Sociedá

El presupuestu de la Conseyería de Cultura d’Asturies, de la que depende orgánicamente l’Academia de la Llingua Asturiana, anuncia esti añu un presupuestu de 167.900 euros pa esta institución, lo que supón 62.000 euros menos que l’añu pasáu.

El Súmmum,revista cultural editada por Publicaciones Ámbitu, llega al númberu 39 con un exemplar añal que yá se puede merca en llibreríes y na tienda en llínia de la editorial, yá que dende esti númberu la revista ye de pagu. Nes sos 192 páxines a color, la publicación recueye entrevistes a los escritores Rosa Montero, Gonzalo Suárez, Antón García, Jordi Llavina y Ovidio Parades; reportaxes gráficos de trabayos de los creadores plásticos Fernando Bayona, Miguel Galano y Bill Viola y de los museos de Louisiana en Copenhagen y l’Arqueolóxicu d’Uviéu.

Nel tarrén audiovisual, anúnciase la estrena de la comedia de situación Chatarrona ya infórmase sobre’l documental de Melania Fraga sobre l’occidente asturianu y sobre la última película de Lucia Herrera. Nel campu del diseñu gráficu y multimedia, entrevístase a los responsables del estudiu de diseñu Diseco y repásense los últimos trabayos d’Ámbitu.

En cuantes a la escena asturiana, faise esbilla de les estrenes teatrales del añu de la mano del críticu Beni Ortiz. Pe la so parte, l’apartáu musical protagonícenlu Nacho Vegas, Dark la Eme y Skama la Rede y el d’ilustración, Francisco Pimiango, Javier Mariscal y Alfonso Zapico. La estaya de creación lliteraria, cuenta con collaboraciones de Pablo X. Suárez, Marina Sanmartín «La Fallera Cósmica» y Belén Rico.

El Centru Asturianu de Madrid ta acabante anunciar los sos gallardones del añu 2011, otorgaos a asturianos que destaquen nel so llabor n’estremaos llabores. Próspero Morán, director d’Asturnews, va recibir l’Urogallo de Bronce na categoría de llingua asturiana. El premiu, que s’entrega dende 1987, recibiéronlu nel pasáu xente como Xosé Lluis García Arias, Mª Josefa Canellada, Florina Alías, Ediciones Trabe o Nené Losada Rico, ente otros, y reconoz el llabor a favor del espoxigue del asturianu.

Próspero Morán (Llangréu, 1962) lleva toa una vida dedicáu al llabor pol asturianu. Llicenciáu en Filoloxia Hispánica y Doctor en Llingua y Lliteratura Española, algamó dellos posgraos en nueves tecnoloxíes y vien compartiendo’l so llabor de docente n’universidaes col trabayu como periodista, trabayu onde siempres tuvo al asturianu como llingua d’espresión.

El so llabor como periodista entamó en Radio Llangréu, pasando per cásique tolos medios asturianos y dellos estatales, como La Voz de Asturias, onde llegó a ser Xefe de Cultura, TVE, onde foi presentador del telediariu nuna de les poques esperiencies d’informativos n’asturianu. Collaboró tamién en Radio Asturies-SER, Radio 5, el Canal Internacional de TVE, el diariu económicu CincoDías, Qué, y nos años últimos, na TPA, onde presenta’l programa “Nós”, tamién na nuesa llingua.

Dende la so empresa Asturnet fundó Asturnews, una de les primeres esperiencies periodístiques pal asturianu n’internet. El so llibru “Llingua y Nueves Tecnoloxíes”, asoleyáu en 1996, ye ún de los pocos trabayos dedicaos al usu de llingües minoritaries nos medios que trata’l casu asturianu.

El so llabor a favor del asturianu fizo que lu nomaran miembru correspondiente de l’Academia de la Llingua Asturiana. Recibió amás otros reconocimientos, como l’Antena de Plata de l’Asociación de Radio y Televisión d’Asturies.

Otros de los gallardones que van entregase esti añu n’otres categoríes, van dir pa José Luis Martínez, presidente del Atenéu Xovellanos de Xixón, José Luis García Bigoles, del Bancu Herrero, Olmar, S.L., Laureano Muñiz, Andecha Folclor d’Uviéu, na categoría de baille, y la Coordinadora Ecoloxista D’asturies C. E. A., ente otres persones y organizaciones.

La empresa de tresportes ALSA entama a usar la toponimia asturiana tradicional, y agora oficial, dempués de les quexes y la collaboración de miembros d’Iniciativa pol Asturianu y l’asociación decidió felicitar al traviés d’una carta a la empresa pol avance nel usu de la toponimia asturiana. La organización anunció, amás, que va aconceyar con ALSA pa facer porque sigan dando pasos na normalización del asturianu na so compañía.

L’asociación Iniciativa pol Asturianu, que se presentó de forma pública’l pasáu sábadu 17 d’avientu n’Uviéu, amosó la so allegría “pol pasu tan importante que ta acabantes de dar la empresa de tresportes ALSA”. Esta empresa, que tuvo’l so orixe n’Asturies y que caltién llazos bien importantes col país, “venía incumpliendo la llei al nun usar la toponimia oficial asturiana”, esplique.

Dende Iniciativa pol Asturianu recuerden que “amás de nun ufren a los asturfalantes la posibilidá de consultar la so páxina web n’asturianu”. Iniciativa pol Asturiana espera siguir collaborando pa cambiar esta situación, pa lo que van aconceyar con responsables de la empresa “pa tresmiti-yos una serie de midíes que favoreceríen la normalización del usu del asturianu nes sos rellaciones colos usuarios”.

Na organización reivindicativa esperen “qu’esti conceyu seya granible pal idioma y suponga’l primeru de los munchos cambeos necesarios pa facilitar l’usu del asturianu en toles estayes de la vida”.

L’asociación Furmientu, que trabaya pol esporpolle del asturianu en Zamora, celebra como cada añu’l so Alcuentru d’Iviernu. Sedrá na ciudá de Zamora, el sábadu 7 de xineru, de magar les dos de la tarde na cai Amargura, 33 4u D. Los interesaos n’asistir han llamar a los teléfonos 626102171 y 695515386.

Dende va pocos díes y mientres tol mes de xineru pue visitase una nueva esposición n’El Centru Social La Semiente, en L’Entregu. Tratase d’una esposición de fotoperiodismu que ta rodando per distintos llugares del estáu. Con motivu del quintu aniversariu del periódicu Diagonal, intentóse faer un pequeñu resume de lo asocedío mientres esos años con dellos trabayos de los fotoperiodistes qu’espublicen davezu nesti mediu.

“Diagonal. Cinco año Junt@s” ye’l frutu del güeyu de reporteros gráficos como Boris Svarezman, Argeo Ameztoy, Eva Mañez, Olmo Calvo, Edu León, Joan Alvado, Edu Bayer, Diego Ibarra, Eduardo Martino, Amaya Zabalo, David Fernández, Ferrán Quevedo, Juan Carlos Rojas, Pedro Moreno y José Alfonso. Una esposición que percuerre les cais y la problemática social non solo del estáu español si non de sitios como Iraq, China, Turquía, Gambia, Italia, Palestina, Brasil, Paraguay, Méxicu, Xeorxa…

La esposición va poder visitase nel horariu d’apertura del Centru Social La Semiente, tolos miércoles y xueves a partir de les 17.30 h y tami los díes qu’hai actividaes programaes.

Andecha Astur, l’asociación N’Ast, el Bloque de la Mocedá Asturianista, Conceyu Abiertu, Darréu y Xunta Cultural Rebelgu tan acabante roblar un comunicáu col que quieren amosar la so posición “alredor de la nueva nula presencia de partios de les seleiciones deportives asturianes absolutes nesta época navidiega”.

Comunicáu completu:

Como yera vezu hai unos años, les seleiciones deportives del nuesu país disputaben partíos con otres seleiciones deportives absolutes mentantu trescurríen estes feches n’avientu y entamos de xineru tolos años con regularidá. Esto yera un fenómenu común hasta fai unos años, cuando’l Gobiernu del PSOE dexó de dar esta oportunidá a los asturianos y asturianes pa vibrar y esfrutar de les nueses seleiciones nacionales. En toos aquellos partíos amistosos onde Asturies xugaba con otres seleiciones d’élite destacaba la espectación que la nuesa seleición xeneraba énte’l Pueblu Asturianu, enllenando estadios como El Molinón o’l Carlos Tartiere.

Cola supresión d’esos partíos vino una época de silenciu institucional alredor d’esti tema, nun queriendo tratalu énte la sociedá asturiano, ensabiendo l’anterior gobiernu que los ciudadanos y ciudadanes d’esti país demandaben partíos de la so seleición. Polo tantu, la FSA-PSOE ye gran responsable d’esti parón, pero tamién de bona parte de la decadencia y falta de promoción que tien bona parte’l deporte asturianu, yá qu’estos alcuentros yeren una gran ferramienta pa visibilizar de forma internacional el potencial deportivu qu’hai n’Asturies. Agora, col trunfu eleutoral de Foro Asturias y Francisco Álvarez Cascos de presidente autonómicu entramos nun nuevu escenariu, o asina debería de ser.

Poro, desiximos la torna de los partíos de les seleiciones deportives asturianes, entendiendo que Foro Asturias tien que puxar por ellos dende’l Gobiernu, y que ye d’obligáu cumplimientu la puesta en marcha d’estos eventos por parte d’un partíu políticu que se diz “rexonalista” o “asturianista”. Mentantu se quieren traer a Asturies partios de la seleición española escaecen dende les instituciones a la nuesa seleición asturiana, una amuesa más de la distancia qu’hai ente los representantes políticos d’Asturies y el sentir asturianu de la ciudadanía. Per otru llau, y teniendo en cuenta l’actual coyuntura de crisis capitalista, abogamos pola organización d’estos eventos dende l’austeridá, faciendo que’l beneficiu económicu que salga d’ellos seya invertiu nel deporte base asturianu, onde munches entidaes deportives pequeñes tan pasando munches dificultaes.

Por ultimu, queremos treslladar la idea de que les seleiciones deportives del nuesu país fueren oficiales estos problemas nun apaeceríen, habiendo mayor marxen d’autonomía dende los organismos deportivos patrios, y teniendo la capacidá Asturies de formar parte de competiciones oficiales ya internacionales, fechu que’l Pueblu Asturianu nun tenemos dulda qu’acoyería con gran gratitú y satisfacción.

¡Que tornen los partíos de la nuesa seleición!

¡Oficialidá pa les seleiciones deportives asturianes!

La Xunta pola Defensa de la Llingua Asturiana (XDLA) va entregar güei, vienres 23, los sos premios añales, de magar les siete y media la tarde, nel Salón d’Actos del Vieyu Institutu de Xixón. El vinu L.lumés, el primeru etiquetáu n’asturianu va recibir el premiu positivu, el Pegollu; mientres que’l Madreñazu, que s’otorga a dalguién que destacara polos sos ataques al asturianu, va nesta ocasión pa César Movilla Anta, alcalde de Noreña, qu’evitó qu’una moción n’asturianu presentada por Conceyu Abiertu de Noreña pudiera llevase al plenu del so conceyu.

La entrega de los Premios va entamar a les 19.30 hores. Tamién, como tolos años, dempués del actu va haber una espicha nun chigre xixonés.

La Mancomunidá d’El Cabu Peñes, a traviés del so Serviciu de Normalización Llingüística, ta repartiendo estos díes d’avientu una campaña (que se compón de folletos y pegatines) que col eslogan “Na igualdá nun quedes fuera xuegu. Porque tamién xugando deprendemos a vivir” pretende facer valorar los xuegos y xuguetes que desarrollen actitúes y comportamientu de cooperación, el respetu a les diferencies y les rellaciones d’igualdá.

Inténtase con ello contribuir a eliminar la visión de xuegos y xuguetes pa neños y xuegos y xuguetes pa neñes y concienciar y implicar a la xente na importancia del xuegu como principal instrumentu d’aprendimientu y socialización. Y ye que’l llabor de les families y les persones adultes ye escoyer xuguetes non sexistes y non violentos qu’entretengan y qu’eduquen, que permitan un desarrollu integral de neños y neñes, potenciando les sos cualidaes individuales y aquelles otres que debemos considerar importantes como la creatividá, la imaxinación, la iniciativa y el cuidáu de les demás persones. Esti sedría l’enfotu cimeru d’esta campaña, según espliquen los sos organizadores.

Dende’l Serviciu quieren recordar tamién “que’l cuartu onde xueguen ye un espaciu de convivencia onde se pue tar y xugar”, pero enxamás un “almacén de xuguetes”. Toos esos xuguetes “olvidaos” – que tean, claro ta, en condiciones afayadices – puen aprovechalos otros rapacinos y otres rapacines que nun tienen la suerte de poder mercalos de nuevos. Ye un actu de solidaridá, espliquen “que tamién mos pue ayudar a reflexonar y valorar más les coses que tenemos”.

El perru mastín, mascota del equipu lleonés Reale Ademar, yera conocíu dende va meses como Llibla, dempués de que lu rebautizare un xugador del equipu, col nome, xuntanza de los nomes “bable” y “llionés”.

La, yá finada mascota d’esti equipu de la lliga Asobal de balonmano participare en dellos rodaxes de películes, como “Alatriste” o “El Reino de los Cielos”.

https://asturnews.com/index2008.php?idn=11694