Sociedá

El 20 de marzu la escuela secundaria Ferreira de Castro, asitiada n’Oliveira de Azeméis, en Portugal, va acoyer la charra “Mirandés, la otra llingua de Portugal” na voz del escritor mirandés Alcides Meirinhos. Sedrá de magar les 10:15 hores. L’actu organízalu l’Asociación de Lhengua Mirandesa.

Los conceyos del Parque Hestóricu del Navia recibieron mientres 2011 sovenciones de la Dirección Xeneral de Política Llingüística destinaes a entidadades llocales pa la normalización social del gallego-asturianu por un importe total de 17.885 euros.

Según espliquen dende esta institución, “cuasi toes estes sovenciones fueron xestionaes o sofitaes dende la Oficina Cultural y Llingüística de la Fundación Parque Hestóricu del Navia y dexaron que con elles s’executaren distintes actuaciones nel territoriu de los nueve conceyos a los qu’empresta serviciu”.

La campaña de promoción musical “Conceyo de cantares no Parque Histórico del Navia” averó la música de dellos grupos participantes nel CD “Conceyo de cantares”, editáu en 2010 dende la Oficina Cultural y Llingüística, a los distintos conceyos del Parque Hestóricu del Navia y premitió que se celebraren 10 conciertos en distintos actos y festividaes mientres l’añu pasáu.

Otres actividaes sovencionaes a los conceyos del Parque Hestóricu del Navia fueron: la organización del “IV Outono Cultural de Bual”, nel Conceyu de Bual; la edición de publicidá y programación d’actividaes culturales; edición d’un calendariu pal añu 2012; rotulación de dependencies municipales y adaptación de parte de la señalética de les víes municipales al decretu toponímicu oficial nel Conceyu d’El Franco.

Esta mesma actividá d’adaptación de les señales de les víes del conceyu al decretu toponímicu oficial fízose tamién nel casu del Conceyu de Grandas de Salime. A lo último, entamóse la III edición del Cursu de Lingua y Cultura nel Conceyu de Tapia. Estes actuaciones fueron posible gracies a la cofinanciación ente estes sovenciones a entidaes llocales xestionaes o sofitaes dende la Oficina Cultural y Llingüística de la Fundación Parque Hestóricu del Navia y les aportaciones de los respectivos conceyos.

El Seminariu de Filoloxía Asturiana ta acabante dar anuncia pública de que los vinientes díes 22 y 23 de marzu (xueves y vienres) va celebrase nel Salón de Graos del Departamentu de Filoloxía Española’l Simposiu Internacional sobre Variación Sintáctica Dialectal. Esti alcuentru científicu fai parte de la serie de xornaes añales que venimos entamando dende’l SFA dende 2006, cola particularidá de coincidir nesti casu col conceyu, tamién añal, de la rede d’investigación Wedisyn. Nel alcuentru van participar filólogos asturianos como Ramón d’Andrés o María Cueto, xunto a otros dedicaos al estudiu d’otres llingües.

El grupu Wedisyn ta especializáu na sintaxis dialectal de les llingües peninsulares, anque d’él tamién formen parte investigadores del mesmu tema en llingües como’l bretón o l’occitanu. Ta coordináu pola profesora Beatriz Fernández, de la Universidá del País Vascu (UPV/EHU) y d’él formen parte equipos afines de les universidades de Santiago de Compostela, Barcelona, Lisboa, Baiona (vinculada al CNRS francés) y Autónoma de Madrid. La Universidá d’Uviéu fai parte d’esta rede al traviés del SFA y, específicamente, del proyectu Eslema de corpus llingüísticu.

Xulio Viejo, director del Simposiu esplica com “gracies a esta collaboración foi posible entamar estes xornaes na Universidá d’Uviéu y ofrecer un programa científicu d’altu nivel”. Ente los oxetivos d’esti simposiu “dar a conocer n’Asturies llinies d’investigación llingüística que tan siguiéndose n’otres llingües de la redolada y, a otru sen, dar a conocer a estos grupos d’investigación lo que se fai n’Asturies sobre esti campu temáticu”.

El programa del Simposiu

El xueves 22 los actos van entamar a les diez de la mañana con Xulio Sousa, de la Universidade de Santiago de Compostela, que va falar d’«estrategias evidenciales en las variedadesdel gallego: los marcadores gramaticalizados». Más tarde Ernestina Carrilho, de la Universidá de Lisboa daré llectura al trabayu «Expletivos em línguas de sujeito nulo ibéricas: entre contextos matriz e contextos subordinados».

Víctor Lara, de la Universidá Autónoma de Madrid, presentará la comunicación «Concordancias de un cambio lingüístico: el acusativo versus el dativo en el uso de vocês como único alocutivo de plural en el portugués europeo». A la una Ramón d’Andrés, de la Universidá d’Uviéu falará de la «Variación sintáctica y transición lingüística entre asturiano y gallego».

Yá de tarde, Francisco Fernández Rubiera, de la Universitat d’Alacant, tendrá tiempu pa falar de «La conexión germánico-románica: los fenómenos matriz en contextos subordinados». A les 16:45, María Cueto, de la Universidá d’Uviéu ocuparáse del «Leísmu, laísmu y loísmu nel nororiente de Llión», siguiéndola Xulio Viejo Fernández, con «Determinación, especificidad e indefinitud en los determinativos asturianos».

Yá pal vienres 23, cuntaráse cola presencia de Ane Odria & Ane Berro (EHU/UPV), que darán llectura a la comunicación «Intransitivization of reflexive and reciprocal predicates in basque. The case of bivalent ditransitive predicates», pa falar darréu Beatriz Fernández (EHU/UPV) y Milan Rezac, de la Universidá de París, que tratarán el «Marcado diferencial de objeto en las variedades del euskera». Pieslla’l congresu Ricardo Etxepare, (iKer umr 5478-cnrS Baiona), con «Partículas evidenciales en vasco: de la variación a la teoría».

El simposiu, dirixíu pol profesor Viejo, tien a Ramón d’Andrés Díaz, Taresa Fernández Lorences, María Cueto Fernández y Roberto Hinojal Díaz como miembros del comité organizador.

Esti xueves 15 de marzu a les 20 ocho la tarde, miembros de l’Asociación de Refuxaos Colombianos n’Asturies van ufiertar una charra titulada “Testimonios dende Colombia. La persecución sindical” nel Centru Social La Semiente, na cai Eladio Jove, 6, L’Entregu.

La islla de Manhattan, centru financieru, comercial y turísticu de la ciudá de Nueva York, va acoyer na tarde d’esti domingu 18 de marzu les Xornaes de Cultura Asturiana en Manhattan, un actu nel que se van desenrrollar delles actividaes alredor del asturianu y de la cultura d’Asturies, incluyendo la presentación del curtiu n’asturianu “El Ciclu’l Pan”, de la Productora de Programes del Principáu d’Asturies, delles conferencies, música y la presentación d’un llibru de Paquita Suárez Coalla.

Chema Vega Blanco va dar llectura a la conferencia “Camín Primixeniu (Alfonso II) a Santiagu dende Uviéu”, mientres que Bras Rodrigo va dirixir un recital de la Banda de Gaites de Corvera.

Amás, va producise una llectura a cargu de Paquita Suárez Coalla, con testos del so llibru, “Camín de Lletres: d’Asturies Nueva York”, que foi Premiu María Xosefa Canellada en 2011.

Los actos coordínenlos Paquita Suárez Coalla y Marta Zapardiel col patrociniu del Centru Español, del Coordinador Executivu p’Asturies del New York City-Saint Patricks’Day Parade, la Xunta Xeneral d’Asturies, Caxastur, Turismu Asturies, LART y Despaña Brandfoods.

Yá tán accesibles dende la web de l’Academia de la Llingua Asturiana los númberos d’investigación de Lletres Asturianes que van dende l’añu 2000 hasta güei. Esta actualización encuádrase dientro del procesu que lleva alantre l’ALLA pa dixitalizar tola colección del so boletín oficial, que se vien asoleyando dende 1981 y que dende 2011 tamién s’asoleya en versión dixital.

Páxina de la revista Lletres Asturianes

Zamora celebra la décima edición de les Xornaes de Cultura Zamorana na Biblioteca pública de Zamora. El xueves día 8 de marzu, Pascual Riesco Chueca va dar una conferencia sobre la toponimia como indiciu cultural nes provincies lleoneses.

Los díes 13 y 14 va ser el turnu pa José Félix Pérez Lorenzo ya Isabel Hevia Artime que van falar nes sos ponencies de les costumes comunitaries na provincia de Zamora y la llingua tradicional de Zamora, respeutivamente.

Los actos organízalos l’asociación Furmientu.

El centru cultural La Madreña, asitiáu na cai Xeneral Elorza d’Uviéu va acoyer una charra d’introdución al asturianu dada por Sandra Fernández Gavela, profesora d’asturianu. L’idea ye ufrir una primer toma de contautu a aquellos interesaos n’averase un poco más a la llingua asturiana.

La charra va facese esti miércoles 7 de marzu a les siete la tarde.

La Nunyepedia ye un proyectu al estilu de la Uiquipedia pero con entraes en tonu humorísticu que lleva en marcha dende 2006 y qu’agora delles persones traten de facer medrar, pues namás tien nesti momentu 56 artículos.

Nunyepedia

El Diário de Trás-os-Montes da anuncia de los avances daos en Miranda del Douru, Portugal, pa la creación d’un institutu o fundación pa “promover y divulgar” la variedá mirandesa de la llingua. Esta decisión ta na axenda de l’alministración mirandesa asina como na de la Secretaría d’Estáu de Cultura, del Gobiernu de Portugal. L’oxetivu d’esta institución sedría “garantizar el futuru de la llingua” nesta comarca portuguesa na que ye oficial dende l’añu 1998.

El Gobiernu de Portugal, al traviés de la secretaría d’estáu de cultura comprometióse a “fortalecer” a esti nuevu institutu y a la que ye la segunda llingua del estáu lusu.

Esti ye un proyectu que vien de vieyo y que nun se creó entá, según el presidente del territoriu mirandés, Artur Nunes, “por problemes burocráticos surdíos l’añu pasáu”.