El Centru Asturianu de Madrid premia a Próspero Morán col Urugallo de Bronce pol so llabor pol asturianu

El Centru Asturianu de Madrid ta acabante anunciar los sos gallardones del añu 2011, otorgaos a asturianos que destaquen nel so llabor n’estremaos llabores. Próspero Morán, director d’Asturnews, va recibir l’Urogallo de Bronce na categoría de llingua asturiana. El premiu, que s’entrega dende 1987, recibiéronlu nel pasáu xente como Xosé Lluis García Arias, Mª Josefa Canellada, Florina Alías, Ediciones Trabe o Nené Losada Rico, ente otros, y reconoz el llabor a favor del espoxigue del asturianu.

Próspero Morán (Llangréu, 1962) lleva toa una vida dedicáu al llabor pol asturianu. Llicenciáu en Filoloxia Hispánica y Doctor en Llingua y Lliteratura Española, algamó dellos posgraos en nueves tecnoloxíes y vien compartiendo’l so llabor de docente n’universidaes col trabayu como periodista, trabayu onde siempres tuvo al asturianu como llingua d’espresión.

El so llabor como periodista entamó en Radio Llangréu, pasando per cásique tolos medios asturianos y dellos estatales, como La Voz de Asturias, onde llegó a ser Xefe de Cultura, TVE, onde foi presentador del telediariu nuna de les poques esperiencies d’informativos n’asturianu. Collaboró tamién en Radio Asturies-SER, Radio 5, el Canal Internacional de TVE, el diariu económicu CincoDías, Qué, y nos años últimos, na TPA, onde presenta’l programa “Nós”, tamién na nuesa llingua.

Dende la so empresa Asturnet fundó Asturnews, una de les primeres esperiencies periodístiques pal asturianu n’internet. El so llibru “Llingua y Nueves Tecnoloxíes”, asoleyáu en 1996, ye ún de los pocos trabayos dedicaos al usu de llingües minoritaries nos medios que trata’l casu asturianu.

El so llabor a favor del asturianu fizo que lu nomaran miembru correspondiente de l’Academia de la Llingua Asturiana. Recibió amás otros reconocimientos, como l’Antena de Plata de l’Asociación de Radio y Televisión d’Asturies.

Otros de los gallardones que van entregase esti añu n’otres categoríes, van dir pa José Luis Martínez, presidente del Atenéu Xovellanos de Xixón, José Luis García Bigoles, del Bancu Herrero, Olmar, S.L., Laureano Muñiz, Andecha Folclor d’Uviéu, na categoría de baille, y la Coordinadora Ecoloxista D’asturies C. E. A., ente otres persones y organizaciones.