Sociedá

Esti xueves 1 d’avientu, la tertulia Enrique García Rendueles va falar sobre’l movimientu nacional Bretón. La charra entamarála Xesús Nel García, trabayador del metal, músicu, estudiante d’antropoloxía y militante de Conceyu Abiertu por Xixón, que fadrá una introducción al tema, pa darréu aldericar colos asistentes.

Trátase d’un averamientu a la realidá hestórica,llingüística y política de Bretaña. Diferencies y similitúes ente los movimientos nacionalistes de Bretaña y Asturies.

L’actu entamará a les 20:30 nel C.C L’Ayalga de Xixón (Prendes Pando 11. baxu) y la entrada ye llibre.

Un xugador del equipu de balonmano Reale Ademar de Lleón acaba de da-y nome a la mascota del clú. Jaime González ye un amante de la llingua propia d’Asturies y Lleón. A eso súmase que’l so padre ye asturianu, polo que se siente mui venceyáu a Asturies. El nome de la mascota axunta los nomes “llionés” y “bable”, convirtiéndo a la mascota del Reale, un perru mastín lleonés hasta agora nomáu “Caimán”, en “Llibla”.

Hasta’l 15 de xineru, el Vieyu Institutu Xovellanos de Xixón acueye una esposición entamada en collaboración con Caxa España, Caxa Douru y el Muséu Oriental de Valladolid, que tien la colección más importante d’arte del Estremu Oriente esistente anguaño nel estáu. A les obres traíes por más de 2.000 misioneros añediéronse 299 donaes pol Dr. S. C. Cheng en 1997 y 2000, de les que dalgunes pueden vese agora n’Asturies.

Nesta esposición preséntense 100 pieces de la segunda donación. La so cronoloxía toma dende’l sieglu XIV hasta’l sieglu XX. van amosase caligrafíes, sellos imperiales, pintures d’autores como Sheng Mou (1310- 1371), Shen Zhou (1427-1509), ente otros; pintures d’abanicu de los sieglos XIX y XX; tabaqueres de la dinastía Qing (1644-1911) y sieglu XX, feches en porzolana, jade, vidriu pintáu per dientro; cerámiques y porzolanes de les dinastíes Ming y Qing y obres escultóriques en piedra, madera, y bronce de los sieglos XIX y XX.

Nesta esposición quier resaltase el calter inefable” del arte chinu, “que nun se puede espresar con pallabres”.

La Fundación Belenos tien abiertu’l plazu p’apuntase a la edición númberu dolce del so Seminariu d’Estudios Asturianos, que va entamar el viniente 26 de payares en La Puela. Estes xornaes etnográfiques van tener esti añu como tema central la vida nes brañes asturianes.

Los actos van entamar el sábadu 26 de payares a les diez y media la mañana cola presentación ya inauguración del XII Seminariu d’Estudios Asturianos. A les 11, l’antropólogu y profesor de la UNED, Adolfo García Martínez va dar la conferencia “Las brañas n’Asturias. La trashumancia interior y la trashumancia de los vaqueiros d’alzada”. A les 12:30 Xulio Concepción Suárez, filólogu y profesor IES, va dar llectura a “Siempre de camín ente la casa y la cabana”.

Dempués de la xinta, alredor de les cinco la tarde, Gonzalo Barrena Díez, profesor de Filosofía IES lleerá la conferencia “Habitantes de la peñe. Pastores y mayadas en los Picos d’Europa” y darréu Alberto Álvarez Peña, fadrá lo propio cola comunicación “El mal güeyu, l’aigla y la tona”. El mundu de les mentalidaes na cultura les brañes.

Dempués de la cena va celebrase un Filandón, con fiesta asturiana de nueche nel “Café Centro”, amenizada con música del País.

El domingu, a les 11:30 celebráse una visita guiada a una braña d’Allande y alderique en conceyu abiertu, baxo’l tema de discutiniu “Les brañes güei: ¿El desaniciu d’una cultura milenaria?”. A les dos y media celebráse la xinta y el pieslle del Seminariu.

El preciu de matrícula ye de 40 euros. La inscripción considérsase fecha namás que col ingresu en cuenta del preciu de matrícula (FUNDACIÓN BELENOS. Númberu de cuenta: 2048 0000 26 0340123307). Los interesaos n’agospiu opcional en réxime de pensión completa en “La Nueva Allandesa”: preciu por persona: 60 € (dende la xinta’l sábadu a la xinta’l domingu, too incluyío dafechu).

Pa más información seminariudebelenos@gmail.com o fundacionbelenos@gmail.com y los teléfonos 985244811 y 616242319.

Énte l’anunciu de la paralización del procesu de validación de les papeletes de les candidatures del partíu políticu Andecha Ástur al Congresu y al Senáu estatales per parte de la Xunta Electoral Provincial “pol simple fechu de tar presentaes en llingua asturiana”, l’Asociación Cultural N’Ast quixo denunciar esti comportamientu y amosar la so solidaridá.

N’ast califica esti fechu como “una nueva agresión antidemocrática a los drechos non solamente d’un partíu políticu (el poder presentase en llingua asturiana) sinón tamién del conxuntu de la ciudadanía asturiana (el poder votar n’asturianu)”.

L’asocación N’Ast denuncia “qu’esta arbitrariedá caciquil ye namás posible gracies a l’ausencia tanto d’un marcu xurídicu qu’oficialice la llingua asturiana como d’una movilización popular permanente col envís de camudar la estructura sociollingüística del País”.

El miércoles pasáu salió d’imprenta’l númberu 22 de la revista trimestal “Contracorriente”, frutu del trabayu del grupu encargáu de retomar la ellaboración de la revista de la Corriente Sindical d’Izquierda (CSI), una publicación onde apaecen conteníos n’asturianu,

Esti númberu percuerre distintes problemátiques, dende la fusión de Caxastur, el esmatelamientu del sector naval, la privatización de la sanidá, el conflictu de les piscines d’Avilés, la esclusión social amplificada pola crisis, el secuestru de la RTPA per parte de la clase política, una entrevista al nuesu secretariu xeneral Samuel Fernández… hasta cuestiones rellacionaes cola flota de la paz, la soberanía alimentaria o la memoria del Ochobre asturianu de 1934.

Descarga’l boletín de la CSI

La xornada tercera y cabera d’esti Conceyu Internacional celebráu pola Academia de la Llingua Asturiana n’Uviéu, va entamar a les cuatro y media cola ponencia d’Ana Isabel Boullón, de la Universidá de Santiago, alredor de “Cuestiones de onomástica gallega y asturiana”. A les cinco y cuartu, la presidenta de l’Academia de la Llingua Asturiana, Ana María Cano González, va falar de “Más apellíos modernos vinientes de xenitivu”.

A les cinco y media, Xuan Xosé Lajo Martínez comentará dalgunes cuetiones alredor de “La formación y emplegu de los antropónimos en Senabria: nomes oficiales, oficiosos y nomatos”, siguiendo Clara Elena Prieto Entrialgo cola comunicaicón “Nomes comerciales del vinu, la sidra y la cerveza n’Asturies”.

Les últimes conferencies de les Xornaes van dales María Dolores Gordón Peral, de la Universidá de Sevilla, que va falar de les “Güelgues hestóriques de la presencia d’asturianos y lleoneses n’Andalucía Occidental y la Baxa Estremadura y Stefan Ruhstaller de la Universidá Pablo de Olavide con “Los primeros diccionarios etimolóxicos de nome de llugar.

Programa completu d’actividaes de les XIDE

Dientro del Conceyu Internacional de Toponimia y Antroponimia Asturiana que celebra l’Academia de la Llingua Asturiana nes Xornaes Internacionales d’Estudiu d’esti añu, Próspero Morán, director d’Asturnews, y el periodista Inaciu Galán, van poner n’estudiu la situación de la toponimia tradicional asturiana, agora en parte oficializada, nos medios de comunicación que funcionen n’Asturies, tanto públicos como privaos, cola comunicación “La toponimia asturiana nos medios de comunicación: situación y perspeutives”, a partir de les seis y media la tarde.

La segunda xornada va entamar unes hores enantes, cola ponencia d’Emili Casanova, de la Universidá de Valencia, “Topónimos y antropónimos valencianos esplicaos al traviés de la onomástica asturiana”. A les cinco y cuartu la tarde, Fernando Bello Garnelo daré llectura a la comunicación “Toponimia y antroponimia na zona de Las Médulas (Lleón)”, siguiendo cola intervención d’Iván Huerga Antuña alredor de “La organización territorial y familiar na conformación de la toponimia y l’antroponimia en Piloña”, un repás a la “Topoantroponimia berciana” per parte de Jesús García y García, y darréu, una posa de quince minutos.

Dempués de la comunicación sobre medios de comunicación y toponimia, d’Inaciu Galán y González & Próspero Morán, el lleonés Héctor García Gil tratar dalgunes cuestiones alredor de la exonimia.

A les siete y cuartu Carmen Díaz Alayón, de la Universidá de La Laguna, va fala de “La toponimia de Canaries: rasgos particulares y aportes llingüísticos”, rematando la xornada la presentación del llibru “Toponimia hispánica. Origen y evolución de nuestros topónimos más importantes”, coordináu por X. Ll. García Arias y editáu por Emili Casanova na editorial Denes, de Valencia.

Programa completu d’actividaes de les Xornaes

Esti martes 9 de payares entamaron n’Uviéu les XXX Xornaes Internacionales d’Estudiu de l’Academia de la Llingua Asturiana. Asturnews fizo una cobertura en directu al traviés de la so canal de Twitter, y ufre agora decenes de semeyes de los actos, que pueden consultase na canal de Facebook d’esti diariu.

Consulta les semeyes equí

L’Academia de la Llingua Asturiana celebra estos díes les Xornaes Internacionales d’Estudiu, qu’esti añu se centren na organización d’un Conceyu Internacional de Toponimia y Antroponimia Asturiana. A les ocho y cuartu la tarde van presentase dos revistes. La edición dixital del númberu 105 de Lletres Asturianes y la nueva publicación de l’Academia de la Llingua Asturiana “Ciencies. Cartafueyos Asturianos de Ciencia y Teunoloxía 1, una revista dixital espublizada a comuña cola Universidá d’Uviéu, pero enantes, dende 16:45 van celebrase más actividaes.

Les conferencies van entamar con Xavier Terrado Pablo, de la Universidá de Lleida, alredor del “Léxicu románicu arcaicu na toponimia catalana y asturiana”. A les cinco y media Martín Sevilla va falar de “Los topónimos asturianos Taloca / Camoca”. Darréu, Xabiel Fernández García va lleer la comunicación “Oiconimia asturiana. La casa como elementu vertebrador del sistema socio-económicu tradicional”, siguiéndolu Francisco Javier Redondas Maseda, que va falar de los “Rasgos toponímicos nel Suroccidente Astur”.

Dempués de la posa de media tarde, a les 18:45, Pablo Suárez García va dedicar la so comunicación a “La deturpación toponímica n’Asturies”, rematando les comunicación Xosé Lluis García Arias con “Documentación asturiana y toponimia” y Alda Rossebastiano, de la Universidá de Torino, con “La onomástica na Universidá de Turín”.

Programa completu d’actividaes de les XIDE