Sociedá

Iniciativa pol Asturianu celebró na tarde d’esti sábadu 25 de febreru, el so primer Congresu, nel Auditoriu d’Uviéu. La votación de los socios dio como ganadora a la candidatura encabezada pol periodista Inaciu Galán (Xixón, 1986), que llevaba como vicepresidente al estudiante de maxisteriu y activista llingüísticu Vítor Suárez (Uviéu, 1988), xunto a ellos el tamién periodista Rubén Martín-Llames (Xixón, 1976) como secretariu y la profesora Ana María Viesca Iglesias (Piloña, 1959) como ayalguera.

Nel congresu presentóse la Memoria de Trabayu 2011, onde s’esplica’l llabor fechu hasta’l momentu, y qu’anunciaron “sedrá colgada na web nos díes vinientes”. Amás punxéronse les bases al trabayu de los próximos meses cola aprobación d’una Fueya de Ruta presentanda pola candidatura ganadora, amás de cola asunción de responsabilidaes nos conceyos per parte d’otros socios, col envís de poner en marcha grupos llocales de trabayu que lleven la reivindicación llingüística a les cais y les insitituciones d’Asturies.

Iniciativa pol Asturianu ñació’l pasáu mes d’ochobre y tres dellos meses de puesta en marcha, presentándose’l 17 d’avientu nuna gala na Biblioteca d’Asturies, n’Uviéu. Dende entós vien poniendo la so voz na reivindación llingüística, denunciando casos de discriminación y llevando a cabu avances al traviés de la negociación, nos que destaca l’entamu nel usu de la toponimia asturiana per parte de la empresa de tresportes ALSA.

El Coleutivu Cambalache va presentar el nuevu númberu de la revista feminista “La Madeja” a les 20 hores del próximu xueves 23 de febreru, nel centru social La Semiente.

Per otru llau en La Semiente ta xestándose un Grupu de Consumu y el vienres 24 a les 18:30 hores va facese otru conceyu pa siguir consolidando’l so funcionamientu, al que dende La Semiente animen a acudir.

Amás, el vienres 24, Benito, dende’l conceyu Bimenes, va mostrar el so espectáculu “Xuglará” sobre les 21 hores.

La organización Iniciativa pol Asturianu emitió un comunicáu nel que calificó’l retayu d’un 40% a los presupuestos de l’Academia de la Llingua Asturiana (ALLA) como “un ataque al idioma asturianu, nun contestu mui difícil pa la llingua d’Asturies, y teniendo en cuenta que l’ALLA ye una institución siempres austera y que yá hasta agora cuntaba con namás los fondos imprescindibles pal desenrrollu del so llabor”, recordando amás que la máxima institución llingüística asturiana “sigue ensin recibir fondos del Gobiernu central”, como sí reciben les academies del castellán, catalán, vascu y gallegu.

Iniciativa pol Asturianu pide al Gobiernu d’Asturies que “rectifiquen” esta partida del presupuestu prorrogáu pa 2012, “calteniendo, polo menos, la cantidá establecida pal añu anterior, y nunca con rebaxes penriba de la media del restu de los retayos de presupuestu”.

Amás, Iniciativa pol Asturianu, recuerda que ye tamién responsabilidá del Gobiernu d’España la financiación de l’Academia de la Llingua Asturiana, pues nos sos presupuestos incluyen una partida “pa financiar a toles academia de les diferentes llingües que se falen nel Estáu español”.

Los datos ufríos pola organización, que pueden consultase nos presupuestos xenerales de 2011, amuesen que la Real Academia Española recibe más de 4 millones d’euros, mientres que l’academia del catalán (l’Institut d’Estudis Catalans) recibe cuasi 1 millón d’euros, la de la llingua vasca, mediu millón d’euros y la Real Academia Galega, 200.000 euros. Pa la organización llingüística “esto supón una nueva marxinación hacia la nuesa llingua, que nun cuenta pa les autoridaes estatales”.

Por ello, Iniciativa pol Asturianu reclama al Gobiernu d’Asturies, amás del cambiu nos sos propios presupuestos, “qu’esixa al Gobiernu d’España una partida pa l’ALLA nos presupuestos xenerales, pa finar con esta marxinación a la institución asturiana y ayudar a la financiación d’una institución imprescindible pa la normativización del idioma”.

Retayen el 40% del presupuestu de l’Academia de la Llingua Asturiana

La Xunta pola Defensa de la Llingua Asturiana celebra güei una mesa-taller titulada ‘Hacia la consolidación y espansión de los Servicios de Normalización Llingüística’, cola participación de Penélope Miranda y María Xosé Rodríguez (trabayadores de servicios de normalización), Adolfo Camilo (xestor cultural) y Esteban Intrialgo (abogáu). Modera, Mónica Riesgo. Sedrá a les seis de la tarde, nel salón d’actos del Departamentu de Filoloxía Española de la Universidá d’Uviéu.

L’asociación eonaviega Xeira denuncia que nun se respeta la llegalidá toponímica nel tramu Navia-Tapia de l’autopista A-8, abiertu esti sábadu. Ente los topónimos incumplíos, la capital d’El Franco, A Caridá, que tien el topónimu na so forma autóctona como única oficial dende que’l Decretu 31/2005 lu ficiere oficial xunto a otros munchos d’esti conceyu del occidente asturianu.

Xeira reclama’l cumplimientu d’esta llexislación, surdida de la Llei d’Usu del Bable/Asturianu de 1998, y recuerda que “a entrada en vigor das formas toponímicas oficiales supoñía úa adaptación progresiva en todas as señalizacióis y, por descontao, nas novas”, polo que pide a la Dirección Xeneral de Política Llingüística que tomen midíes “pra que se respete a llegalidá y se reconoza na señalización viaria un patrimonio como el nome tradicional dos nosos llugares al que por fin se ye dera el aprecio que merecía”, recuerden amás, que les lleis “tán pra cumprillas y nun hai ningúa xustificación pra qu’as autoridades desconozan úa realidá qu’é oficial dende hai sete anos”.

El Conceyu Universitariu pol Asturianu (CUPA) y l’Academia de la Llingua Asturiana (ALLA) van entregar los diplomes acreitativos de los sos II Cursos d’Asturianu CUPA/ALLA esti xueves 26 de xineru a partir de les 19 hores, nel Salón d’Actos del Conseyu de la Mocedá de Xixón (Avenida Manuel Llanez 68, baxu), cola participación de los alumnos, que van dar llectura a dellos testos, el profesor del cursu y un representante de l’Academia, que va dar los diplomes a los trenta alumnos inscritos ente los dos cursos.

El CUPA valora mui positivamente esta esperiencia formativa qu’entamó en collaboración cola Academia de la Llingua Asturiana y la financiación de Caxa Rural y que tuvo una perbona acoyida ente universitarios y ciudadanos de dellos conceyos d’Asturies. Nos cursos cuntóse amás con delles charres de dalgunos espertos, como l’antropólogu Roberto González-Quevedo o la coordinadora de la Oficina de la Llingua de Xixón, María Xosé Rodríguez.

Nel cursu participaron 30 persones de conceyos como Piloña, Uviéu, Valdés o Xixón, cuntando, con tou tipu de profesiones: estudiantes, ames de casa, xubilaos, profesores, sector banca, psicólogos, periodistes y hasta un conceyal de la corporación xixonesa, lo qu’amuesa que del interés pol idioma d’Asturies participen persones de tolos sectores sociales y profesionales. Nel cursu de nivel II siguió’l cursu a distancia, un alumnu brasileñu, que yá participare na primer edición de los cursos y que ye yá tou un embaxador de la nuesa llingua al otru llau del charcu.

Esti martes día 24, a les 16,30 hores, nel “Centro Gerontológico Jovellanos”, na cai Muros de Galicia, númberu 3, d’El Coto, Xixón, celebraráse un actu d’homenaxe y reconocimientu a Don Luis Argüelles Sánchez pol llabor fechu al rodiu del estudiu, recuperación y espardimientu de la cultura asturiana a lo llargo la so vida y como responsable durante varios años del Muséu del Pueblu d’Asturies y Muséu de la Gaita.

L’actu, entamáu pola Asociación Cultural L’Arribada contará, amás, cola representación de los cabezaleros de la Conceyalía de Cultura l’Ayuntamientu Xixón, de la Fundación Municipal de Cultura, Educación y Universidá Popular de Xixón, y del Muséu del Pueblu d’Asturies, que rendirán un tributu cola entrega d’una placa conmemorativa, igual que fará l’asociación convocante col nomamientu a Don Luis Argüelles de miembru honoríficu de la mesma. El “Centro Gerontológico Jovellanos”, del que tamién tarán presentes los cabezaleros, pon los sos locales al serviciu d’esti actu col que se quier facer alcordanza del homenaxeáu.

L’actu, que tará abiertu al públicu, contará con una presentación del académicu de la llingua asturiana, Xuan Xosé Sánchez Vicente, y cola participación del músicu tradicional Dani García de la Cuesta.

La protesta de la Xunta pola Defensa de la Llingua Asturiana énte La Vuelta a España tuvo efeutu y la organización de la prueba ciclista anunció’l contautu cola Dirección Xeneral de Política Llingüística d’Asturies pa usar la toponimia oficial del país.

Esti xueves 19, a les 22 hores, el chigre La Caja negra, d’Uviéu, acueye una folixa que surde tres les protestes vecinales polos problemes de “convivencia” nel barriu de La Tenderina d’Uviéu, el centru d’acoyida de menores foi zarráu y la presión sobre’l colectivu inmigrante aumentó en tola ciudá. Los colectivos integrantes de Ruta contra’l racismu recoyeron testimonios de delles agresiones policiales contra inmigrantes de distinta procedencia y edá. Pa siguir cola so campaña contra la criminalización de la población inmigrante, dende la Ruta contra’l racismu entámase esta fiesta.

La Xunta Pola Defensa de la Llingua Asturiana tien entamaes unes xornaes cola fin d’analizar cuála ye la situación del asturianu cuando entama la segunda década del sieglu XXI. Hai agora quince años, allá pel 1996, la Xunta pola Defensa de la Llingua Asturiana espublizaba’l so “Llibru Blancu de la recuperación y normalización llingüística d’Asturies”, ún de los pocos trabayos de reflexón sociollingüística n’Asturies. Esti llibru yera un marcu d’orientación que venía, según esplicaba’l prólogu, «a dar cuenta tanto de la situación actual como de les perspectives de futuru de delles estayes que tenemos por fundamentales: la enseñanza, los medios de comunicación, la llexislación, l’almistración y la normativización».

Anguaño, quieren analizar cuála ye la situación cuando entama la segunda década del sieglu XXI; qué s’avanzó nos quince años que colaron y, sobre manera, cómo pue ayudanos una reflexón nueva p’actualizar les estratexes y les propuestes que dende un movimientu de reivindicación llingüística han facese pa encarar con fuerces anovaes un futuru inciertu pa la llingua.

Programación de les xornaes:

• 19 de xineru de 2012 a les 18 h. La Llingua na enseñanza. Antiguu Institutu de Xixión. Convidaos: Xosé Antón González, Beatriz Quirós, Paz Fonticiella ya Iris Díaz.

• 1 de febreru de 2012 a les 18 h. La Llingua nos Medios de Comunicación. Sala d’Actos del Dptu de Filoloxía Española de la Universidá d’Uviéu. Convidaos: Naciu Varillas, Ana Vanessa Gutierrez, Próspero Morán, Cristobal Ruitiña.

• 15 de febreru de 2012 a les 18 hores. La Llingua y los Servicios de Normalización.- Sala d’Actos del Dptu de Filoloxía Española de la Universidá d’Uviéu. Convidaos: Penélope Miranda, María Xosé Rodriguez, Adolfo Camilo, Esteban Intriago.

• 29 de febreru de 2012 a les 18 hores. Recuperación y normalización llingüística d’Asturies.- Sala d’Actos del Dptu de Filoloxía Española de la Universidá d’Uviéu. Convidaos: Carlos Pulgar, Ramón d’Andrés, David Guardado.