estructura, crear la so páxina web, materiales y dir xenerando una rede de voluntariáu a lo llargo de tol territoriu asturianu”.

Nel actu d’esti sábadu, presentáu pola periodista Mariluz Pontón, va poder sentise la música de Mariluz Cristobal Caunedo “la dama de la canción asturiana”, amás de Tante Blanco, ex miembru de Los Berrones. Amás, habrá espaciu pal humor, de la mano del monologuista Lluis Antón González, perconocíu pol so trabayu como humorista na TPA. Xunto a estos elementos más lúdicos, presentaránse les idees básiques del colectivu y, amás, participarán delles personalidaes de diferentes estayes de la sociedá asturiana: educación, medios de comunicación, arte y cultura… Nel actu espérense delles sorpreses que la organización entá nun desveló.

L’actu va entamar a les siete la tarde y ta abiertu a tolos interesaos, de baldre y hasta enllenar l’aforu del salón d’actos de la Biblioteca d’Asturies.

Folixa nel chigre L’Esperteyu

En terminando l’actu, hacia les nueve, va celebrase una folixa nel chigre uvieín L’Esperteyu, asitiáu na Cuesta la Vega o cai Azcárraga.

Iniciativa pol Asturianu en Facebook

La productora d’Ámbitu, editora del diariu Les Noticies, ta acabante asoleyar los trés primeros capítulos de “Chatarrona”, la primer comedia de situación n’asturianu a costafecha pa la rede. La páxina web chatarrona.com acueye yá los trés capítulos primeros, de diez minutos caún. La serie ta escrita por Alberto Suárez y tien como actores a Masokhna Diop, Pedro Durán, Juana Marrón y Alberto Rodríguez.

La producción de Chatarrona pue calificase según la propia productora como “de low cost”, porque se fizo con un presupuestu baxu pa lo que suelen costar esti tipu de productos audiovisuales. Sicasí, espliquen que se llevó alantre “dafechamente con profesionales”.

Chatarrona ye una comedia gris, urbana y contemporánea, que cuenta la hestoria de dos amigos nuna situación desesperada: Chuso (Alberto Rodríguez) y Esteban (Pedro Durán) viven nun apartamentu propiedá de los padres de Chuso que yá nun usen porque compraron un pisu meyor. Al ser una vivienda de la familia, nun paguen renta, namás los gastos, pero entrambos dos tán al paru y yá nun tienen drechu a prestaciones económiques, así que Chuso decide que la meyor manera de sacar perres ye poner un anunciu pa garrar posaderos que quieran compartir pisu y, de pasu, aprender un idioma, l’asturianu. Un negociu basáu nos típicos programes internacionales, pero aplicáu a Asturies. L’arribada al pisu de Malik (Masokhna Diop), un inmgrante que trabaya nun chigre, y de Carolina, una asturiana qu’acaba de torna de vivir fuera, xeneren el conflictu de la serie.

Iniciativa pol Asturianu, una asociación nueva que va trabayar pola normalización del idioma asturianu y pol reconocimientu de los drechos llingüísticos de los sos falantes, yá ta na rede. La so presentación pública va ser esti sábadu, a les siete la tarde, na Biblioteca d’Asturies, n’Uviéu, pero yá tán funcionando nes redes sociales Facebook y Twitter.

Páxina d’Iniciativa pol Asturianu en Facebook

“Ls Quatro Eibangeilhos” ye’l títulu de la versión nueva de los evanxelios na variedá mirandesa del asturianu. Una torna d’Amadeu Ferreira qu’asoleya Loja da Bíblia Editorial y que se presentó en Lisboa’l mes pasáu.

La torna ta fecha ente 2001 y 2004 sobre la versión en llatín de la Biblia, “la vulgatam”.

L’Academia de la Llingua Asturiana punxo en llinia apocayá una páxina web temática centrada nel so boletín Lletres Asturianes. Un espaciu nel que restolar nos númberos vieyos de la revista ciéntifica de l’academia con más facilidá. A poco y a poco l’ALLA va dir xubiendo númberos vieyos en formatu dixital, amás de los nuevos, que dende’l 105 van xubise dende la so salida al mercáu, amás d’en papel, en pdf.

La páxina inclúi dellos apartaos: Direición-Edición, Indexación o Normes d’espublización, amás d’una versión n’inglés pa facilitar la internacionalización de la espublización académica.

Coordináu por Ramón d’Andrés, ta acabante apaecer el llibru “Ciencia, lengua y fronteras”, nel que se recueyen les ponencies del congresu celebráu n’Uviéu l’añu pasáu col mesmu nome, pero n’asturianu. Un llibru y discu de datos que recueyen toles conferencies y comunicaciones de los especialistes asturianos, estatales y europeos en llingüística xeneral, en romanística, en dialectoloxía hispánica, gallego-portuguesa y asturlleonesa, asina como en filosofía del llinguaxe o en bioloxía.

El llibru, que tien un preciu de 25 euros, va acompañáu por un discu que recueye en formatu PDF toles ponencies qu’apaecen nel llibru más cinco lleíes tamién nel congresu y que nun tuvieron espaciu na versión en papel.

L’asociación lleonesa Faceira ta acabante poner en marcha una protesta ciudadana pola mor de los incumplimientos de la llexislación llingüística aprobada nel añu 2007 cola reforma l’Estatutu d’Autonomía de Castiella y Lleón , onde se diz que “el lleonés sedrá oxetu de protección específica polas instituciones pol so particular valor dientro del patrimoniu llingüísticu de la Comunidá. La so protección, usu y promoción sedrán oxetu de regulación”.

Faceira recuerda que “yá pasaron cuatro años dende la reforma estatutaria y el Gobiernu de Castiella y Lleón nun estableció nenguna midida pa la protección del lleonés, nin dictó o promovió nenguna regulación pa la so protección, promoción y usu”. L’asociación recuerda que na mesma comunidá autónoma yá hai escueles onde se puede estudiar vascu, pesie a que nun ye una llingua reconocida pol Estatutu, como sí asocede col asturianu y el gallegu.

Dende Faceira y de manera coordinada con otres asociaciones y colectivos de defensa del patrimoniu llingüísticu lleonés, tán presentado quexes al Procurador del Común de Castiella y Lleón col fin de denunciar esta situación d’incumprimientu del artículu 5.2 del Estatutu, y la marxinación y discriminación p’hacia los falantes de lleonés pola alministración autonómica y conviden a la ciudadanía a sumase y quexase tamién.

La organización ufre un modelu de quexa y les instrucciones pa facela llegar al Procurador na so páxina web.

Más información